Read Imbabura Highland Quichua JOB 15 Bible Online

JOB 15 - Imbabura Highland Quichua bible

JOB 15

¹Temanita nishca Elifaz shuti runaca, cashna nishpami tigrachirca:

²“¿Alipacha yachajushca runaca, imatapash yangata rimanllachu? ¿Paipaj vijsapipash, rupajlla huairatachu jundachin?

³¿Maijanhuambash rimarishpaca, yangalla shimicunatachu rimanman? ¿Napash imata yarichij shimicunatachu riman?

⁴Cambash, Diosta manllanata cunganguillami. Taita Diospaj ñaupajpi mañanatapash, yangapi churanguillami.

⁵Cambaj shimillatami, can nalita rurashcataca villarca. Canga, umachinata alipacha yachaj runacunapaj rimaitami agllashcangui.

⁶Cambaj shimillatami candaca, llaquipi churanga. Ñucaca, na llaquipi churashachu. Cambaj shimillatami, canda llaquichinata villanga.

⁷¿Canga, Adán runapaj pundachu huacharircangui? Na cashpaca, ¿urcucunata nara rurashpallatachu, candara rurarca?

⁸¿Canga, Taita Dios yarijushpa rimajta uyarcanguichu? ¿Canmanllachu ali yachaita cararca?

⁹Canga, ñucanchi na yachashcataca, ¿imatata yachangui? Canga, ñucanchi na yachashcataca ¿imatata entendingui?

¹⁰Ñucanchi purapica yuraj umacuna, alipacha rucu runacunami tian. Paicunaca, cambaj taita causashca punllacunata yalimi causan.

¹¹Canman, Taita Dios cushijuita carashcatapash, ¿mishquilla shimicunahuan rimashcatapash, yangapipachachu churangui?

¹²¿Imashpata cambaj shunguca, paimanda caruyan? ¿Imashpata cambaj ñavitaca capitsijungui?

¹³¿Imapajta cambaj yuyaipica, Taita Dioshuan fiñarigui? ¿Imashpata shimi llujshishcata, chashna shimicunahuan rimangui?

¹⁴Runaca, mapa illaj cangapaca, ¿imatayari? Huarmimanda huacharishca runa, imatapash cashcatapacha rurashca ricuringapaca ¿imatayari?

¹⁵Ricui, paipajlla causajcunatapash napacha yariajlla causanllu. Jahua pachapash paipaj ricuipica, napacha mapa illajchu.

¹⁶Yacuta ufianshna nalitalla ruraj, millanayaita ruraj runacarin, ¿maitata ali ricuringayari?

¹⁷Ñuca villajujta uyahuayari. Ñuca ñavihuan ricushcatami, canman villasha.

¹⁸Alipacha yachajushcacuna, paicunapaj ñaupa taitacunamanda, na pacashpa ñucanchiman parlashcatami villagrini.

¹⁹Cai llactataca, chai taitacunamanllami cararca. Paicunapaj llacta chaupitaca, na rijsishca runacunaca, na yali usharcachu.

²⁰Diosta na manllaj runaca, tucui paipaj causai punllacunami, paipaj nanaihuan llaquilla causajun. Llaquichij runa mashna huatata causanapash, pacashcami tiajun.

²¹Paipaj rinripica, manllanayaita culun nishcami uyarin. Pai tucuipi ali causajujpimi, tucuchij runa shamushpa tucuchinga.

²²Paica, yana yana tutapi cashpa cutin tigramunataca, na crinllu. Paica, espadahuan huañui tucunallami causajun.

²³Paica, micunata mascashpa, muyundita yanga purishpami: ‘¿Micunaca maipitayari?’ nishpa tapujun. Paiman alichishca yana yana tutaman rina punlla chayanatapash yachanmi.

²⁴Llaquicunapash, huacaicunapashmi, paitaca muspachinga. Paita llaquichingapaca, jatun mandaj macanajungapaj alichirishcashnami shinllitapacha shamunga.

²⁵Paillatami, Taita Diosta fiñashpa, maquita alsarca. Paillatami, Tucui Ushaita Charij Diosta jariyashpa jatun tucushpa causarca.

²⁶Paica cungata chutashcami, Diosta llaquichingapaj calpajurca. Jarcarina ninan shinlli escudocunahuanmi calpajurca.

²⁷Ñavi chingajtami virayarca. Paipaj vijsapash, huarcurimi carca.

²⁸Paica, llaquinayaita tucuchi tucushca pueblocunapi, pipash na causajuj urmashca huasicunapimi causajurca.

²⁹Paica, imapipash nali llujshingachu. Pai imatalla charishcacunapash, na unaicaman tiangachu. Pai juyailla cashcapash cai pachapica, maipipash na uyaringachu.

³⁰Manllanayai yana yana tutapi cashpaca, na quishpiringachu. Ninami, paipaj malquicunatapash chaquichinga. Diospaj shimihuan fucujpimi, tucuringa.

³¹Umai tucushpa causajuj runaca, yangacunataca ama yariajlla causachun. Pai japina cashcataca, chaitallatami japinga.

³²Paica, huañuna punlla nara pactajpillatami, huañunga. Paipaj retoñocunapash, na verdeyangachu.

³³Pai jayaj cashcapash, uvas yurashnami chinganga. Paipaj sisacunapash, olivos sisashnami taliringa.

³⁴Diosta na manllajcunapaj tandanajuipash, llaquinayaitami tucuchi tucunga. Imatapash pacalla cujpi charishca carpacunataca, ninami tucuchinga.

³⁵Llaquicunatalla vijsayu tucushpami, nalita ruranatalla ungunajurca. Paicunaca, umachinata yariajllami causanajun” nijurcami.