Read Imbabura Highland Quichua JOB 4 Bible Online

JOB 4 - Imbabura Highland Quichua bible

JOB 4

¹Chashna nijujpimi, temanita nishca Elifaz shuti runaca, cashna nishpa tigrachirca:

²“Canga, ñucanchi rimajpica, llaquiringuimi. Ashtahuangarin, ¿pita na rimashpa jarcangayari?

³Ricui, canga taucacunatami yachachin carcangui, Imata ruraitapash na ushajcunataca, shinllichinmi carcangui.

⁴Nitijanshna pandaj runatapash, aliguta rimashpami alichin carcangui. Cunguricuna quivirinshna llaquilla cajpipash, shinllichinmi carcangui.

⁵Ashtahuangarin cunan, canda llaqui japijpica, ninandami llaquirijungui. Llaquicuna canda japijpica, ninandami musparijungui.

⁶¿Nachu canga, Taita Diosta manllanata yariajlla causan carcangui? ¿Nachu ima pandatapash, na rurashpa causanatalla shuyan carcangui?

⁷Cunanga, aliguta yariyari. Ima nalitapash na ruraj runaca, ¿maijambash huañushcachu? Aligutalla rurajcunaca, ¿maipita tucuchi tucushca?

⁸Ashtahuangarin nalita rurahuan yapunshna, nalicachishpa rimajcunaca, chaitallata cozechanajujtami ricushcani.

⁹Taita Diospaj samaihuanllami huañunajun. Pai ninanda fiñarishpa fucujpillami, tucuchi tucunajun.

¹⁰León ninandapacha huacashpa caparinapash tucurishcami. Huahua leongunapaj quirucunapash faquirishcami.

¹¹Rucu leonga, micuna aicha na tiajpimi huañun. Micuna illajpimi, mama leonbaj huahuacunapash, caita chaita rinajun.

¹²Chaitaca, ñucamambash na villashpami pacashca. Ashtahuangarin ñuca rinripillami, chaitaca huaquinllatapash uyarcani.

¹³Tuta muscuipishnami, yuyaipilla ricurcani. Gentecuna ninanda puñunayachishpa puñunajujpimi uyarcani.

¹⁴Ñucapajman ninan manllai shamushpa chujchuchihuarca. Shinamandami, tucuilla ñuca tullucunapash chujchurca.

¹⁵Ñuca ñaupajta huaira fucunshna aya yalijujpimi, ñuca cuerpo milmacunapash shayarirca.

¹⁶Ñuca ñaupajpimi, aya shayarirca. Paipaj ñavitaca, na ricurcanichu. Upalla tucujpimi, cashna nijta uyarcani:

¹⁷‘¿Runaca, Taita Diostapash yali imatapash cashcatapacha rurajchu canga? ¿Runaca, paita ruraj Diostapash yali ima mapapash illajchu canga?

¹⁸Ricui, Diosca paita servijcunatapash, na yariajlla canllu. Paipaj angelcunatapash, shinlli shungu cajtami ricurca.

¹⁹Alpa turuhuan shayachishca huasipishna causajcunatacarin, ¿maitata yariajlla causangayari? ¡Paicunaca, ñutu alpa jahuapilla huasichi callarishcacashna cashcamandaca, polilla juru micujpica urmangallami!

²⁰Paicunaca, tutamanda ali cashpapash, chishipaca tucuchi tucunllami. Ima tucunatapash, pipash na villajpica, chingaita chinganllami.

²¹Paicuna juyaillagu ricurijujpash, ¿nachu paicunahuanllata chinganlla? Ima ali yachaitapash na yachashpami huañunajun’ nijtami uyarcani.