Read Imbabura Highland Quichua JOB 2 Bible Online

JOB 2 - Imbabura Highland Quichua bible

JOB 2

¹Shinallata shuj punllapashmi, Taita Diospaj churicunaca, Mandaj Diospaj ñaupajpi ricuringapaj shamunajurca. Paicuna purapica Satanaspashmi, Mandaj Diospaj ñaupajpi ricuringapaj shamurca.

²Shina shamujpimi Mandaj Diosca, Satanastaca: —¿Maimandata shamungui?— nirca. Shina tapujpimi Satanasca, Mandaj Diostaca: —Alpa pachata muyushpa, chaipi purishpami shamuni— nirca.

³Shina nijpimi Mandaj Diosca, Satanastaca cashna nirca: —Ñucata servij Job runagutaca, ima pandatapash na ruraj, aligutalla ruraj, Taita Diostapash manllaj, nalita ruranamandaca anchurishca cajtaca, ¿nachu ali ricurcangui? Chai alpa pachapica, paishnaca pipash na tianllu. Paitaca, ima nalitapash na rurajpitami, llaquichingapaj ucha cuhuai nijurcangui. Shina cajpipash paica, ima pandatapash nara ruranllu— nircami.

⁴Shina nijpimi Satanasca, Mandaj Diosman cashna nishpa tigrachirca: —Runaca, caramandaca caratallatami cun. Runaca, paipaj causaimandaca tucui ima charishcatami cunman.

⁵Ashtahuangarin cunanda cambaj maquita chutashpa, paipaj tullupipash, aichapipash ung:uita cuyari. Shina rurajpica, ¿nachu candaca cambaj ñaupajpillata nalicachishpa, nali shimicunata riman?— nircami.

⁶Shina nijpimi Mandaj Diosca, Satanastaca cashna nirca: —Ricui, paica cambaj maquipimi. Shina cajpipash, paipaj causaitalla ama tacaringui— nircami.

⁷Shina nijpi Mandaj Diospaj ñaupajmanda Satanás rimashpami, Job runagutaca chaqui pundamanda, uma coronacaman jatun nali carachahuan chugrichirca.

⁸Shinamandami Job runaguca, uchufapi tiarishpa, callana faquita japishpa aspirijurca.

⁹Chaita ricushpami paipaj huarmica, cashna nirca: —¿Cunangamanllu Diosta cazujunguilla? Taita Diosta nalicachishpa rimashpa, huañushpachari ali canguiman— nircami.

¹⁰Shina nijpimi Job runaguca, cashna nirca: —Canga, maijambash muspa huarmicunashnami parlangui. ¿Taita Diosmandaca, alitallachu japina canchi? ¿Nachu ima llaquicunatapash, chasquinalla canchi?— nircami. Chai tucui llaquicunata apajushpapash, Jobca paipaj shimihuanga na juchata rurarcachu.

¹¹Job runagupaj ali cumba quimsa runacunaca, shujca temanita nishca Elifaz shutimi carca. Caishujca, suhita nishca Bildad shutimi carca. Chaishujca, naamatita nishca Zofar shutimi carca. Paicunaca, Job runaguca chai tucui llaquitami apajun nijta uyashpami, paicunapaj llactacunamanda shamunajurca. Paicunapash llaquilla cajta ricuchishpa, Job runaguta cushichingapajmi, quimsandi tandanajushpa shamungapaj yarinajushca carca.

¹²Chai runacunaca, carumanda vichai ricushpaca na rijsinajurcachu. Shinamandami, ninanda caparishpa huacanajurca. Shinallata paicunapaj jahualla churajunatapash liquishpami, quimsandillata paicunapaj uma jahuaman alpata chafsinajurca.

¹³Chashna jatun nanaihuan tiajujta ricushpami, maijambash na imata rimashpa, canchis punllata, canchis tutata pai tiajuj lado alpapi tianajurcalla.