Read Imbabura Highland Quichua JOB 3 Bible Online

JOB 3 - Imbabura Highland Quichua bible

JOB 3

¹Chai jipami Job runaguca, pai huacharishca punllata ninanda nalicachishpa rimarca.

²Job runaguca caparishpami, cashna nijurca:

³“Ñuca huacharishca punllapash tucurishca cachun. ‘Jari huahuatami ungushca’ nishpa, villashca tutapash chingashca cachun.

⁴Chai punllapash, llandu llandu cachun. Chai punllataca, Taita Diospash jahua pachamanda na quedashpami ali canman. Chai punllataca punchayachijpash, na punchayachishpami ali canman.

⁵Nali punlla, yana yana tuta tucushpa, huañuchij llandu tucushpa, yana fuyu quilpashpachari ali canman. Yana llandu punllatashna manllanayaita rurashpachari ali canman.

⁶Chai tutataca, yana tutalla charijushpachari ali canman. Ñuca huacharishca chai punllapash, huatapaj punllacunapica, na tiajushpachari ali canman. Shinallata quillacunapipash, na tigrajushpachari ali canman.

⁷¡Chai tutapi ñuca na huacharishca cajpica, chai tutaca imata candanapash, na tianmanllu carca!

⁸Chai punllataca, punllata fiñajcuna, Leviatán nishca manllanayai animalta rijchachijcuna, nalicachishpaca alimi canman.

⁹Pacarij luzerocunapash, yanayashpaca alimi canman. Punchayachijta shuyajujpipash, ama punchayachishpaca alimi canman. Pacarishpa punchayachijta na ricurishpaca alimi canman.

¹⁰Ñuca tiajushca, ñuca mamapaj vijsata na vichashcamanda, tucui cai llaquicunata ñuca ama ricuchun na pacashcamanda, chashna tucushpami ali canman.

¹¹Ñucaca, ¿imashpata na vijsapillata huañurcaniyari? Na cashpaca, ¿imashpata huacharishcandi na huañurcaniyari?

¹²Ñucataca, ¿imashpata cunguripi japinajurcayari? ¿Imapajta chuchuchihuarcayari?

¹³Huañushca cashpaca, cunanga samajuimanmi carcani. Puñushca cashpaca, samanatami chariman carcani.

¹⁴Cai pachata jatun mandajcunahuan, paicunaman yuyaita cuj runacunahuanmi samajuiman carcani. Paicunaca, urmashca huasicunatami, paicunapaj cachun alichinajun.

¹⁵Na cashpaca orota charij mandajcunahuan, culquita huasipi jundachij runacunahuanmi samajuiman carcani.

¹⁶¿Imashpata na shullushca huahuatashna, punllata nara ricuj huahuatashna na chingachihuarcayari?

¹⁷Huañushpami, Diosta na manllajcunaca, shujcunata pandachinata saquin. Shaijushca, ushai illajcunapash, chaipimi samanajun.

¹⁸Prezucunapash, chaipimi samanajun. Chaipica, imatalla ruranacunata ricushpa mandajcuna caparishcatapash na uyanajunllu.

¹⁹Uchillapash, jatumbash chaipillatami. Servishpa causajpash, chaipica amopaj maquimanda cacharishcami.

²⁰¿Imashpata llaquihuan shaijushca causajuj runamanra, punchapamba punllata ricuchinyari? ¿Imashpata yuyaipi llaquilla causajmanra causaita cunyari?

²¹Paicunaca huañuitami shuyajun. Shina cajpipash, huañuica na chayamunllu. Juyailla charinacunata yali mascajpipash, huañuica na japinllu.

²²Huañushpa pambai tucuna utujuman rishpaca, ninandapachami cushijun.

²³Taita Diosllata, corralashpa charijujpi, maita rinatapash na yachaj runamanga, ¿imapajta causaita curcayari?

²⁴Micunata micunapaj randica, jatunda llaquirinarami punda chayamuhuan. Aij nishpa llaquirishca shimicunaca, yacushnami calpajun.

²⁵Ñucata manllachij llaquillatami, ñucataca japihuashca. Ñuca manllashpa causashcapash, chashnallatami tucushca.

²⁶Casilla ali causaitaca, napacha chari ushashcanichu. Napacha cungashca samai ushashcanichu. Ashtahuangarin musparina llaquicunami shamuhuashca” nijurcami.