Read Imbabura Highland Quichua JOB 14 Bible Online

JOB 14 - Imbabura Highland Quichua bible

JOB 14

¹Huarmimanda huacharishca runaca, asha punllacunatalla causana cashpapash, llaquihuan shaijushcami causan.

²Sisa llujshijpi fitishcashnami tucun. Llandu ricurishpa ñapash chinganshnami tucun.

³¿Shina cajta ricushpatachu, ñuca imatalla rurashcacunata canman ricuchijuchun cayahuangui?

⁴Mapa cajtaca, ¿pita mapa illajta rurai ushanga? Chaitaca, pipash na ushangachu.

⁵Runapaj causaica, mashna punllacunacaman causanatapash, ña ricushcallami. Pai causana quillacunapash, cambaj ladollapimi. Ima punllacaman causachun can churashcamandaca, na yali ushangachu.

⁶Paita can cungajpica, paica huañungallami. Caipi chaipi trabashpa purij runashnami, punlla tucurinata shuyajunga.

⁷Quiruta fitishpapash, cutin retoñachun shuyanrami. Retoñajpica, mushuj malquicunaca, napacha illangachu.

⁸Alpa ucupillata sapi chaquishpapash, alpapillata tronco ismushpapash,

⁹yacuta chupashpaca, cutin verdeyangallami. Mushuj yurata tarpushcashnami, fanga junda tucunga.

¹⁰Ashtahuangarin runa huañushpaca, fiti tucushcashnami chinganga. Runa ña huañushpaca, ¿paica maipishi ricuringa?

¹¹Mama cuchamanda yacu rishpa, asha asha chaquishpa chinganshnami tucun.

¹²Chashnami runa huañushpa sirijushcamandaca, na cutin jatarin. Jahua pacha tucuringacaman napacha rijcharingachu, puñujushcamandaca napacha jataringachu.

¹³¡Maijan cashpapash, Seolpi pacajugri nishpachari ali cahuanman! Can ninanda fiñarishca ali tucungacaman, chaipi pacajui nishpachari ali canman. Ashata shuyashpaca, ñucata cutin yarishpachari, ali canguiman.

¹⁴¿Runa huañushpaca, cutin causaringachu? Ñuca causai punllacunapica, ñucapaj quishpirina chayamungacamanmi shuyajushalla.

¹⁵Chashna shuyajujpi can cayajpimi tigrachisha. Chaipica, cambaj maquihuan rurashcataca juyanguimi.

¹⁶Ashtahuangarin cunanga, ñuca purishcatapashmi cuentajungui. Ñuca juchamandaca, napacha samachihuanguichu.

¹⁷Yachashpata na cazushpa, nalita rurashcataca, costalpi sirashcashnami sellashca charijungui.

¹⁸Urcu urmashpaca, tucuillapachami chingan. Jatun rumicunapashmi, tiajushca pushtumandaca suchurin.

¹⁹Ashtaca yacu shamushpa, ñutu alpacunata apajpica, rumicunapash maucayanllami. Runa imata japisha yashpa shuyajushcatapash, canga chashnallatami tucuchingui.

²⁰Canga, causaita causaicamanmi runata yali shinlli cangui, paica chingangallami. Paipaj ñavita shujman tigrachishpaca, cayacaman nishpa cachanguillami.

²¹Paipaj churicuna alicachi tucushcatapash, paica na yachangachu. Na cashpaca, paicuna ñavita urai cumuchi tucushcatapash na yachangachu.

²²Ashtahuangarin paipaj cuerpotaca, paillatami nanachinga. Paipaj almallatami, ninanda llaquiringa” nijurcami.