Read Imbabura Highland Quichua JOB 19 Bible Online

JOB 19 - Imbabura Highland Quichua bible

JOB 19

¹Chaimandami Job runaguca, cashna nishpa tigrachirca:

²“¿Ima horascamanda ñuca almata llaquichishpa rimashca shimicunahuan ñutunshna llaquichigringuichi?

³Ñucataca, ñamari chungacaman nalicachishpa rimanguichi. Nalicachishpa ñucata rimangapaca, ¿nachu pinganayan?

⁴Pandashpa nalita rurashcapacha cajpica, ñuca jahuapimi llaquicuna urmanman.

⁵Ashtahuangarin cangunaca jatun tucushpami, ñucataca rimanguichi. Ñucata fiñashpami, nalicachishpa rimahuanguichi.

⁶Cunanga, Taita Diosllata ñucata llaquichishcata yachaichi. Paipaj linllipimi pilluhuashca.

⁷Ricuichi, ñucataca llaquichihuanmi nishpa caparijpipash, napacha uyahuangachu. Ninanda caparijujpipash, ñucamandaca pipash na alita rurangachu.

⁸Ñuca purina ñambica, patata rurashpa jarcajpimi, na yali ushani. Ñuca purina ñangunatapash, yana yana tutatami rurarca.

⁹Ñuca juyailla cajtaca quichuhuarcami. Ñuca umamanda coronatapash anchuchircami.

¹⁰Tucui ladocunamanda llaquichijpimi, ña huañugrijuni. Ñuca shuyajushcataca, quirutashna fitishpami shitarca.

¹¹Pai fiñarishpaca, ninahuanshnami llaquichihuarca. Paita fiñaj puracunatashnami, ñucataca ricuhuarca.

¹²Paipaj soldadocuna tandanajushpa shamushpami, muyundi jarcahuarca. Ñuca carpa muyundipimi, carpacunata shayachishpa tianajurca.

¹³Ñuca huauquicunatapash, ñucamanda caruyachircami. Ñuca cumbacunapash, na rijsishca runacunashnami ñuca ladomandaca caruyarca.

¹⁴Ñuca familiacunapash, na ricungapaj shamurcachu. Ñucata rijsijcunapash, ñucataca cungarcami.

¹⁵Ñuca huasipi causajcunapash, ñucata servij huarmicunapash, na rijsishca runatashnami ricuhuarca. Paicunapaj ñavipica, caru llactamanda shamushca runashnami carcani.

¹⁶Ñucata servij runata cayajpipash, na tigrachihuarcachu. Ñuca shimihuambachami, paitaca caparishpa ninanda mañajurcani.

¹⁷Ñucamanda llujshishca huahuacunamanda mañajujpipash, ñuca huarmipaca ñuca samaipash, millanayaimi carca.

¹⁸Chairalla viñaicunapash, ñucataca na ricunayachircachu. Ñuca jatarijpipash, fiñashpami rimahuarca.

¹⁹Ñuca ali cumbacunapash, tucuillami fiñahuarca. Ñuca juyashca cumbacunapashmi llaquichihuarca.

²⁰Ñuca aichapash, ñuca carapash tullucunapimi llutarirca. Quiru ladopi tiaj aicha carahuanllami quishpirishcani.

²¹¡Ñuca cumbacunalla, ñucata llaquihuaichiyari! ¡Ñucata llaquihuaichiyari! Taita Diospaj maquimari, ñucataca tacarishca.

²²¿Imashpata Taita Dios llaquichinshnallata catiriashpa llaquichihuanguichi? Cangunaca, ñuca aichata micunshna llaquichinajushpapash, na amishpami puringuichi.

²³¡Cunanga, ñuca rimashca shimicunata maijambash escribishpachari, ali canman! ¡Chai shimicunataca, shuj libropi maijambash escribishpachari ali canman!

²⁴¡Causaita causaipaj tiachun jirru cincelhuan, plomohuan rumipi escribishpachari ali canman!

²⁵Ñucata Quishpichij Dios causajujtaca yachanimi. Tucuripica, paimi ñutu alpa jahuapi shayaringa.

²⁶Ñuca carapash, ismushpa chingashca jipami, Taita Diostaca ñuca aichahuambacha ricujusha.

²⁷Paitaca, ñucallatami ricujusha. Ñuca shungu ucupica, llaquihuan na ushajushpapash, ñuca ñavihuambachami ricujusha. Pipash shujca, na ricujungachu.

²⁸Ashtahuangarin cangunaca: ‘¿Imashpata paitaca, catiriashpa llaquichinchiyari?’ ninami canguichi. Imamanda cashpapash, ñucami llaquita apajuni.

²⁹Cangunaca espadapaj ñaupajpica, manllaichiyari. Imatapash cashcatapacha na rurashcamandami, cangunata llaquichingapaca, fiñarishpa espadahuan shamujun. Llaquichina tiashcata yachachunmi, chashna tucunga” nijurcami.