Read Imbabura Highland Quichua JOB 39 Bible Online

JOB 39 - Imbabura Highland Quichua bible

JOB 39

¹¿Canga, sacha chivocuna mashna quillapi huachajta yachanguichu? Na cashpaca, ¿tarugacuna huachanajujta ricushcanguichu?

²¿Canga, tarugacuna mashna quillata chichu cajta cuentashcanguichu? ¿Ima quillapi huachanatapash yachanguichu?

³Paicuna siririshpa huachajpi, huahuacuna ña llujshijpica, nanaitapash na ashtahuan charinllu.

⁴Paicunapaj huahuacunaca, shinlliyashpa catishpami, jihuacunata micushpa viñan. Paicuna rishpaca, cutinga na mamacunaman tigranllu.

⁵¿Pita, sacha burrotaca cacharishca purichun churashca? ¿Pita paitaca, na huatana animalta rurashca?

⁶Ñucami paipaj huasitaca, chulunlla pushtupi churarcani. Paitaca, imapash na fucuj pambacunapi causachun saquircani.

⁷Paica, pueblopi causanajuj ashtaca gentecunatapash, na cazunllu. Shuj runa huashata catishpa caparijujpipash, na uyanllu.

⁸Paica, urcucunapi pacalla tiaj jihuacunatami mascashpa micun. Verde jihualla cachunmi, micungapaj mascashpa purin.

⁹¿Búfalo nishca huagraca, canda servingapaj munangachu? Na cashpaca, ¿cambaj huasipi tiaj corralpi causangapaj munangachu?

¹⁰¿Búfalo nishca huagrataca, yugohuan huatashpa huachui ushanguimanllu? ¿Pugru pambacunapipash, tarpushcata quilpashpa cambaj huashata catinmanllu?

¹¹Pai jatun ushaita charijpilla, ¿pailla imatapash rurachun saquinguimanllu? ¿Can imatalla ruranataca, pai rurachun saquinguimanllu?

¹²¿Cambaj granocunata tandachishpa, trillana pambapi tandachijuchun saquinguimanllu?

¹³Pavo realmambash, ¿canllu juyailla alascunata curcangui? Na cashpaca, avestruz nishca alasyu animalmambash, ¿canllu alascunata, plumacunata curcangui?

¹⁴Paica, lulungunata alpapi huachashpaca, saquishpa rinllami. Chai alpapillatami cunujyan.

¹⁵Paica, chai lulungunata, chaquihuan sarushpa faquinatapash, sacha animalcuna sarushpa ñutunatapash na yarinllu.

¹⁶Paipaj huahuacunataca, na pai huachashcashnami na juyan. Pai huachashcapash, yangallata canataca na manllanllu.

¹⁷Paicunamanga, Taita Dios ñucallatami, ali yachaita na curcani. Ali yuyaitapash na curcanichu.

¹⁸Pai jahuata jatarishpaca caballotapash, caballopi tiarishpa calpajujtapash mishashpami rin.

¹⁹Caballomambash, ¿canllu ushaita curcangui? Paipaj cungapi tiaj milmatapash, ¿canllu churarcangui?

²⁰¿Paitaca, langosta jurutashna manllachinguimanllu? Paipaj singahuanga, shinllitami fucun.

²¹Ninan ushaita charishcamandaca, alpata aspishpami cushijun. Paica, ima huañuchinahuan cajpipash, tuparigrinllami.

²²Manllachingapaj munajpipash, na manllarinllu. Espadata ricuchijpipash, paipaj ñavitaca na huashaman churanllu.

²³Paita manllachingapaj flechata, jirru lanzata, uchilla lanzata tsilin nichijpipash,

²⁴paica manllanayaita ñapash fiñarishpami, alpata aspin. Trompetata huacachijpipash, na casilla shayarinllu.

²⁵Trompetata huacachinajujpipash, jajai nishpa asinshnami huacan. Paica macanajui tiajtapash, carumandami mutijin. Soldadocunata mandajcuna caparinajujtapash, caparishpa villanajujtapash uyanllami.

²⁶¿Can yuyaita cujpichu, angaca jahuata jatarishpa, alasta chutashpa urai ladoman rin?

²⁷Jatun angaca, ¿can mandajpichu jahuata jatarishpa, jahua jahuacunapi tazinda ruran?

²⁸Paica, jaca rumipimi causan. Jaca rumi pundapi, jatun rumi umapimi, huasita ruran.

²⁹Chai jahuamandami, maipi micuna tiajta ricun. Carumandallatami, paipaj ñavica ricun.

³⁰Paipaj huahuacunaca, yahuartami chupan. Huañushcacuna maipi sirijujpipash, chaipimi ñapash ricurin” nijurcami.