Read Imbabura Highland Quichua JOB 38 Bible Online

JOB 38 - Imbabura Highland Quichua bible

JOB 38

¹Chaimandami Mandaj Diosca, Job runagutaca jatun acapana chaupimanda cashna nishpa rimarca:

²“Ñuca ali yuyaicunata, nara yachajushca shimicunahuan pandachingapaj munajuj runaca, ¿pitayari?

³Cunanga, cambaj cinturasta shinlli huatarishpa shayari. Ñuca tapujpimi, canga tigrachina cahuangui.

⁴Cai pachata ñuca rurajujpica, canga ¿maipita carcangui? Ali yuyaita charishpaca, chaita villahuayari.

⁵Cai pacha mashnata medinatapash, ¿pita mandashca, chaita yachanguichu? Na cashpaca, ¿pita chai jahuapi jahuapi cordelta chutashpa medishcanga?

⁶Cai pachapaj callaricunaca, ¿ima jahuapita tiajunga? Esquinapi churana rumitaca, ¿pita churashca?

⁷Pacarij tucui luzerocuna alicachinajujpipash, Taita Diospaj churicuna tucuilla cushijunajujpipash, ¿maipita carcangui?

⁸Mama cucha yacu pai tiajushca pushtumanda llujshishpa talirijujpipash, ¿pita pungucunata churashpa vicharca?

⁹Yacutaca, fuyuhuan ñuca quilpajujpipash, ¿maipita carcangui? Paitaca, yana yanahuanmi chumbilichircani.

¹⁰Shinallata chaimandaca, maimambash ama llujshichun mandashpami, aldabacunata charij pungucunata churashpa jarcarcani.

¹¹Chai jipaca, cashnami nircani: ‘Caicamanllami chayana cangui, caimandaca na yalinachu cangui. Jatarijuj cambaj jatun yacuca, caipillami jarcaringa’ nircanimi.

¹²¿Can causajushca punllacunapica, punllayai nishpa mandarcanguichu? ¿Maipi yurajlla punllayanatapash, canllu ricuchircangui?

¹³¿Canllu michataca, tucui cai pachata punchayachishpa, ñucata na manllajcunapash, chai michamanda chafsirishpa maitapash richun churarcangui?

¹⁴Alpa mangataca, juyaillaguta rurashpa sellota churashca cajpipash, shuj ashtahuan juyaillaguman tigranllami. Shinamandami, juyailla churajushcashna ricurin.

¹⁵Ashtahuangarin ñucata na manllajcunapaj michaca, paicunapaj ladomanda anchuchi tucunllami. Jatun tucushcacunapaj rigrapash, faqui tucunllami.

¹⁶¿Canga, mama cucha yacu llujshijuj pugyucunamanllu yaicurcangui? ¿Chai manllanayai jatun yacutaca, ali ricushpachu purircangui?

¹⁷¿Huañushcacuna tiana pungucunataca, canman ricuchircachu? ¿Huañui japinalla llandu ucuman yaicuna pungucunatapash ricurcanguichu?

¹⁸¿Mashna anchota cai pacha charijtapash yachanguichu? Cai tucuita can yachashpaca, villahuayari.

¹⁹¿Micha tiajuj ucumambash, maitata rina? Yana yana tuta tiajuj pushtuca, ¿maipita?

²⁰¿Paicuna maicamanlla tiana pushtuman, paicunapaj huasiman rina ñandapash ricuchinguimanllu?

²¹¡Can chaita yachashpaca, nara imapash tiajpillatami huacharishcangui! Shina cashpaca, unai huatacunatami ña causashcangui.

²²¿Canga, rasu maipi tiaj pushtuman yaicushcanguichu? Na cashpaca, ¿rundu maipi tiajta ricushcanguichu?

²³Ñucaca, llaqui punllacunapajmi, chaicunata alichishpa charini. Jatun macanajui, huañuchirinajui punllapajmi alichishpa charini.

²⁴¿Michaca, maijan ñandata chaupirishpa shamun? Rupajlla huairapash, ¿maijan ñanda shamushpata, alpa jahuata caita chaita rinyari?

²⁵Ninan tamiapaca, ¿pita ñanda pascarca? Culun nishpa punchayachij purichumbash, ¿pita ñanda pascarca?

²⁶Pipash na causajuj jichushca alpapica, ¿pita tamiachin?

²⁷¿Pita imatapash na tarpui ushanalla jichushca alpapi yacuta jichashpa, llullu jihuacunata viñachishca?

²⁸¿Tamiaca, taitata charinllu? Na cashpaca, ¿paramutaca, pita ungushca?

²⁹¿Rasuca, pipaj vijsamandata llujshishca? Jahua pachamanda urmaj casataca, ¿pita ungushca?

³⁰Yacucunallatami shinlliyashpa, rumishna tucun. Shinamandami, cai pachapi tiaj manllanayai ucu ucu yacuca, rasu tucunlla.

³¹¿Canga, Pléyades nishca luzerocunapaj huascacunataca, huatai ushanguimanllu? Na cashpaca, ¿Orión nishca luzerocunata huatashcataca pascai ushanguimanllu?

³²¿Canga, jahua pachapi tiaj luzerocunataca, paicuna ricurina punllacunapi llujchi ushanguimanllu? Na cashpaca, ¿Osa Mayor nishca luzerocunatapash, paipaj huahua luzerocunandi pushai ushanguimanllu?

³³¿Canga, jahua pachapi imatalla mandashcacuna tiajtaca yacharcanguichu? ¿Canga, cai pachapi pai imatalla rurashcacunataca rurai ushanguimanllu?

³⁴¿Ashtaca yacucuna canda quilpachun tamiata cachamui nishpa, fuyuta ninanda caparinguimanllu?

³⁵Punchalla shitajcuna maimambash richunga, ¿canllu cachanguiman? ¿Candachu chaicunaca: ‘Caipimi canchi’ ninajunga?

³⁶¿Shungupica, pita ali yachaita churarca? Na cashpaca espiritumambash, ¿pita ali yuyaita curca?

³⁷¿Pita jahua pachataca, ali yachaihuan cuentashpa churarca? Jahua pachapica, ¿pita muchilacunata ladoman sirichishpa talinshna, tamiata cachamun?

³⁸Ñutu alpacuna rumiyajpi, curpacuna shinlliyajpi amujyachingapaca, ¿pita tamiata cachamun?

³⁹Leonmambash, ¿canllu shuj animalcunata japishpa apamunguiman? Huahua leonguna yarjachinajujpipash, ¿canllu na ushajta caranguiman?

⁴⁰Jatun utujucunapi paicuna sirinajujpipash, na cashpaca imatapash japingapaj paicuna causanajuj utujumanda chapanajujpipash, ¿canllu apashpa caranguiman?

⁴¹Cuervo nishca alasyu animal, micunata mascashpa caita chaita purijujpipash, paicunapaj huahuacuna yarjachishpa, Taita Diosta caparinajujpipash, ¿pita paicunaman caran?