Read Imbabura Highland Quichua JOB 23 Bible Online

JOB 23 - Imbabura Highland Quichua bible

JOB 23

¹Jobca, cashna nishpami tigrachirca:

²“Cunambashmi, llaquilla rimagrini. Ñuca huacaitapash yalimi, ñuca carachataca nanajun.

³¡Taita Dios maipi cajta pipash villajpica, ñucaca pai tiajuj ñaupajmanmi riman!

⁴Paipaj ñaupajpimi, ñuca imatalla villangapaj munashcataca villaiman. Ñuca shimihuanga, imatapash nijuimanllami.

⁵Pai imatalla tigrachijpica yachaimanmi. Pai imatalla nishcatami yuyaipi japiman.

⁶¿Ñucataca, shinllita rimashpachu tigrachinman imashi? Na chashnachu canman, ashtahuangarin paica uyahuanmanllami.

⁷Imatapash cashcatapacha ruraj runaca, chaipimi paihuan yuyaita japinman. Juezpaj ñaupajmanda pacajushpa rishpaca, cutinga na ricurimanllu.

⁸Ricuichi, indi llujshimuj ladoman rishpapash, paitaca napacha tarishachu. Indi huashajuj ladoman rishpapash, napacha tuparishachu.

⁹Paipaj ushaita jahua ladoman ricuchijpipash, na ricushachu. Urai ladoman pacajpipash, na ricushachu.

¹⁰Ashtahuangarin paica ñuca causaitaca, tucuitami rijsin. Pai, ñucata imata rurashpa ricujpipash, oroshnami ricurisha.

¹¹Ñucaca, pai sarushcapimi catijurcani. Paipaj ñandaca aliguta catijushpami, napacha anchurircani.

¹²Paipaj shimihuan mandashcamandaca, ima horaspash na anchurircanichu. Paipaj shimicunataca, ñuca micunatapash yalimi yariajlla causajurcani.

¹³Ashtahuangarin pai imatapash rurangapajpacha munashcataca, ¿pita shujman tigrachi ushangayari? Pai imata rurangapaj munashcataca rurarcallami.

¹⁴Paica, ñucata imatalla rurangapaj munashcataca pactachingami. Paica chashna ruranacunataca, ashtacatami charin.

¹⁵Chaimandami ñucaca, paipaj ñaupajpica ninanda manllarini. Pai imashna cajta yarishpacarin, chujchunimi.

¹⁶Taita Diosmi, ñuca shungupica manllachihuarca. Tucui Ushaita Charij Diosmi, ñucataca muspachihuarca.

¹⁷¿Imashpata yana yana tutapillata na huañurcani? ¿Imashpata ñuca ñavica, yana tutahuan na quilpai tucurca?