Read Imbabura Highland Quichua JOB 42 Bible Online

JOB 42 - Imbabura Highland Quichua bible

JOB 42

¹Job runaguca, cashna nishpami Mandaj Diosman tigrachirca:

²“Tucui ushaita charijtaca yachanimi. Cambaj ñaupajpica, ima yuyaipash na pacalla cai ushanllu.

³¿Ali yuyaitaca, pita napash entendishpata pandachingapaj munan? Shinamandami ñucaca, napash yachashpata rimarijurcanilla. Ñucapaca, na yachashca yapa manllarina yuyaicunami cashca.

⁴Canhuan rimangapajmi munapani, uyahuayari. Ñuca tapujpica, canmi yachachihuangui.

⁵Ñucaca, parlajtallami canmandaca uyan carcani. Ashtahuangarin cunanga candaca, ñuca ñavihuambachami ricujuni.

⁶Shinamandami ñucamandallata millanayachini. Ima nalita rurashcamanda llaquirishpami, ñutu alpapi, uchufapi tiarini” nijurcami.

⁷Mandaj Dios cai shimicunata Job runaguta rimashca jipaca, cashnami tucurca: Temanita nishca Elifaz shuti runatami, Mandaj Diosca cashna nijurca: “Canhuambash, cambaj caishuj cumbacunahuambash, ñucaca ninandami fiñarircani. Cangunaca, ñucata servij Job runagushnaca, ima alicunatapash ñucamandaca na parlashpallami tianajunguichi.

⁸Chashna rurashcamanda cunanga, canchis jari shicuta, canchis jari llamata apashpa, ñucata servij Job runagupajman richi. Chaipimi, cangunaca ñucaman cushpa tucuillata rupachina canguichi. Ñucata servij Job runagumi, cangunamandaca mañahuanga. Pai mañajujta uyashpami, cangunata ninanda llaquichinataca saquisha. Cangunaca, ñucata servij Job runagushnaca, ima alicunatapash ñucamandaca, na parlashpallatami tianajunguichi” nijurcami.

⁹Shina nijpimi, temanita nishca Elifaz shuti runapash, suhita nishca Bildad shuti runapash, naamatita nishca Zofar shuti runapash, Mandaj Dios mandashcashnallata ruranajurca. Shina rurajpimi Mandaj Diosca, Job mañashcata chasquirca. Imalla alicunataca, Diosca cutinmi Job runaguman cushca

¹⁰Paipaj quimsa cumbacunamanda Diosta mañashca jipami Mandaj Diosca, Job runagumandaca, chai llaquicunata anchuchirca. Shinallata Job runagu, punda charishcamandaca chaupita mirachishpami tucuita cararca.

¹¹Shinamandami, tucuilla paipaj huauquicunapash, paipaj tucuilla panicunapash, tucui punda rijsishcacunapash, paipaj huasiman shamushpa, paihuan micunajurca. Shinallata Mandaj Dios paiman llaquicunata cachashcamandaca, paicunapash llaquirishcata ricuchishpami, ali shimicunata parlashpa cushichinajurca. Paicunaca, tucuicunami culquitapash, oro surtijastapash, shuj shuj caranajurca.

¹²Mandaj Diosca, Job runagutaca jipa punllacunapica, punda bendiciashcatapash yalimi bendiciarca. Shinamandami paica, chunga chuscu huaranga llamacunata, sucta huaranga camellocunata, huaranga yunta huagracunata, huaranga burrocunata charirca.

¹³Canchis churitapash, quimsa ushitapashmi charirca.

¹⁴Punda ushitaca, Jemima shutitami shutichirca. Jipa ushitaca, Cesia shutitami shutichirca. Ishcaipaj jipa ushitaca, Keren-hapuc shutitami shutichirca.

¹⁵Tucui chai llactapipash, Job runagupaj ushicunashna juyaillagucunaca, pipash na tiarcachu. Job runaguca paicunamambash, paicunapaj turicunaman carashcashnallatami, imatalla japina cashcataca cararca.

¹⁶Chai jipaca Job runaguca, patsaj chuscu chunga huatatami causajurca. Paica, paipaj huahuacunapaj huahuacunatapash, chai huahuacunapaj huahuacunatapashmi ricurca. Paica, chuscu miraicunata ricungacamanmi causajurca.

¹⁷Paica, unaitapacha causashpa, ña rucugupachami huañurca.