Read Imbabura Highland Quichua JOB 24 Bible Online

JOB 24 - Imbabura Highland Quichua bible

JOB 24

¹Tucui Ushaita Charij Diospaca, huatacunapash na pacallachu. ¿Imashpata paita rijsijcunaca, paipaj punllacunataca na ricun?

²Huaquingunaca, alpa mujungunatami suchuchin. Huagracunatapash, shuhuashcatami michinajun.

³Taita mama illaj huahuacunapaj burrotapash apanllami. Sapalla mamagupaj huagratapash, prenda japishpami apan.

⁴Imagupash illajcunatapashmi, ñanmanda calpachin. Llactapi causanajuj imagutapash na charijcunaca, paicunata manllashpami pacajunajun.

⁵Ricuichi, jichushca pambacunapi causanajuj sacha burrocunashnami, narapash punllayajpillata shuhuangapaj rinajun. Paicunapaj huahuacunapash, jichushca pambacunapi imapash tiajcunatallami micunajun.

⁶Paicunaca, pambacunapimi imapash micunacunata tandachinajun. Diosta na manllajcunaca, shujcunapaj uvas chagrapimi pallajunajun.

⁷Churajuna illajtapash, lluchulla puñuchun saquinllami. Chirimanda maipi pacajunatapash, na charinllu.

⁸Shinamandami, urcu paramupash mutiyachin. Chirimanda quilparina illajpimi, jatun rumicunata ugllarinajun.

⁹Taita illaj huahuacunatapash, paicuna chuchunatami quichunajun. Imagutapash na charijcuna cajpitami, prendata quichunajun.

¹⁰Churajuna illajtaca, lluchullatami purichun saquinajun. Yarjaichishpa causajcunapaj gavillashca granotapashmi quichunajun.

¹¹Paicunaca, paicunapaj pata ucucunapillami, aceiteta capinajun. Uvasta sarujcunapash, yacunaimandami huañunajun.

¹²Yarjaimanda huañunajuj gentecuna cai pueblomandapachami, caparishpa huacanajun. Chugrihuan huañunallacunatapash, tucui shungumi caparinajun. Ashtahuangarin Taita Diosca, paicuna mañanajujtaca na uyanllu.

¹³Paicunaca, michatapash na ricunayachijcuna cashpami, chai ñandaca, ima horapash na rijsinajurca. Diospaj ñandaca, ashatallapash na catinajurcachu.

¹⁴Huañuchij runaca, punchapamba punllapimi, imagutapash munashpa causaj, imatapash na charij runaguta huañuchingapaj jatarin. Tutapica shuhuashnami purin.

¹⁵Cazarashca jahua shujcunahuan causaj runaca, tutayajtami ricuriajun. Paica: ‘Pipash ñucataca, na ricuhuangachu’ yashpami, ñavita quilparishpa llujshin.

¹⁶Shuhuaca, punlla ricushpa saquishcataca, yana yana tutapimi shuhuan. Paica, michataca na rijsinllu.

¹⁷Tucui paicunapaca, punllayashpa pacarinaca, huañui japinalla llandushnami. Paicunata pipash rijsijpica, huañui japinalla llandushnami, nina manllai japin.

¹⁸Ninanda jatarij yacushnami ucha calpashpa pacajunajun. Paicuna charishca alpacunapash, chai llactapica ninanda nalicachi tucushcami. Paicunapaj uvas chagra chaupitaca, na purinajungachu.

¹⁹Tamia pascarijpi ninanda rupashpami, rasutaca yacuyachin. Juchayu ruranacunataca, Seolpash chashnallatami tucuchinga.

²⁰Paicunataca, unguj mamapash cungangami. Jurucunallami, paicunataca mishqui mishquita micunga. Paicunataca, ima horallapash na yarinajungachu. Diosta na manllajcunaca, quiruta urmachijpishnami tucuchi tucunajunga.

²¹Huahuata ungunata na yachaj, na vijsayu tucuj huarmitami llaquichijurca. Sapalla mamagumambash, ima horallapash ima alitapash na rurarcachu.

²²Ashtahuangarin ninan shinllicunataca, paipaj ushaihuanmi pushajurca. Dios shayarijpica, pipash napacha causai ushanllu.

²³Diosca, imatapash na manllashpa, paita yariajlla causana yuyaitami cun. Paipaj ñavica, paicuna imashna purijtami ricuriajun.

²⁴Ashatallami alicachi tucunajurca, ashtahuangarin chingarcallami. Tucui shujcunashnallatami, ñavita urai cumuchi tucunajun. Paicunaca, vichai tucushpami, cebada umashna fiti tucunajunga.

²⁵Na chashna cana cajpica, ¿pita cunanga, ñucataca llullami ningayari? Na cashpaca ¿pita ñuca shimicunataca, yangallami ningayari?” nijurcami.