Read Imbabura Highland Quichua JOB 11 Bible Online

JOB 11 - Imbabura Highland Quichua bible

JOB 11

¹Naamatita nishca Zofar shuti runaca, cashna nishpami tigrachirca:

²“Ninanda rimarijtaca, ¿nachu tigrachi ushanalla imatayari? Ninanda rimarij runaca, ¿ima nalitapash na rurashcachu ricuringa?

³Maitapash can rimashca shimicunaca, ¿runacunata upallayachingallachu? Can na cazushpa asijpica, ¿candaca nachu pipash pingaichinman?

⁴Canga: ‘Ñuca yachachishcapash alipachami. Cambaj ñavipica, mapa illajmi cani’ ninguimi.

⁵Taita Diosca, canhuan parlashpachari ali canman. Paipaj shimita pascashpa, canhuan parlashpami ali canman.

⁶Paica, pipash na yachashca ali yachaicunata canman villashpami ali canman. Chaicunaca, imata charishcacunatapash, chaupi yali cajtami ricuchinman. Chaita ricushpami, can nalita rurashcamandaca, Taita Diosca ashatalla llaquichijushcata yachanguiman.

⁷¿Canga, Taita Dios imatalla yarijushcataca, yachai ushanguichu imashi? ¿Tucuita Rurai Ushaj Diosmandaca, tucuita yachai ushanguillachu?

⁸Paica, jahua pachatapash yali jahuamanmi. ¿Imatashi rurai ushangui? Seoltapash yali ucumanmi. ¿Imashnashi rijsingui?

⁹Paica, cai pachatapash yali jatunmi, mama cuchatapash yali anchomi.

¹⁰Pai yalijushpa, prezu japishpa, imatalla rurashcata tapuchingapaj cayajpica, ¿pita jarcai ushangayari?

¹¹Paica, yangalla runacunataca rijsinmi. Shinallata nalita rurajujtapash ricujunmi. ¿Chaita ricushpata, saquingallachu?

¹²Sacha burro, genteta ung:ui ushajpica, yangalla runapash, ali yuyaita japi ushanmanmi.

¹³Cambaj shunguta alichirishca cashpaca, cambaj maquitapash paipajman chutai ushanguimi.

¹⁴Cambaj maquihuan ima nalitapash rurajushpaca, shitashpa saquilla. Ima nalita ruranacuna cambaj huasipi tiachumbash, na saquinachu cangui.

¹⁵Shina causajushpami, mapa illaj ñavihuan vichai ricungui. Shina cashpaca, shinllipacha cashpami, imatapash na manllangui.

¹⁶Cambaj llaquicunatapash cunganguimi. Na cashpaca chai llaquitaca, yacu yalishcatashnami yaringui.

¹⁷Cambaj causaica, chaupi punllatapash yali punchapambami canga. Tutayashca cajpipash, tutamandashnami canga.

¹⁸Cambaj shuyana tiajpimi, chaita yariajlla causangui. Muyundita chapashpaca, imatapash na manllashpami puñungui.

¹⁹Puñungapaj can sirijpica, pipash na manllachingachu. Taucacunami, can ayudachun mañangapaj shamunajunga.

²⁰Ashtahuangarin nalita rurajcunapaj ñavica, na ricui ushangachu. Paicunaca, maipi pacajunatapash na charingachu. Paicuna shuyajushcapash, tucuri samaita aisashpa huañunashnami canga” nijurcami.