Read Imbabura Highland Quichua JOB 26 Bible Online

JOB 26 - Imbabura Highland Quichua bible

JOB 26

¹Job runaguca, cashna nishpami tigrachirca:

²“Ushaita na charij runataca, ¿imahuanda ayudarcangui? Ushai illaj rigrataca, ¿imashnata ayudarcangui?

³Imatapash na yachajushca runamanga, ¿ima ali yuyaitata curcangui? ¿Ima alipacha yachajunatata rijsichircangui?

⁴Cambaj shimicunataca, ¿pimanda villashcangui? ¿Canmanda llujshijuj samaica pipajta?

⁵Huañushcacunapaj almaca, cai pacha alpa ucupimi chujchujun. Mama cucha yacucunapash, chaipi imalla tiajcunapashmi chujchunajun.

⁶Paipaj ñaupajpica, Seolpash ricunallami. Abadonbash, na imahuambash quilpashcachu.

⁷Paica, jahua ladoman tiaj jahua pachataca chushajpimi churarca. Cai pachataca, imapillapash na huarcurcachu.

⁸Yacucunataca, paipaj fuyupimi huatarca. Chai tucui yacucunahuan cashpapash, fuyuca na liquirinllu.

⁹Paimi, pai mandangapaj tiarinataca pacan. Chai tiarina jahuapica, paipaj fuyutami churan.

¹⁰Maicamanlla yacucuna tiachumbash, paimi linderota churarca. Michapash, yana yana tutapash tucurina manñacamanmi, yacucunataca churarca.

¹¹Pai jarcashpa rimashcata uyashpaca, jahua pachata charij pilarcunapashmi ninanda manllarishpa chujchun.

¹²Paipaj ushaihuanmi, mama cuchatapash cuyuchijun. Paica, alipacha yachajuita charishpami, manllanayaita yacu jatarijpipash jarcan.

¹³Paipaj Espirituhuanmi jahua pachataca, juyaillata rurarca. Paipaj maquihuanmi, quingushpa purij culebratapash rurarca.

¹⁴Ricuichi, cai rurashcacunaca ashata callaricunallami. ¡Paimanda parlajtaca, asha ashallami uyashcanchi! Ashtahuangarin culun nichij paipaj jatun ushaitaca, ¿pita yachai ushangayari?” nijurcami.