Read Imbabura Highland Quichua JOB 41 Bible Online

JOB 41 - Imbabura Highland Quichua bible

JOB 41

¹Canga, leviatán nishca animaltaca, ¿anzuelohuanlla llujchi ushanguimanllu? Na cashpaca, ¿paipaj jallupi huascahuan huatai ushanguimanllu?

²¿Paipaj singapipash, cabiata yalichi ushanguimanllu? ¿Garfio nishca jirruhuan, quijadasta utujushpa churachi ushanguimanllu?

³¿Paica, ama llaquichihuaichu nishpachu, candaca cutin cutin ninanda caparinman? ¿Candaca, uyanayaita llullashpachu rimanman?

⁴¿Paica, tucui causaipi canda servingapaj, canhuan ari nijungachu?

⁵¿Paihuanga, alasyu animalhuanshna pugllai ushanguimanllu? Na cashcapaca, ¿cambaj ushicuna pugllachun, huatashpa saquinguimanllu?

⁶¿Paitaca, cumba puracuna jatun micuita rurashpa micungachu? ¿Paitaca, jatushpa randijpura chaupiri ushangachu?

⁷¿Paipaj carataca, cuchillohuan cuchunguimanllau? ¿Na cashpaca, paipaj umataca, pijita tujsishpa japina jirruhuan tigranguimanllu?

⁸Paitaca, cambaj maquihuan huactagriyari. Canga, paihuan macanajushcata yarijushpallatami, cutinga na macanajungapaj munangui.

⁹Uyaichi, paita maijan japingapaj munashpapash, na cazujpillatami tigranga. Paitaca, ricushpallatami manllarishpa urmanga.

¹⁰Paita jariyashpa rijchachij runaca, pipash na tianllu. Ñuca ñaupajpicarin, ¿pita shayari ushangayari?

¹¹¿Pita jipaman tigrachihuachun nishpa, imata cashpapash ñucaman punda cushcanga? Cai pachapi imalla tiajcunaca, ñucapajmi.

¹²Na upalla quedashpami, pai imashna cajtaca, paipaj ushaimandapash, na manllaj cajtapash villagrini.

¹³Paipaj vijsa carataca, ¿pita ricui ushanga? ¿Pita paitaca, ishcai frenota churangapaj quimiri ushanga?

¹⁴¿Pita paipaj shimitaca pascanga? Jilapi tiajuj paipaj quirucunaca, manllachinllami.

¹⁵Paipaj juyailla churajunapash, jarcarina shinlli escudoshnami. Paipura quichijita sirashcashnami.

¹⁶Chimbapura tandachishca cajpimi, chaitaca huairapash na yaicun.

¹⁷Shinllitapacha paipura llutashcashnami. Na pascai ushanallata, shinllita ali huatashcashnami.

¹⁸Paipaj singahuan fucujpica, punchapamba ninami llujshin. Paipaj ñavica, pacarijpi indi llujshijunshnami.

¹⁹Paipaj shimimandaca, rupajuj ninami llujshin. Ninami rupashpa zimbrajun.

²⁰Paipaj singamandapash, timbujuj mangamandashna, na cashpaca caldermandashnami cushni llujshin.

²¹Paipaj samaimi, carbongunata japichin. Paipaj shimimandaca, rupajuj ninami llujshin.

²²Paipaj ushaica, paipaj cunga tullupimi tian. Paipaj ñaupajpillatami, huañujunshna tucushpa caita chaita urman.

²³Ashtahuan ñutu aichacunapash, ninanda shinlliyashcami. Paipica shinllipacha tiashpa, na cuyurinllu.

²⁴Paipaj shungupash, shinlli rumishnami. Juchu quirushna shinllipachami.

²⁵Ninan shinlli runacunapash, jatun ushaita charijpimi manllanajun. Ña huañungashna tucushpallami, shungupi nali yuyaicuna tiashcatapash anchuchinajun.

²⁶Paita maijan japishpapash, espadahuan cashpa, lanzahuan cashpa, flechahuan cashpa, jirru churajunahuan cashpapash, napacha huañuchi ushangachu.

²⁷Paipaca, jirrupash jupashnami, broncepash ismushca caspishnami.

²⁸Flechapash, paitaca na calpachinllu. Huaracahuan rumicunata shitajpipash, jupashnami paipica chayan.

²⁹Tucui imalla macanajunacunapash, paipaca jupashnami. Paica, lanzata tsilin nichijta uyashpapash, asinshnami uyan.

³⁰Paipaj chaqui ucupash, filo filo jirrucunashnami. Chaihuanmi, alpapi utujurijta sarushpa purin.

³¹Ucu ucu mama cucha yacutapash, mangata timbuchinshnami timbuchin. Jambicunata tandachishpa, timbuchinshnami timbuchin.

³²Paipaj huashamanmi, ñanda yurajlla punchayachin. Manllanayai ucu ucu yacutapash, yuralla putsujutami ruran.

³³Cai pachapica paiman rijchajca, pipash na tianllu. Paitaca, imatapash na manllaj animal cachunmi rurarcani.

³⁴Paica, paita yali ima jatun tiajpipash, yangapimi churan. Tucui jariyashpa jatun tucushcacunatapash, jatun mandajmi” nijurcami.