Read Imbabura Highland Quichua JOB 13 Bible Online

JOB 13 - Imbabura Highland Quichua bible

JOB 13

¹Ricuichi, tucui caicunataca, ñuca ñavihuambachami ricurcani. Ñuca rinrihuambacha uyashpami, yuyaita japircani.

²Canguna yachashcataca, ñucapash yachanimi. Cangunata yali yangallapash na canichu.

³Ashtahuangarin ñucaca, Tucui Ushaita Charij Dioshuan rimaimanllami. Yuyaita japishpa, Taita Dioshuan parlaimanllami.

⁴Cangunaca, llullashpa pandachij runacunapachami canguichi. Tucui cangunaca, jambij runacuna cashpapash, yangacunami canguichi.

⁵Cangunaca, upallapacha cashpachari ali canguichiman. Shinami cangunaca, alipacha yachajushcacuna canguichiman.

⁶Cunanga, ali yarishpa ñuca rimashcata uyaichi. Ñuca shimi imata rimashcata alipacha yarichi.

⁷¿Taita Diosmandaca, nalicunatachu rimanguichiman? ¿Paimandaca, llullashpa parlanguichimanllu?

⁸¿Diosta alipi llujchingapaca, maijandapash ñavita ricushpalla, imatapash ruranguichimanllu? ¿Taita Diospaj randi shayarishpa rimanguichimanllu?

⁹Canguna imata rurashcata callarishpa pai ricushpaca, ¿alichu canman? ¿Paitaca, shuj runata asishpa ricunshna, asi ushanguichimanllu?

¹⁰Ñavita ricushpalla, pacalla imatapash rurajpica, paica cangunataca llaquichingapachami.

¹¹Diospaj jatun ushaihuanga, manllachi ushanmambachami. Jatun manllaica, cangunapaj jahuapimi urmanman.

¹²Canguna rimashca yarichij shimicunaca, uchufashnami. Cangunapaj baluarte nishcacunapash, turuhuanlla rurashcacunashnami.

¹³Ñuca rimashcata ali uyahuaichi. Chai jipaca, ima tucungapajpash rimashallami.

¹⁴¿Imashpata ñuca aichataca, ñuca quirucunahuanllata anchuchishayari? Ñuca causaitaca, ¿imapajta ñuca maquipi japishayari?

¹⁵Ricuichi, ñucata pai huañuchijpipash, paitallatami shuyajusha. Ashtahuangarin ñuca imashna causashcata ricuchishpami, paipaj ñaupajpica mitsarisha.

¹⁶Paillatami, ñucataca quishpichihuanga. Paita na manllaj runaca, paipaj ñaupajpica, napacha ricuri ushangachu.

¹⁷Ñuca ali yarishpa rimashcata, ali uyahuaichi. Ñuca villashcacunaca, cangunapaj rinriman chayashpami ali canman.

¹⁸Ricuichi, ñuca shimihuan rimashpa, cunan mitsarishpaca, imatapash cashcatapacha rurashca ricurinatapash yachanimi.

¹⁹¿Pita, ñucahuan fiñanajushpa rimaita ushangayari? Cunan ñuca upallayashpaca, huañuimanmi.

²⁰Ñucataca, cai ishcaitallami na rurachun capangui. Chaicunata na rurajpica, cambaj ñaupamandaca na pacajushachu:

²¹Cambaj maquita ñucamanda anchuchishpa, cambaj jatun manllaihuan ama manllachihuaichu.

²²Chai jipaca cayahuailla, ñucaca tigrachishallami. Na cashpaca ñuca rimajpi, can tigrachihuanguilla.

²³Ñucaca, ¿mashna nalicunata, mashna juchacunatata charini? Ñuca na cazushcata, ima juchata rurashcata yarichihuayari.

²⁴¿Imashpata cambaj ñavita pacashpa, canda fiñaj runatashna ricuhuangui?

²⁵¿Shitashca fangatachu llaquichingapaj munangui? ¿Chaquishca ujshatachu catiriashpa, llaquichingapaj munangui?

²⁶¿Imashpata ñucata llaquichinata escribishpa saquingui? ¿Imashpata chairalla viñai cashpa, juchacunata rurashcataca ñucamanllata tigrachihuangui?

²⁷Chashna rurashca jahuami, ñuca chaquitaca, utujushca caspipi canichingui. Shina rurashpami, ñuca imatalla rurashcata callarishpa ricujungui. Ñuca chaqui sarunatapashmi jarcajungui.

²⁸Ñuca cuerpoca, ismunshnami tucurijun. Churajunata polillanshnami tucurijun.