Read Imbabura Highland Quichua JOB 30 Bible Online

JOB 30 - Imbabura Highland Quichua bible

JOB 30

¹Ashtahuangarin cunanga, ñucamanda yali ashtahuan chairalla viñaicunami ñucataca asinajun. Paicunapaj taitacunataca, ñuca animalcunata cuidaj alcucunahuanllapash, na churaimanllu.

²Paicunapaj maquihuan shinlli tucushcapash, ¿ñucapaca imapajta ali canman? Paicunaca, ima ushaitapash na charinllu.

³Imagutapash na charijmanda yarjaimandami, paicunalla purinajurca. Chulunlla pushtuman, manllanayai yana yana pushtuman, llaquinayaita tucuchi tucushca, jichushca pambamanmi pacajushpa rinajurca.

⁴Chaquishca yura chaupicunapimi, malva yuracunata tandachinajurca. Cunungapajpash, enebro nishca yura sapicunatami pallanajurca.

⁵Gente puramandaca, llujchishpami shitai tucunajurca. Tucuicunami, shuhuata catinshna caparinajurca.

⁶Paicunaca, huaicu jaca manñacunapi, alpata utujushcacunapi, jaca rumi ucucunapimi causanajurca.

⁷Yura ucucunapimi caparinajurca. Casha ucucunapimi, tandanajun carca.

⁸Paicunaca, imapajpash na valij runacunapaj churicunami. Shutipash illaj runacunami. Paicunaca, alpa ucucaman cumuchi tucushcacunami.

⁹Cunanga, paicuna asishpa ricuna, yarichij shimicunata paicuna parlanallami cani.

¹⁰Ñucata millanayachishpami, ñucamanda anchurinajun. Ñuca ñavipipash t'ucanajunllami.

¹¹Taita Diosmi, paipaj huascata pascashpa astihuarca. Shinamandami ñuca ñaupajpica, cacharishcata rimanajurca.

¹²Ñuca ali ladopica, na cazuj ashtaca gentecunami jatarinajurca. Paicunami, ñuca chaquitaca t'anganajurca. Ñucata fiñashpami, chingachij ñangunata alichinajurca.

¹³Ñuca chaqui ñandapashmi huaglichinajurca. Ñuca llaquichi tucujta ricushpallami, chashna ruranajurca. Paicunahuan macanajungapaca, pipash na ayudahuarcachu.

¹⁴Ancho pungutashnami yaicumunajurca. Ñuca llaqui jahuapillatami, ashtahuan llaquichinajurca.

¹⁵Ñucata pandachingapajmi, chashna ruranajurca. Ñuca alicachi tucushcataca, huairashnami urmachinajurca. Ñuca ali causajushcapash, fuyushnami chingarca.

¹⁶Cunanga, ñuca almaca ñucapillatami, jicharinshna tucurijun. Llaquilla causana punllacunami japihuashca.

¹⁷Tutapash, ñuca tullucunataca utujunshnami saquirca. Ñuca nanaicunapash micujunshna, na samanllu.

¹⁸Ñucata ninanda llaquichishcami, ñuca aichataca maucayachijun. Túnica nishca jahualla churajuna, cuelloshnami sipijun.

¹⁹Paimi ñucataca, turupi urmachirca. Shinamandami ñutu alpashna, uchufashna cani.

²⁰Canda caparishpa mañajpipash, napacha uyahuanguichu. Cambaj ñaupajpi ricurijpipash, napacha ricunayachinguichu.

²¹Ninanda llaquichij runashnami, ñucapaca tucushcangui. Ninan ushaita charij cambaj maquihuanmi catiriajuhuangui.

²²Ñucataca, huairapimi jahuata cachahuarcangui. Ñuca causaitaca, tucuillatami yacuyachircangui.

²³Ñucataca, huañuiman pushajujtami yachani. Causaita tucui charijcuna rina huasimanmi pushajuhuangui.

²⁴Ashtahuangarin pambana utujuman ama richunga, paipaj maquihuan na jarcangachu. ¿Pai llaquichijujpica, huañushpa pambai tucushcacunaca, caparinajungachu imashi?

²⁵Ñucaca, llaquita apajmandaca, ¿nachu huacajurcani? Ñuca almapash, imagutapash na charijtaca, ¿nachu llaquirca?

²⁶Alita ñuca shuyajujpica, llaquirami shamurca. Michata shuyajujpipash, yana tutami shamurca.

²⁷Ñuca chunllulicunapash, na samashpa cuyurijunllami. Ñucataca, jatun llaqui punllacunami cungashcapi japihuashca.

²⁸Ñucaca, napash indi rupachijpitami, yanayashca purijuni. Tandanajuipipash jatarishpami, caparishpa villajurcani.

²⁹Ñucaca, chacal nishca animalcunapaj huauquishnami tucushcani. Avestruz nishca animalcunapaj cumbashnami tucushcani.

³⁰Ñuca aicha carapash, yanayashpami urmajun. Ñuca tullucunatapash, rupashpami raurajun.

³¹Ñuca arpaca, huañuipi tocana tonota tocanamanmi tigrashca. Ñuca gaitapash, yarishpa yarishpa huacanamanmi tigrashca.