Read Imbabura Highland Quichua JOB 28 Bible Online

JOB 28 - Imbabura Highland Quichua bible

JOB 28

¹Culqui maimanda llujshina pushtutapash charimbachami. Orota rupachishpa yacuyachina pushtupash tianmi.

²Jirrutaca, ñutu alpamandami llujchin. Cobretaca, rumimanda surcushpami yacuyachin.

³Yana yana tutatapash tucuchinajunmi. Chaitaca, ucuta allashpami mascanajun. Chaica, manllanayai yana, huañui japinalla llandu ucupimi tian.

⁴Gentecuna causanajuj pushtumanda caruta rishpa, pipash na purij pushtucunapimi allashpa mascanajun. Shujcunamandaca carupimi, huarcurishpalla huairapi caiman chaiman cuyurinajun.

⁵Micunapash, alpamandallatami llujshin. Chai alpa ucupica, rupajuj ninami tian.

⁶Chai pushtupica, zafiro nishca rumicunapash, oropash, ñutu alpashnami tian.

⁷Chai ñandaca, alasyu animalca, ima horallapash na rijsircachu. Jatun angapash, na ricurcachu.

⁸Millai animalcunapash, chaitaca ima horasllapash na sarurcachu. Leonbash, chaitaca na yalircachu.

⁹Paipaj maquitaca, yacu rumi jahuapimi churarca. Urcucunatapash, sapimandami urmachirca.

¹⁰Jaca rumicunata faquishpami, jatun yacucunata llujchirca. Imalla juyaillacuna tiajtaca, paipaj ñavihuanmi ricurca.

¹¹Jatun yacutapash, maipi llujshijuj pushtupimi jarcarca. Pacallapi ima tiajujtapash, michamanmi llujchirca.

¹²Ashtahuangarin ali yachaitaca, ¿maipishi tariringa? Ali yachajuna pushtuca, ¿maipishi?

¹³Chai yachajuna mashna valishcatapash, runaca na yachanllu. Causaita charijcunapaj cai pachapica, ricuritapash na ricurinllu.

¹⁴Manllanayai ucu ucu yacuca: ‘Na ñucahuanllu’ ninmi. Mama cuchapash: ‘Ñucahuambash na canllu’ nircami.

¹⁵Chaitaca, orota cujpipash, na cunallachu. Pezashca culquita cujpipash, na jatunallachu.

¹⁶Chaitaca, Ofir shuti llactamanda orohuambash, punchapamba ónice nishca rumihuambash, zafiro nishca rumihuambash, na randi ushanallachu.

¹⁷Oropash, punchapamba diamante nishca rumipash, chaihuanga na chimbapurai ushanllu. Chaitaca, alipacha oromanda juyailla rurashcacunahuambash, na cambiai ushanallachu.

¹⁸Chai yachaimandaca coraltapash, perlastapash cushallami nitaca, na ushanachu. Ali yachaica, juyailla punchapamba rumicunatapash yalimi.

¹⁹Chaihuanga, Etiopía shuti llactamanda topacio nishca rumipash, na chimbapurai ushanllu. Alipacha orohuambash, na randi usharinllu.

²⁰Shina cashpaca, ali yachaica ¿maimandashi shamun? ¿Pai tiajuj pushtuca maipita?

²¹Causaita charijcunapaj ñavipica, pacallami chaica tiajun. Jahuata rij alasyu tucui animalcuna ricunamandapash pacallami.

²²Abadonbash, huañuipash: ‘Pai tucuipi rijsishca cajtaca, ñucanchi rinrihuambachami uyarcanchi’ ninajurcami.

²³Ali yachai maipi purijujtapash, maipi tiajujtapash, Taita Diosllami yachan.

²⁴Paica, cai pacha tucuri manñacamanmi ricujun. Cai pachapi imalla tiajtapash, tucuitami ricujun.

²⁵Paica, huairatapash pezashpa, yacucunatapash medishpami churarca.

²⁶Tamiatapash, imashna tamianata mandashpa, punchalla shitajcuna culun nishpa purichun, ñanda ricuchijushpaca,

²⁷paira ali ricushpami, tucuicunaman ricuchirca. Aliguta alichishpami, tucuicunaman ricuchirca.

²⁸Runataca, cashnami nirca: ‘Ricui, jatun Diosta manllanaca, ali yachaimi. Nalimanda anchurinaca, ali yuyaimi’ nishcami” nijurcami.