Read Imbabura Highland Quichua JOB 18 Bible Online

JOB 18 - Imbabura Highland Quichua bible

JOB 18

¹Suhita nishca Bildad runaca, cashna nishpami tigrachirca:

²“¿Ima horascamanda rimaita tucuchigringuichi? Ali yuyaitara japichi. Chai jipaca, parlashunllami.

³¿Imashpata ñucanchica, animalcunashna ricurinchi? ¿Imashpata cangunapaj ñavipica, imapajpash na valijcun ricurinchi?

⁴Ninanda fiñarishpa tucurijuj runalla. ¿Canmandallachu llactaca jichui tucunga? ¿Jaca rumicunapashchu, tiajushca pushtumanda cuyuchi tucunga?

⁵Diosta na manllajcunata punchayachij michaca, huañuchi tucungapachami. Nina rupashpa zimbrajuj paicunapaj ninaca, na punchayachingachu.

⁶Paipaj carpapi punchayachij michapash yanayangami. Jahuapi tiajuj lamparapash, huañungami.

⁷Ucha purij cashpapash, alimandallami puringa. Paitaca, pai yarijushcallatami urmachinga.

⁸Pai purinapica, linllitami shitanga. Malla jahuacunatami purijunga.

⁹Paipaj chaqui talonbi lazushpami urmachinga. Paita japingapaca, tugllatami shinllitapacha churanga.

¹⁰Paita urmachina cabiapash, pambapimi pacashca tiajun. Paita japina tugllapash, purina ñambimi churashca tiajun.

¹¹Tucui ladomandami, llaquicuna shamushpa manllachinga. Shinami ninanda manllachishpa calpachinga.

¹²Yarjaimandami ushai tucuringa. Ninan llaquica, paipaj ladopillatami alichishca tiajunga.

¹³Ung:uimi, paipaj jahualla carataca ismuchinga. Manllanayaita huañuchij ung:uimi, paipaj cuerpotaca micushpa tucuchinga.

¹⁴Na manllashpa causajushpapash, paipaj carpamanda aisashpa shitai tucungami. Ninanda manllachij jatun mandajpajmanmi, pushai tucunga.

¹⁵Paipaj carpapillatami, na paipaj carpapishna causajunga. Pai causajuj huasi jahuapica, azufre rumitami chafsinga.

¹⁶Alpa ucupica, sapicunami chaquinga. Jahuapica, yura malquicunami fiti tucunga.

¹⁷Paitaca, cai pachapica pipash na yaringachu. Paipaj shutitaca, ñangunapipash na yarinajungachu.

¹⁸Punchayachij michamandaca, yana yana tutamanmi shitai tucunga. Cai pachamandapash, anchuchi tucungami.

¹⁹Paipaj llacta puracunapica churitapash, nietotapash na charingachu. Paipaj huasicunapi causangapajpash, pipash na tiangachu.

²⁰Indi huashajuj ladoman causajcunaca, pai ima tucushcata yachashpami manllarinajunga. Indi llujshimuj ladoman causajcunataca, jatun manllaimi japinga.

²¹Diosta na manllaj runapaj causana huasicunaca, chashnapachami tucunga. Taita Diosta na rijsij runapash, shinallatami canga” nijurcami.