Read Imbabura Highland Quichua JOB 16 Bible Online

JOB 16 - Imbabura Highland Quichua bible

JOB 16

¹Job runaguca, cashna nishpami tigrachirca:

²“Chashnacunataca, ashtaca viajemi uyashcani. Tucui cangunaca, cushichingapaj randica, fiñachijcunami canguichi.

³Ima yuyaitapash na cuj, yanga shimicunaca, ¿nachu tucurigrin? Na cashpaca, ¿imata candaca rimachijun?

⁴Cangunapaj alma, ñuca almashna cajpica, ñucapash cangunashnallata rimaimanllami. Ñucapash cangunata fiñashpa maitapash rimaimanllami. Umatapash cuyuchishpami ricujuiman.

⁵Ashtahuangarin ñucaca, ñuca rimashca shimihuanmi cushichiman. Ñuca rimashca shimihuan cushichishpami, cangunapaj nanaitaca samachiman.

⁶Ñuca rimajujpica, ñuca nanaica na tucurinllu. Upalla cajpipash, ñuca nanaica na anchurihuanllu.

⁷Shina cajpipash cunanga, ashtahuanmi canga shaijuchihuangui. Tucuilla ñuca cumbacunatapashmi caruyachircangui.

⁸Canmi, ñuca cuerpotaca sipuyachishcangui. Chaitaca, ñuca cuerpo jamzi tucushcami ricuchijun. Chaimandami, ñuca ñavipillata ricuchishpa juchachingapaj jatarin.

⁹Pai ninanda fiñarishpami, caita chaita fitihuarca, ñucataca fiñahuarcapachami. Quirutapash canirishpami, ñucataca fiñahuarca. Ñucata fiñaj runaca, imahuambash tujsinashnami ricujuhuarca.

¹⁰Ñucata fiñashpami rimanajurca. Ñucata rimashpa pingaichishpami, ñavi ladopi huactashpa chugrichinajurca. Ñucata fiñashpami, tucuicuna tandanajurca.

¹¹Taita Diosca, llulla runamanmi ñucataca cushca. Paita na manllajcunapaj maquipi urmachunmi saquihuashca.

¹²Ñucaca, tucui ali llujshijpimi causajurcani. Ashtahuangarin ñutushpami saquihuarca. Ñucataca, cunga tullumanda japishpami caita chaita fitihuarca. Flechacunata shitangapaj yuraj señaltashnami churahuarca.

¹³Flechacunata shitaj paipaj runacunami, ñuca muyundipi shayarirca. Ñuca riñongunata chaupishpapash, napacha saquihuarcachu. Ñuca jayajpash, alpapimi talirirca.

¹⁴Ñucataca, cati catimi llaquichishpa catijurca. Manllanayai jatun runashna, calpamushpami llaquichihuarca.

¹⁵Cañamutami, ñuca cara jahuapica sirarircani. Ñuca umahuanga, ñutu alpapimi pambarircani.

¹⁶Ninanda huacajpimi, ñuca ñavipash punguishca. Ñuca ñavipash amsayashcami.

¹⁷Ñuca maquihuanga, ima nalitapash na rurashca jahua, ali shunguhuan paita mañashca jahuami, chashna rurahuan.

¹⁸¡Alpalla, ñuca yahuartaca ama quilpapaichu! Can quilpajpica, maipi caparinapash illangami.

¹⁹Ricui, ashtahuangarin ñucamanda villajca, jahua pachapimari. Ñuca imatalla rurashcata villajca, jahuapimi tiajun.

²⁰Ñuca cumbacunaca, ñucahuan rimarijcunallami. Ashtahuangarin Taita Diospaj ñaupajpimi, viquita jichashpa mañasha.

²¹¡Runaca, paipaj cumba runaguhuan rimarinshna, Taita Dioshuambash rimari ushashpachari ali canman!

²²Ashtahuangarin cuentashcalla huatacunami chayamunga. Ñucaca, cutinga na ashtahuan tigramuna ñanda japishpami risha.