Read Imbabura Highland Quichua JOB 33 Bible Online

JOB 33 - Imbabura Highland Quichua bible

JOB 33

¹Shinamanda cunanga Job, aliguta yarishpa ñuca rimashcata uyahuai. Ñuca rimashcataca, tucuita ali uyahuai.

²Ricui, cunanga ñuca shimita pascashpami rimagrini. Ñuca cungapi tiajuj jallumi rimagrin.

³Aliguta ñuca yarishca yuyaicunami, ñuca shungupi alita yarishcataca ricuchinga. Ñuca shimica, imatalla yachashcatami, na llullashpa rimagrin.

⁴Ñucataca, Diospaj Espiritumi rurahuarca. Tucui Ushaita Charij Diospaj samaita fucushpami, causaita cuhuarca.

⁵Can tigrachi ushashpaca, tigrachihuayari. Imatalla rimanata aliguta yarishpaca, shayarilla.

⁶Can nishcashnallatami ñucaca, Taita Diospaj randi caipi cani. Ñucapash, alpamanda rurai tucushcallatami cani.

⁷Ricui, ñuca rimashcacunaca, candaca na manllachingachu. Ñuca maquipash, candaca na llaquichingachu.

⁸Canga, ñuca uyajtapachami rimarcangui. Cashna nijujtami, candaca uyarcani:

⁹‘Ñucaca, ima mapapash, ima nalipash illajmi cani. Imata juchachinapash, illajmi cani. Ñucapica, ima nalipash na tianllu.

¹⁰Ricuichi, Diosmi ñucata fiñashpa, juchachinata mascahuan. Ñucataca, paita fiñajtashnami ricuhuan.

¹¹Ñuca chaquitapash, caspi utujupi churachishpami canichihuarca. Ñuca imatalla rurajujtaca, tucuitami ricuriajurca’ nircanguimi.

¹²Ricui, chashna nirijushpaca, imatapash cashcatapachaca na nijushcanguichu. Taita Diosca, runata yali cajtami, canman villagrini.

¹³¿Imashpata paihuan fiñanajushpa rimarijungui? Pai ali yarijushcataca, imatallapash na villangachu.

¹⁴Ashtahuangarin Taita Diosca, runataca cutimbash cutimbashmi riman. Shina cajpipash runami, na yuyaita japin.

¹⁵Muscuipipash, muscuipishna tuta ricurishpapashmi riman. Runacunata puñui japijpi, camapi puñunajujpimi riman.

¹⁶pai ali yuyaita cushcataca, runacunapaj rinripi uyarijta rimashpami ricuchin.

¹⁷Runacuna nalita rurajujta saquichingapaj, jariyashpa jatun tucunajujta anchuchingapajmi, chashna ruran.

¹⁸Shina rurashpami huañushpa pambai tucuna utujuman paipaj alma rinamandapash, espadapi huañuchi tucunamandapash quishpichinga.

¹⁹Shinallata paipaj tucuilla tullucunapi manllanayai nanaihuanmi, camapillata llaquichin.

²⁰Chai nanaihuan cashpami tandatapash, mishquilla micunatapash, tucui shunguhuan millanayachin.

²¹Paipaj cuerpoca, chaquishpami tucurin. Punda na ricurishca tullucunapash, jahuallami ricurin.

²²Paipaj almaca, pambana utujuman rinallami tucun. Paipaj causaica, huañuchij runacunapajman chayanallami tucun.

²³Ali rimanata yachaj puramanda agllashca runa paipaj ladopi cashpami, runa imatalla ruranataca, paipaj randi shayarishpa villanman.

²⁴Chai runaca, cashnami ninman: ‘Taita Diosca, paitaca llaquircami. Huañushcata pambana utujuman, urai rinamandapash cacharichircami. Paica, quishpirinatapash tarircami’ ninmanmi.

²⁵Paipaj cuerpoca, llullu huahuapaj aichashna tucushpami, chairalla viñai cashca punllacunaman tigranman.

²⁶Taita Diosta pai mañajpica, paica juyanmanmi. Paipaj ñavitapash, cushijushpami ricunman. Runataca, imatapash cashcatapacha ruraj cachunmi, cutin tigrachinman.

²⁷Diosca, runacunataca ricuriajunmi. Shuj runa: ‘Ñucaca, juchatami rurashcani. Aliguta rurangapaj randica, nalitarami rurashcani. Ima alitapash na japi ushashcanichu’ ninmanmi.

²⁸Paipaj almataca Taita Diosmi, huañushpa pambana utujuman rinamanda quishpichinga. Paipaj causaipash, michapimi causanga.

²⁹Ricuichi Taita Diosca, runapica tucui chaicunatami, ishcaicaman cashpa, quimsacaman cashpapash, chashna ruran.

³⁰Paica, paipaj alma huañushpa pambana utujuman rinata jarcangapaj, causajcunapaj michahuan punchayachingapajmi, chashna ruran.

³¹Job, ñuca rimashcata aliguta uyahuai. Can upallayajpica, parlashallami.

³²Imatapash aliguta yarijushpaca, tigrachihuailla. Na cashpaca rimahuailla. Candaca, imatapash cashcatapacha ruraj cajta ricuchingapajmi munani.

³³Na cashpaca canga, ñucata uyahuailla. Can upallajpica, ali yachaitami canman yachachisha” nijurcami.