Read Imbabura Highland Quichua JOB 12 Bible Online

JOB 12 - Imbabura Highland Quichua bible

JOB 12

¹Shina nijpimi Job runaguca, cashna nishpa tigrachirca:

²“Cangunami, alipacha gentecuna canguichi. Canguna huañujpica, ali yachaipash tucuringami.

³Ñucapash, cangunashnallata ali yuyaitami charini. Cangunata yali yangallapash na canichu. Canguna nishcatashnaca, ¿pita na ni ushangayari?

⁴Ñucapash, ñuca cumbahuanllata nalicachi tucushca purami cani. Taita Diosta mañajpica, paica tigrachimunllami. Imatapash cashcatapacha ruraj runatapash, imatapash cashcatapacha na ruraj runatapash, asishpami ricunajun.

⁵Ñuca chaquica llushpigrijunmi. Alipi tiajushpata, nalicachi tucushca lamparashnami cani.

⁶Shuhuacunapaj carpacunapirami, imapash ali llujshin. Taita Diosta fiñachijcunarami, imatapash na manllashpa causanajun. Paicuna imatalla charishcataca, Diosllatami paicunapaj maquipi churashca.

⁷Shina cajpica cunanga, animalcunata tapuyari. Paicunaca villangallami. Jahuata rij alasyu animalcunata tapuyari. Paicunaca ricuchingallami.

⁸Na cashpaca alpahuan parlayari. Paipash villangallami. Mama cuchapi tiaj pijicunapash villangallami.

⁹Cai tucuicunamandaca, ¿imashi, Mandaj Diospaj maquihuan rurashcataca, na yachan?

¹⁰Causaita tucui charijcunapaj almaca, paipaj maquipimi. Tucui gentecunapaj samaipash, paipaj maquipimi.

¹¹Rinri uyajpimi, ali shimi cajta, nali shimi cajtapash yacharin. Shimiman micuna chayajpimi, imashna cajtapash yacharin.

¹²Rucucunami, ali yachaita charin. Unai huatacunata causajcunami, ali yuyaicunata charin.

¹³Ali yachaipash, ushaipash Taita Dioshuanmi. Ali yuyaita cunapash, ali yuyaipash paipajmi.

¹⁴Pai urmachishcataca, pipash na cutin shayachi ushanllu. Runata vichashpa churashcataca, pipash na pascashpa llujchi ushanllu.

¹⁵Yacucunata pai charijpica, tucuilla chaquinllami. Yacuta yapata cachamujpica, alpata tucuchinllami.

¹⁶Ushaipash, ali yachaipash paihuanmi. Pandaj runapash, pandachij runapash paipajmi.

¹⁷Ali yuyaita cuj runacunataca, paimi ali yuyai illajcuna purichun saquin. Paimi, juezcunatapash muspayachin.

¹⁸Paimi, llaquichishpa charij mandajcuna huatashca cadenacunata fitishpa, cabiacunahuanlla huashapi huatan.

¹⁹Paimi, mandajcunatapash tucuita quichushpa pushan. Ushaita charijcunatapash tucuchinllami.

²⁰Na llullashpa rimajcunatapash upallayachinllami. Mandaj rucucuna ali yuyaita cunatapash quichunllami.

²¹Paimi, jatun mandajcunata yangapi churanatapash talinshna cachamun. Ninan shinllicuna huatarishca chumbitapash pascanllami.

²²Paica, yana yana tuta ucu ucuman cajtapash tarinllami. Huañuchij llandutapash, punchapambaman llujchinllami.

²³Paica, llactacunata mirachishpapash, paillata chingachinllami. Llactacunamanda caita chaita cachashpapash, cutin tandachimunllami.

²⁴Paimi, cai pachapi causajcunata mandajcunapaj yuyaita quichun. Paicunataca, ñan illaj jichushca pambata chingashcashna purinajuchunmi saquin.

²⁵Paicunaca, micha illaj yana yana tutapishnami, tacarishpalla purinajun. Machashca runacunatashnami pandachin.