Read Imbabura Highland Quichua JOB 40 Bible Online

JOB 40 - Imbabura Highland Quichua bible

JOB 40

¹Mandaj Diosca cashna nishpapashmi, Job runaguman tigrachirca:

²“¿Canga, alipacha yachajushca cashpachu, Tucui Ushaita Charij Dioshuan chimbapurangapaj munangui? Taita Dioshuan chimbapurangapaj maijambash munashpaca, chaicunatara tigrachihuachun” nircami.

³Mandaj Dios shina nijpimi Job runaguca, cashna nishpa tigrachirca:

⁴“Ricui, ñucaca imapajpash na valij runami cani. ¿Imatata tigrachi ushapashayari? Ashtahuangarin ñuca maquihuanmi, shimita llapirisha.

⁵Ñucaca, ñami callaripi rimarcani, ashtahuan na tigrachishachu. Cutimbashmi rimarcani, na ashtahuan tigrashpa rimashachu” nircami. Taita Diosca, paipaj ninan ushaitami ricuchishca

⁶Mandaj Diosca, jatun acapana chaupimandami Job runaguman, cashna nishpa tigrachirca:

⁷“Cunanga, cambaj cinturasta shinlli huatarishpa shayari. Ñuca tapujpimi, canga tigrachina cangui.

⁸¿Canllu ñuca llaquichinataca, yangapi churagringui? ¿Canga, imatapash cashcatapacha rurashca ricuringapajchu, ñucatara juchachingapaj munangui?

⁹¿Canga, Taita Dios ñucashnachu shinlli rigrata charingui? Can rimashcapash, ¿ñuca rimashcashnachu culun nishpa uyarin?

¹⁰Cunanga, jatun cashcahuan, alicachi tucushcahuan alichiriyari. Alicachi tucushcatapash, juyailla canatapash churajuyari.

¹¹Nina japirinshna, ñapash fiñarishpa rimayari. Jariyashcacunata ricushpa, tucuillata tucuchiyari.

¹²Jariyashpa jatun tucujcunata ricushpa, tucuillata pingaichiyari. Diosta na manllajcunatapash, paicuna tianajuj pushtupillata llaquichiyari.

¹³Paicunataca, tucuillata ñutu alpapi quilpayari. Ñavi ama ricuchumbash, yana yanapi vichayari.

¹⁴Shina rurajpica ñucapash, cambaj ali lado maquihuanllata quishpiri ushanatami villasha.

¹⁵Cunanga, ricui behemot nishca animaltaca, candashnallatami rurarcani. Chai animalca, huagrashnami jihuata micun.

¹⁶Ricui paica, ninan ushaitaca huashapimi charin. Ninan shinlli canataca, vijsa aichapimi charin.

¹⁷Paipaj chupatapash, cedro caspitashnami cuyuchin. Changapi tiaj angucunapash, caiman chaiman huatarishcashnami.

¹⁸Paipaj tullucunaca, bronceshna shinllipachami. Paipaj cuerpopi imalla tiashcapash, jirru barrashnami.

¹⁹Taita Dios ñucaca, paitami tucui animalcunamanda punda rurarcani. Paita ruraj ñucaca, paitaca espadahuan huañuchinajuchun saquishallami.

²⁰Urcucunapi jihuacunapash, paipajllami viñan. Tucui urcu animalcunami, chaipica pugllashpa fahuanajun.

²¹Paica, llandulla ucucunapimi siririn. Yacu llujshijuj pambacunapi viñashca sucus ucucunapimi pacajun.

²²Paitaca, jatun quirucunami llandun. Yacu manñapi tiaj sauce quirucunami, muyundi jarcan.

²³Ricui, paica jatun yacu manllanayaita mirajpipash, na manllanllu. Jordán yacu jatarishpa, paipaj shimipi huactajujpipash, na manllashpa casilla shayajunllami.

²⁴¿Pai chapajujpica, pipash japi ushangachu? ¿Paipaj singatapash utujui ushangachu?