Read Imbabura Highland Quichua JOB 22 Bible Online

JOB 22 - Imbabura Highland Quichua bible

JOB 22

¹Temanita nishca Elifaz shuti runaca, cashna nishpami tigrachirca:

²“¿Runaca, Taita Diosman ima alitapash apamungachu? Na chashnachu, ashtahuangarin alipacha yachajushca cashpapash, paipajllatami ali canga.

³¿Can imatapash cashcatapacha ruraj cashcamandachu, Tucui Ushaita Charij Diosca cushijunga? Na cashpaca, can ¿ima pandatapash na ruraj cashcamandachu, ima alitapash japinga?

⁴¿Chaimandachu candaca llaquichijun? ¿Na cashpaca, can paita manllaj cajpichu, imata rurashcatapash canhuan randimanda ricungapaj shamun?

⁵Can nalicunata rurashcacunaca, jatun nalipachami. Can nalita rurashcacunaca, na tucuringachu.

⁶Cambaj huauquicunataca, yangamandami prendata quichurcangui. Churajunata na charijcunapaj churajunatapashmi quichurcangui.

⁷Shaijushca runa yacuta ufiachumbash na cararcanguichu. Yarjachij runamambash, micunata na cararcanguichu.

⁸Ashtahuangarin ninan ushaita charij runallami, alpataca japirca. Alicachi tucushca runaca, chaipimi causajurca.

⁹Sapalla mamagucunatapash, chushaj maquitami tigrachircangui. Taita mama illaj huahuacunatapash, rigrata faquinshnami irquiyachircangui.

¹⁰Shinamandami cambaj muyundipica, lazucuna tiajun. Chaicunami, cungashcapi ñapash tucuchishpa manllachin.

¹¹Na cashpaca, can ama ricuchunga, yana yana tutami quilpanga. Ashtacapacha yacumi, candaca quilpajun.

¹²Taita Diosca, ¿nachu jahua pacha jahuaman tiajun? Ricui, paita quilpaj luzerocunapash jahua jahuapimi tianajun.

¹³Chaita ricushpami, canga cashna ningui: ‘Taita Diosca, ¿imata yachangayari? Yana tutapica, ¿imashnata ricushpa llaquichingayari?

¹⁴Fuyu muyundi quilpashcapica, na ricungachu. Jahua pacha muyunditallami purijun’ ninguimi.

¹⁵¿Jatun nalita ruraj runacuna purishca, punda ñandallatachu cambash catingapaj munangui?

¹⁶Paicunaca, nara punlla pactajpillatami huañunajurca. Callaripi churashca rumicunandi, jatun yacu apashcashnami tucunajurca.

¹⁷Paicunaca, Taita Diostaca: ‘Ñucanchimanda anchuri’ ninajurcami. Tucui Ushaita Charij Diosca, ¿paicunataca imatashi rurarca?

¹⁸Paicunapaj huasicunapimi, ashtaca charishcacunata jundachishca carca. Ashtahuangarin amalla ñucapash, paicunashna yarijusha.

¹⁹Imatapash cashcatapacha rurajcuna ricushpaca, cushijungami. Ima nalitapash na ruraj runaca, asishpami cashna nijunga:

²⁰‘Ñucanchita fiñajcunaca, tucuchi tucushcamari. Paicuna imatalla charishcacuna puchushcatapash, ninami rupachishpa tucuchishca’ nijungami.

²¹Cunanga, paihuan ali tucuyari. Shina rurashpami, casilla ali causaita charingui. Paimandallatami, ima alipash cambajman shamunga.

²²Cunanga, paipaj shimihuan mandashcata chasquiyari. Paipaj shimicunataca, cambaj shungupi alichiyari.

²³Tucui Ushaita Charij Diospajman tigrarishpaca, cutinmi shayachi tucungui. Cambaj carpamandapash, tucui llaquitami anchuchingui.

²⁴Canga orotaca, alpatapash yalimi charingui. Ofir shuti llactamanda orotapash, yacu huaicu rumicunatashnami charigringui.

²⁵Tucuita Rurai Ushaj Diosmi, canmandaca shayaringa. Culquitapash, ashtacatami charingui.

²⁶Shina charishpami, Tucui Ushaita Charij Dioshuan cushijungui. Taita Diostaca, cambaj ñavihuambachami vichai ricungui.

²⁷Can paita mañajpica, paica uyangallami. Cambash, paiman imatalla carashapachami nishcataca pactachinguimi.

²⁸Can imata ruranata yarishcapash, chashnapachami llujshinga. Can purina ñangunapipash, michami punchayachinga.

²⁹Maijan pingaichi tucushca cajpipash: ‘Canga, jatunyachi tucunguimi’ ninguimi. Na jariyajcunataca, Taita Diosmi quishpichinga.

³⁰Ima nalitapash na ruraj runataca, paimi quishpichinga. Cambaj maquihuan imatapash na rurajpimi, paica ima llaquimandapash cacharichinga” nijurcami.