Read Imbabura Highland Quichua JOB 29 Bible Online

JOB 29 - Imbabura Highland Quichua bible

JOB 29

¹Job runaguca, punda villashcata yarishpami, cutinllata cashna nijurca:

²“¡Punda yalishca quillacunapishna maijambash tigrachishpachari ali canman! Taita Dios cuidajpi causajurcani, chashnallata causachun tigrachishpachari ali cahuanman.

³Chai horasca, paipaj lamparatami, ñuca uma vichaipi churashpa punchayachijurca. Yanapi cashpapash, chai michapimi purin carcani.

⁴Ñuca chairalla viñai cajpipash, Taita Diosca paipaj yuyaihuanmi, ñuca carpatapash cuidarian carca.

⁵Tucui Ushaita Charij Dios ñucahuan cajpica, ñuca huahuacunapash, ñuca muyundipimi causanajurca.

⁶Ñuca chaquitaca, lechehuanmi maillan carcani. Rumipash, jatun yacutashnami ñucapica aceiteta talin carca.

⁷Imata rurashcacunata ricungapaj, pueblo punguman llujshishpapash, ñuca tiarinataca, plazapimi alichin carcani.

⁸Chairalla viñaicuna ñucata ricushpaca, pacajujllami carca. Rucucunapash, tianajushcamanda jatarishpami shayarin carca.

⁹Mandajcunapash, imatallapash na rimai ushanllu carca. Ashtahuangarin maquihuanmi, shimita quilparinajuj carca.

¹⁰Alicachi tucushcacunapash, upalla tucunllami carca. Paicunapaj jalluca, shimi ucupimi llutarin carca.

¹¹Ñucata uyajcunaca: ‘Cai runaca cushijushcami’ ninajunmi carca. Ñucata ricujcunapash, ñuca imashna cajtami parlanajun carca.

¹²Imagutapash na charij runagu caparijujpica, ñucami quishpichin carcani. Taita mama illaj huahuaguta pipash na ayudajpica, ñucami ayudan carcani.

¹³Chingagrijuj runata ayudajpimi, ñucataca bendiciahuarca. Sapalla mamagu huacajujpipash, ñucami cushichin carcani.

¹⁴Ñucaca, imatapash cashcatapacha rurashcahuanmi churajunshna causarcani. Chaillatami ñucataca quilpahuarca. Aliguta ruranaca, jahualla churajunashna, umapi churana diadema nishcagushnami carca.

¹⁵Ñausapaca, ricujuj ñavishnami carcani. Chaqui faquirishcapaca, ali chaquishnami carcani.

¹⁶Imagupash illajcunapaca, taitashnami carcani. Imagutapash na yachai ushashpaca ñucamanmi, uchalla villanajun carca.

¹⁷Nalita ruraj runataca, juchu quirucunatami faquin carcani. Imatapash paicunapaj quiruhuan charijujtami cacharichin carcani.

¹⁸Ñucaca, cashnami yajurcani: ‘Ñuca tazimbillatami huañusha. Ñuca causai punllacunataca, t'iyu alpatashnami mirachisha’ yajurcanimi.

¹⁹Ñuca sapica, yacu manñapimi carca. Ñuca malquicunapica, jamzi paramu urmajujllami carca.

²⁰Ñucaca, cutin cutinmi alicachi tucujurcani. Ñuca arcotapash, ñuca maquihuanmi shinllita charijurcani.

²¹Ñucata uyangapajmi, shuyanajun carca. Ali yuyaita ñuca cujpica, upallami uyanajun carca.

²²Ñuca rimajpipash, na tigrachinajurcachu. Ñuca aliguta yarichishcapash, paicunapimi yacuyarca.

²³Ñucataca, tamiatashnami shuyanajun carca. Jipa tamiata shimi pascariaj shuyajunshnami, shuyanajun carca.

²⁴Paicunahuan ñuca asijpipash, na crinajurcachu. Punchapamba ñuca ñavitapash, na urai cumurichinllu carca.

²⁵Paicuna imalla rurashcataca, ñucami ricun carcani. Ñucaca paicunapaj chaupipimi, mandaj runashna tiarij carcani. Ñucaca, soldadocunata mandanshnami causajurcani. Huacajcunata cushichinshnami causarcani.