Read Imbabura Highland Quichua JOB 27 Bible Online

JOB 27 - Imbabura Highland Quichua bible

JOB 27

¹Job runaguca, punda villashcata yarichishpaca, cashnami nijurca:

²“Ñuca japinata quichuj Taita Diosca causajumbachami. Ñuca almata llaquichij, Tucui Ushaita Charij Diosca causajumbachami.

³Ñuca alma ñucapi tiashca punllacunacaman, Taita Dios cushca samai ñuca singapi tiashcacamanga,

⁴ñuca shimihuanga, napacha ima nalitapash rimashachu. Ñuca jallupash, umachij shimicunataca, napacha rimangachu.

⁵Cangunataca, ima juchachinapash illajmi canguichi ninaca, ima horaspash ama chayachun. Ashtahuangarin huañungacamanmi, ñucaca ima pandatapash na rimasha.

⁶Imatapash cashcatapacha ruranataca chaririajunimi, napacha cacharishachu. Ñuca causai tucui punllacunapica, ñuca shunguca napacha juchachihuangachu.

⁷Ñucata fiñaj runaca, Diosta na manllaj runashna cachun. Ñucata na ricunayachij runapash, nalita ruraj runashna cachun.

⁸Taita Dios causaita quichujpica, imatalla ninanda shuhuashca cashpapash, Diosta na manllaj runaca, ¿imatashi shuyanga?

⁹¿Paita jatun llaqui japijpi, ninanda capashpa pai mañajtaca Taita Diosca uyangachu?

¹⁰¿Paica, Tucui Ushaita Charij Diosmandaca cushijungachu? ¿Paica, Taita Diostaca tucui punllacuna mañajungallachu?

¹¹Taita Diospaj maquihuan imatalla rurajtaca, ñucami cangunaman ricuchisha. Tucui Ushaita Charij Dios imata yarijujtaca, na pacashachu.

¹²Uyaichi, cangunaca tucuicunami ricushcanguichi. ¿Imashpata yapapacha yangacuna tucunguichi?

¹³Diosta na manllaj runaman cunatallata Taita Dios cunapash, nalita rurashpa llaquichijcuna Tucui Ushaita Charij Diosmanda japinapash caicunami:

¹⁴Paipaj huahuacuna ninanda mirashpaca, espadapi huañuchi tucungapajllami canga. Paipaj uchilla huahuacunapash, napacha vijsa pactajta micunajungachu.

¹⁵Pai puramanda huaquin puchushcapash, ñapash huañushpami pambai tucunga. Sapalla quedaj huarmicunapash, paicunamandaca na huacanajungachu.

¹⁶Ñutu alpatashnami, culquitaca mundunanga. Churajunacunataca, turutashnami ashtacata mirachinga.

¹⁷Pai chashna mirachishcataca, imatapash cashcatapacha ruraj runami churajunga. Ima nalita na ruraj runacunami, culquitapash chaupirinajunga.

¹⁸Paipaj huasipash, polilla huasichishcashnami canga. Cuidaj runa rurashca chugllashnami canga.

¹⁹Ninan charij runaca, puñungapaj siririshpaca, na cutin jataringachu. Ñavita pascajpica, imapash na tiangachu.

²⁰Manllanayai yacu shamujpishnami, jatun manllai japinga. Jatun acapana, tuta shamushpami urmachinga.

²¹Rupajlla huaira jatarishpami apanga. Ninan huairahuan tamia jatarishpami, pai tiajushca pushtumandaca anchuchinga.

²²Taita Diosca, pai nalita rurashcata na cungashpami, ninandapacha llaquichinga. Paica, Diospaj maquimandaca pacajungapajmi munanga.

²³Paita ricushpaca, maquitami huactarinajunga. Chai pushtumandallatami silbanajunga.