Read Imbabura Highland Quichua JOB 21 Bible Online

JOB 21 - Imbabura Highland Quichua bible

JOB 21

¹Shinamandami Job runaguca, cashna nishpa tigrachirca:

²“Ñuca rimashcata ali uyaichi. Cai rimashcata uyashpami, ñucata cushichihuanguichi.

³Ñuca rimashcataca, upalla uyahuaichilla. Ñuca rimashca jipara, nalicachishpa asinguichi.

⁴Ñucaca, ¿maijambash shuj runatachu aij nishpa rimajuni? Shina cashpaca, ¿imashpata ñuca shungupica, na llaquirishayari?

⁵Ñucata ricushpa manllarichiyari. Shimita maquihuan quilparichiyari.

⁶Yarishpaca ñucallatapashmi, ninanda manllarini. Chaita yarishpami, ñuca cuerpopash chujchushpa manllarini.

⁷¿Imashpata Diosta na manllajcunara causanajunlla? Rucuyashpapash, ashtahuanmi charijyan.

⁸Paipaj miraicunaca, paipaj ricuipica, shinllitapachami viñanajun. Paipaj nietocunapash, paipaj ladopimi causanajun.

⁹Paipaj huasicunapipash, ima manllaimandapash quishpirishcami. Paicunataca, Taita Diospash na llaquichinllu.

¹⁰Paipaj jari huagracuna puñushpaca, na yangalla puñunllu, chichuchinllami. Huarmi huagracunapash na shullushpa, ali huahuacunatallami huachan.

¹¹Paipaj uchilla huahuacunaca, ashtaca llamacunashnami llujshinajun. Paipaj churicunaca, fahuashpa fahuashpami purinajun.

¹²Paicunaca uchilla tamborta, citarata tocashpami fahuanajun. Gaitata tocashpami cushijunajun.

¹³Tucui punllacunami, imapipash ali llujshin. Casilla aliguta huañushpami, Seolman urai rinajun.

¹⁴Taita Diostaca, cashna nishpami rimanajun: ‘Ñucanchimanda anchuri. Can imatalla rurachun mandashcata yachangapaca, na munanchichu.

¹⁵Tucui Ushaita Charij Diosta servingapaca, ¿pitayari? ¿Paita mañashpaca, imatashi japishun?’ ninajunmi.

¹⁶Ricuichi, Dios carashca alicunaca na paicunapaj maquipichu. Amalla ñucaca, Diosta na manllajcunashna yarijusha.

¹⁷¿Mashnacamanllari, Diosta na manllajcunapaj lamparapash huañuchi tucumbash? Paicunataca, llaquicuna japinllami. Taita Dios ninanda fiñarishpami, nanaicunata caiman chaiman cachamun.

¹⁸Paicunaca, huaira apanalla jupashnami canga. Jatun acapanahuan apai tucunalla jupashnami canga.

¹⁹Paicuna ninanda llaquichishcamandami, llaquicunata paicunapaj huahuacunaman Taita Diosca alichinga. Paicuna yachachunmi, paicuna japina cashcata cunga.

²⁰Paipaj llaquitaca, paipaj ñavihuambachami ricunga. Tucui Ushaita Charij Dios ninanda fiñarishpa cachamushcataca ufiangapachami.

²¹Paipaj causai quillacunata fitijpi, pai huañushca jipaca paipaj huasipica paica, ¿ima cushijuitashi charinga?

²²¿Taita Diostaca, ali yachaita pipash yachachi ushangachu? Jatun tucushcacunatapash, paimi ricushpa llaquichinga.

²³Paica, juyailla shinllipacha cashpallatami, aliguta casilla causashpa, imatapash na manllashpa huañunga.

²⁴Paipaj funducunapash, leche jundami canga. Paipaj tullucunapash, ñutuju talirijujmi canga.

²⁵Ashtahuangarin caishujca, manllanayai llaquita apashpami huañunga. Paica, ima horallapash na mishquilla micushpallatami huañunga.

²⁶Shina cashpapash, ishcandillatami ñutu alpapi pambai tucushpa siringa. Ishcanditallatami, jurucuna quilpanga.

²⁷Ricuichi, ñucaca canguna imatalla yarinajujtaca yachanimi. Ñucata fiñashpa juchachingapaj, yarinajujtaca yachanimi.

²⁸Cangunaca, cashnami ninguichi: ‘Mandaj runapaj huasica, ¿imata tucushcayari? Diosta na manllajcuna causanajushca carpaca, ¿maipitayari?’ ninguichimi.

²⁹Cangunaca, ñanda yalijcunataca, ¿nachu tapushcanguichi? Paicuna imatalla tigrachijtaca, ¿nachu yachashcanguichi?

³⁰Dios tucuchijui punllapi nalita ruraj runa pacai tucunatapash, ¿nachu tapushcanguichi? Paicunaca, Dios ninanda fiñarishca punllapica, alichi tucungami.

³¹Maijanda pai nalita rurashcataca, ¿ñavipi ricuchingayari? Pai imatalla rurashcamandaca, ¿pita japina cashcata cunga?

³²Paica, pambana utujumanmi apai tucunga. Paita pambashca alpa mundun jahuapimi pacarinajunga.

³³Paipaca, sirina pugru pamba alpapica, mishquillagumi canga. Paita catishpami, tucui runacuna apai tucunajunga. Paita ñaupashpaca, na cuentai ushanalla ashtacacunami rishca.

³⁴Ñucataca, ¿imashpata yanga cushichihuanguichi? Canguna tigrachishca shimicunaca, umachingapajllamari” nijurcami.