Read Imbabura Highland Quichua JOB 17 Bible Online

JOB 17 - Imbabura Highland Quichua bible

JOB 17

¹Ñuca samaica, ñami tucurijun. Ñuca causana punllacunapash, ñami tucurijun. Ñucata pambana utujutapash, ña allashcallami.

²Na cazushpa asijcunallami, ñucahuanga tianajun. Ñuca ñavica, paicuna llaquichijtallami ricujun.

³Taita Dioslla, can ñucata pacana cajta yachangapaca, imatallapash ricuchihuayari. Ñucamanda shayaringapaca, ¿pita munangayari?

⁴Canmi, paicunapaj shungumandaca, ali yuyaicunata anchuchishcangui. Shinamandami, paicunataca na jatumbi churangui.

⁵Imapash animalta japinshna japinajuchun, paipaj cumbatallata llullashpa villaj runapaj huahuacunami, llaquilla ñavihuan ricunajunga.

⁶Yarichij shimicunahuan gentecuna ñucata rimanajuchunmi, Diosca saquihuashca. Paicunapaj ñaupajpica, ñucaca uchilla tamborshnami cashcani.

⁷Nanaihuanga, ñuca ñavipashmi amsayarca. Ñuca yuyaicunapash, tucuillami llandushna tucurca.

⁸Chaita ricushpami, aligutalla rurajcunaca manllarinajunga. Ima nalitapash na ruraj runaca, Diosta na manllaj runata llaquichingapajmi jataringa.

⁹Ashtahuangarin imatapash cashcatapacha ruraj runaca, imatapash cashcatapacha rurashpa catijungallami. Paipaj maquihuan ima nalitapash na ruraj runaca, ashtahuanmi shinlli tucunga.

¹⁰Ashtahuangarin cunanga, cangunaca tucuicuna tigrashpa shamuichilla. Canguna purapica, alipacha yachajushca runataca na tarishachu.

¹¹Ñuca causana punllacunaca, ñami yalishca. Ñuca imatalla yarijujtapash anchuchihuashcami. Ñuca shungupi imata yarijushcapash, ñami tucurishca.

¹²Tutataca, punllamanmi tigrachinajurca. Yana yana tutapica, michapash na punchayachinllu.

¹³Ashata ñuca shuyajpica, Seolmi ñuca huasi canga. Yana yana tutapimi, ñuca camata rurasha.

¹⁴Ñucaca, ismushpa tucurinatami: ‘Canga, ñuca taitami cangui’ nircani. Jurucunataca: ‘Ñuca mama, ñuca panicunami canguichi’ nircanimi.

¹⁵Cunanga, ñuca shuyanaca, ¿maipitayari? Ñuca shuyajushcataca, ¿pita ricungayari?

¹⁶Seol ucucamanmi, ñucahuan urai rijunga. Ñutu alpapimi, parejo samashun” nijurcami.