Read Imbabura Highland Quichua JOB 31 Bible Online

JOB 31 - Imbabura Highland Quichua bible

JOB 31

¹Ñuca ñavihuanga, ima nalitapash ama ricungapajmi, ari nijurcani. Shina cashpaca, ¿imashpata jarihuan nara tacarishca cuitsataca ricushayari?

²Chaimandaca, ¿imatashi Taita Diosca jahua pachamanda carahuanga? ¿Tucui Ushaita Charij Diosca, jahua pachamandaca imata japinatashi carahuanga?

³Diosta na manllaj runata llaquichinaca, ¿nachu tian? Juchata rurajcunapaca, manllanayai llaquicunaca, ¿nachu tian?

⁴Diosca, ñuca imashna causajujtaca, ¿nachu ricujun? ¿Nachu ñuca chaqui sarushcacunata ricushpa, tucuillata cuentajun?

⁵Llullashpa purishca cajpipash, umachingapaj ñuca chaquihuan ucha rishca cajpica,

⁶imatapash cashcatapacha pezaj balanzapi, Taita Diosllata pezahuachunlla. Shina rurashpami ñucataca, ali cajta ricuhuanga.

⁷Ali ñanmanda caruyashca cajpipash, ñuca ñavi ricushcata, ñuca shungu munashca cajpipash, ñuca maquihuan ima nalita rurashca cajpipash,

⁸ñuca tarpushcacunataca, shujcuna micuchunlla. Ñuca tarpushcacunataca, fitishpa shitachunlla.

⁹Shuj huarmihuan ñuca shungupi umachi tucushca cajpipash, llaquichingapaj ñuca cumba runagupaj pungupi pacalla chapajushca cajpipash,

¹⁰ñuca huarmica, shujcunaman cutashpa causachunlla. Paihuanga, shuj jaricuna siririchunlla.

¹¹Jatun nali juchata ñuca rurashca cajpica, juezcunami llaquichihuanman carca.

¹²Chai juchaca, Abadón nishca ucupi rupachijuj ninashnami canman carca. Ñuca jazindatapash, tucuillatami rupachinman carca.

¹³Ñucata servij runapash, huarmipash, paicuna japina cashcata mañangapaj shayarijpi, yangapi churashpa na cushca cashpaca,

¹⁴paicunapaj randi Taita Dios shayarijpica, ¿imatashi ruraiman carcani? Pai imata tapujpipash, ¿imatashi tigrachiman carcani?

¹⁵Ñuca mamapaj vijsapi ñucata ruraj Diosca, ¿nachu paitapash Diosllata rurashca? ¿Nachu mamapaj vijsapica, Diosllata tucuicunata rurashca?

¹⁶Imagutapash na charij runacuna cushijunata ñuca jarcashca cajpipash, sapalla mamaguta huacachishpa, paipaj ñavita huaglichishca cajpipash,

¹⁷taita mama illaj huahuaman na carashpa, ñucalla micushca cajpipash, llaquichihuachunlla.

¹⁸(Ñuca, chairalla viñaimandapachami, paica paipaj taitahuanshna ñucahuan viñarca. Ñucaca, ñuca mamapaj vijsapi cashpallatami, sapalla mamaguta cuidangapaj tiajurcani).

¹⁹Churajuna illaj maijambash huañuchun ricushcalla cajpipash, imagutapash na charijtaca, jahualla churajuna illajta saquishcalla cajpipash, llaquichihuachunlla.

²⁰Chashna rurashcamanda na bendiciajpipash, ñuca llamacunapaj milmahuanmi cunujyachircani.

²¹Tandanajuna pungupi ñucata ayudana cajpilla, ñuca maquita alsashpa, taita mama illaj huahuaguta llaquichishca cajpipash,

²²ñuca huasha tullupash, ñuca rigra tullupash faquirichunlla.

²³Ñucaca, Taita Dios llaquichinatami manllarcani. Jatun Dioshuan chimbapurangapaca, ushaita na charimanllu.

²⁴Orota yariajlla causajushca cashpaca, orotaca: ‘Canda yariajllami causajuni’ nimanmi carcani.

²⁵Ñuca charishcacunata ninanda mirachishcamandalla, ashtacatapacha charishcamandapash na cushijurcanichu.

²⁶Indi punchapamba llujshijpipash, na cashpaca, luna juyailla cajtapash na ricurcanichu.

²⁷Chaicunataca ñuca shungupillapash, na pacalla mañarcanichu. Ñuca maquihuan muchashpapash, na ricuchircanichu.

²⁸Chashna nalita rurashca cashpaca, llaquichi tucuimanmi carcani. Jatun Diostami, cungaiman carcani.

²⁹Ñucata fiñaj runa llaquichi tucujpica, na cushijurcanichu. Paita llaqui japijpica, na asircanichu.

³⁰(Ñuca jalluhuanga, ima juchatapash na rimarcanichu. Paita llaqui japichumbash, na mañarcanichu).

³¹Ñucata servijcunapash: ‘¿Maijanda aichataca, amijta nara micunguichi?’ nishpaca, na tapunajurcachu.

³²(Shuj llactamanda purij runapash, na canllapi pacarinllu carca. Carumanda shamujcuna yaicuchunga, ñuca huasi pungupash pascashcami carca).

³³Na cazushpa ima nalicunata rurashcatapash, shujcunashnaca na pacarcanichu. Ñuca nalita rurashcataca, ñuca shungupillapash na pacarcanichu.

³⁴Ashtaca gentecunata manllashpalla, ñuca familiacuna fiñanata manllashpalla, ñuca huasi ucupi na upalla tiajurcanichu.

³⁵¡Ñucata pipash uyashpachari, ali canman! Ricuichi, ñucata fiñaj runa juchachijpipash, Tucui Ushaita Charij Dios ñucamanda villanatami shuyajuni.

³⁶Chaitaca, ñuca rigrapimi apaiman. Coronatashnami, umapi ali churajuiman.

³⁷Ñuca imatalla rurashcacunataca, tucuitami Diosman villaiman. Mandajshnallami, paipaj ñaupajpica ricuriman.

³⁸Ñucata fiñashpa ñuca alpacuna caparishca cajpipash, huachushca pambacuna tucuilla huacashca cajpipash,

³⁹ima fucushcatapash, na randishpata micushca cajpipash, na cashpaca chai alpa dueñocunapaj shunguta llaquichishca cajpipash,

⁴⁰trigo viñangapaj randica, nali jihuacunara viñachunlla. Cebadapaj randica, cashacunara viñachunlla” nijurcami. Job rimashca shimicunaca, caipimi tucurin.