Read Imbabura Highland Quichua JOB 36 Bible Online

JOB 36 - Imbabura Highland Quichua bible

JOB 36

¹Eliú shuti runaca, cashnatapash nijurcarami:

²“Ashatalla shuyahuai, candaca yachachishallami. Ñucaca, Taita Diospaj randi rimana ali yuyaicunata charinirami.

³Ñucaca, carucunamanda ali yachaita apamushpami, ñucata Ruraj Diosca imatapash cashcatapacha ruraj cajtaca ricuchisha.

⁴Ñuca villashca shimicunaca, napacha llullachu. Ima pandatapash na yachachij ñucaca, canhuanmi cani.

⁵Ricui, Taita Diosca jatun Diosmi. Shina cashpapash, pitapash na yangapi churanllu. Paica, ninan ushaita charij ali yachaitami charin.

⁶Paita na manllaj runamanga, causaita na cungachu. Ashtahuangarin llaquichi tucushpa causajcunamanmi, paicuna japina cashcata cunga.

⁷Paipaj ñavitaca, imatapash cashcatapacha rurajcunamandaca, napacha anchuchingachu. Ashtahuangarin jatun mandajcunahuanmi, mandangapaj tiarinapi causaita causaicaman tiachinga. Paicunaca jatunyachi tucushcami canga.

⁸Chaquipi huatana grillohuan huatashpa charijujpipash, llaquichina huascacunahuan huatashpa charijujpipash,

⁹Diosmi, paicuna imatalla rurashcataca ricuchinga. Shinallata paicuna na cazushpa yalishcatapashmi ricuchinga.

¹⁰Chashna ricuchishca jahuami, pai jarcashpa rimashcata uyachun, paicunapaj rinrita pascashpa: ‘Nalita ruranata saquishpa, ñucapajman tigrarimuichi’ ninga.

¹¹Shina nishcata uyashpa, paita servishpaca, ali punllacunata, ali huatacunata causashpami, huañuicaman aliguta cushijuihuan causanajunga.

¹²Ashtahuangarin na uyashpaca, espadahuanmi huañuchi tucunajunga. Ali yachaipash illajmi tucurinajunga.

¹³Ashtahuangarin mishqui shimi jayaj shungucunaca, paicunapaj shungu ucupillami ninanda fiñarishpa tucurinajun. Paicunata Dios huatajpica, na capari ushanajungachu.

¹⁴Paicunaca, chairalla viñai cashpallatami huañunajunga. Paicunaca, jari purallata siririj sodomita nishca puracunashnami huañushpa tucurinajunga.

¹⁵Imagutapash na charij runataca, imagutapash na charij canamanda llujchingami. Llaquipi cashpa caparijujpipash, paitaca uyangami.

¹⁶Shinallatami llaquichishpa rimaj runamandaca, candapash quishpichinga. Ima llaquipash na japina pushtupimi, causachun churanga. Chaipimi, meza junda alipacha micunatapash, canman alichinga.

¹⁷Ashtahuangarin canga, imagutapash alita, imatapash cashcatapacha yaringapaj randica, cambaj yuyaipica Diosta na manllajcunapaj yuyaitallami jundachishcangui.

¹⁸Shinamandami manllana cangui. Pactarallapash pai ninanda fiñarishpa, canda huactashpa anchuchinman. Chai llaquimandaca, imata cushpapash napacha quishpiri ushanguichu.

¹⁹Candaca, orota charijpilla, na cashpaca ninan ushaita charijpilla, ¿llaquingallami yanguichu?

²⁰Tutayachunga ama shuyajuichu. Tutayajpica, gentecunapash paicuna maipi tianajushcamandaca chinganllami.

²¹Nalita rurangapaca ama tigranguichu, chaita ruranamandaca jarcaringui. Dios llaquichijuchun saquingapaj randica, nalita ruranatarami agllarcangui.

²²Ricui Taita Diosca, tucuita yali ninan ushaita charij Diosmi. Paishna yachachij Diosca, ¿pita tiangayari?

²³Pai imatalla ruranataca, ¿pita yachachirca? ¿Pita paitaca: ‘Canga, nalitami rurashcangui’ ninga?

²⁴Pai imatalla rurashcamandaca, jatunyachinata yarinami cangui. Chai rurashcacunatami, runacunaca ricunajun.

²⁵Pai imatalla rurashcacunataca, tucui runacunami carumandallata ricunajun.

²⁶Ricuichi, Taita Diosca jatunmi. Chaitaca, ñucanchica na yachashpami causanajunchi. Pai causashca huatacunatapash, napacha cuentai ushanallachu.

²⁷Paimi, yacu samai llujshijpipash, tamiata rurangapaj shujpilla tandachin.

²⁸Chai fuyu yacuyashpami, runacunapaj jahuapi ninanda urmamun.

²⁹Fuyu maipi callarijtapash, tucurijtapash, ¿pita yachai ushangayari? Culun nishpa, pai maipi tiajujtapash, ¿pita yachangayari?

³⁰Ricuichi, pai punchayachijujtaca chai jahuapimi churarca. Chaihuanmi, mama cucha ucucunatapash jatachinshna punchayachirca.

³¹Chaihuanllatami runacunatapash llaquichin. Chaicunahuanmi, ashtaca gentecunamambash micunata caran.

³²Ama punchayachijuchunga, fuyuta churashpami quilpan.

³³Pai fiñarishcataca, culun nishpami villan. Nalita rurajcunata ninanda fiñashpa llaquichinataca, shinlli huairahuan tamiapashmi villan.