Read Imbabura Highland Quichua JOB 20 Bible Online

JOB 20 - Imbabura Highland Quichua bible

JOB 20

¹Naamatita nishca Zofar shuti runaca, cashna nishpami tigrachirca:

²“Ñuca yuyaicunapachami tigrachishpa rimachigrihuan. Shinamandami, ucha rimangapaj munani.

³Ñucata nalicachishpa rimajtami uyashcani. Shinamandami, ali yuyaita charij ñuca espirituca, ñuca imashna tigrachinata yarichijuhuan.

⁴Cai pachapi runata churashca punllamandapacha, chashna cajtaca, ¿nachu yachangui?

⁵Nalita ruraj runacunapaj cushijunaca, ñapash tucurinllami. Diosta na manllaj runapaj cushijunapash ashallami.

⁶Jahua pachaman chayajta jariyashpapash, paipaj uma fuyucaman chayana cashpapash,

⁷pai mapayachishca huanushnallatami, chingaita chinganga. Paita ricushcacunapash: ‘Paica, ¿imata tucushca?’ ninajungami.

⁸Muscuishnalla chingangallami, paitaca napacha tari ushangachu. Muscuipi imatapash tuta ricushcashnami chingangalla.

⁹Paita ricujcunaca ima horapash, na ashtahuan ricungachu. Pai maipi causashca pushtupash, paitaca na ashtahuan ricungachu.

¹⁰Paipaj huahuacunaca, imagutapash na charijcunatarami mañanajunga. Paipaj maquillatami, pai imata shuhuashcatapash tigrachinga.

¹¹Paipaj tullucunaca, shinllira cashpapash, ashtahuangarin paihuanllatami ñutu alpapi sirijunga.

¹²Nalicunatara paipaj shimipi mishquichishpami, jallu ucupilla pacalla charijushcanga.

¹³Alimi yashpa na shitashpami, ashtahuangarin paipaj shimi ucupilla charijushcanga.

¹⁴Shina rurashca cajpica, paipaj vijsa ucupimi, chai micunaca shuj tigranga. Paipaj vijsa ucupica, millai culebrapaj jayajshnami tucunga.

¹⁵Ashtaca charishcacunata langashca cashpapash, shungu tigrachingami. Paipaj vijsa ucumandaca, Taita Diosmi llujchinga.

¹⁶Millai culebrapaj venenotami chupanga, culebrapaj jallumi huañuchinga.

¹⁷Jatun larca yacucunatapash, jatun yacucunatapash, ninanda jatarij huaicu yacucunashna llujshijuj balun mishquitapash, lechetapash na ricungachu.

¹⁸Pai imatalla rurashcamanda, ima alicunata japijushcataca cutinmi tigrachinga. Chaicunataca na langashpa cushijungachu.

¹⁹Imagutapash na charijcunata llaquichishpa, jichushpa saquishpami, napash huasichishpata, quichushpalla huasiyu tucushca.

²⁰Shinamandami paipaj vijsapica, napacha jundachinga. Ninanda munashpa, imata pai charishcatapash, napacha quishpichi ushangachu.

²¹Paica, imatapash na puchuchishpami, tucuillata micurca. Shinamandami pai imatalla charishcacunapash, na unaicaman tianga.

²²Yapata charijyashca punllapimi, llaquicuna quichijimunga. Jatun nalita runacuna tucuilla shamushpami quichunajunga.

²³Paipaj vijsapi jundachingapaj tiajujpimi, Taita Diosca nina japirinshna pai fiñarishcataca, paipaj jahuapi cachamunga. Chaitaca paipaj jahuapipash, paipaj micuna jahuapipashmi tamiachimunga.

²⁴Jirruta rurashca macanajunacunamanda pacajushpa calpajujpipash, bronce arcohuanmi, ñaupajman yalijta chugrichinga.

²⁵Paipaj cuerpotaca flechami, tujsishpa llujshinga. Punchapamba flecha pundami, paipaj jayajta chaupishpa llujshinga. Jatun manllaicunapashmi, paitaca japinga.

²⁶Pai imatalla charishcacunapaca, yana yana tutacunami alichishca tiajun. Na fucushpa japichishca ninami tucuchinga. Paipaj carpapi imalla tiajtapashmi tucuchinga.

²⁷Jatun nalita pai rurashcataca, jahua pachami ricuchinga. Paita llaquichingapaca, cai pachami jataringa.

²⁸Paipaj huasipi tiaj retoñocunaca, apai tucungami. Pai ninandapacha fiñarishca punllapica, caita chaitami shitai tucunajunga.

²⁹Taita Diosca, paita na manllaj runapaca, chaicunatami alichishca charijun. Taita Diosca, paipaj shimihuanmi, runa japinataca señalashcalla charijun” nijurcami.