Read Imbabura Highland Quichua JOB 5 Bible Online

JOB 5 - Imbabura Highland Quichua bible

JOB 5

¹Cunanga, shinllita capariyari. ¿Shina caparijpipash, pipash tigrachingachu? ¿Maijan, jucha illajpajmanda tigragringui?

²Shinlli shungu runataca, ninanda fiñarinaca huañuchinshnami charin. Imatapash ninandapacha munaj runataca, imapash ñucapajlla cashcaman yajuna yuyaimi tucuchin.

³Ñucaca, shinlli shungu runataca, sapiyashcashna cajtami ricurcani. Shinamandami, pai causajuj huasitaca chai punllallata, ima llaquipash japishpaca alimi canman nircani.

⁴Paipaj huahuacunapash, imatapash na manllashpa aliguta causaitaca, na ushangachu. Puebloman yaicuna pungupillatami, llaquichi tucunajunga. Paicunata cacharichingapaca, pipash na tiangachu.

⁵Paipaj granocunataca, yarjaimanda purijcunami micunajunga. Casha chaupicunamanda llujchishpami apanajunga. Yacunayachishpa purijcunami, paipaj jazindapi tiashcataca ufianshna tucuchinajunga.

⁶Llaquica, na ñutu alpamanda llujshinllu. Ninan llaquita apanaca, na alpa ucumanda vichi llujshinllu.

⁷Shina cajpipash, imashnami rupajuj ninamanda jamzi ninan jatarishpaca huairapi rin, chashnallatami runaca llaquipajlla huacharin.

⁸Ñucaca, Taita Diostachari mascaiman, paimanllari ñuca llaquitaca mingaiman.

⁹Paica, pipash na rurai ushanalla manllarinacunatami ruran. Shinallata na cuentai ushanalla juyaillacunatami ruran.

¹⁰Cai pachapica, tamiatami caran. Tarpushca pambacunamambash, yacutami cachamun.

¹¹Na jariyashpa causajcunataca, alipimi churan. Llaquilla causajcunataca, ama manllashpa aliguta causachunmi churan.

¹²Umachinata ali yachajcuna yarinajushcataca, paicunapaj maquihuan ama imatapash rurachunmi pandachin.

¹³Ali yachajcunatapash, umachinata ali yachajushcallatami japin. Jatun nalita rurajcuna yarinajujtapashmi pandachin.

¹⁴Punllapipash, yana tutapishnami nitijanajun. Chaupi punllapipash, yana yana tutapishnami tacarishpalla purinajun.

¹⁵Shinami Diosca, imagutapash na charij runataca, espadapi huañuchi tucunamanda cacharichin. Diosta na manllajcuna rimashcamandapash, ninandapacha llaquichij runacunapaj maquimandapashmi quishpichin.

¹⁶Imagutapash na charij runa shuyanaca, Diosmi. Nalita rurajcunataca, nalita rurashcallatami shimita quilpan.

¹⁷Ricui, Taita Dios llaquichijpi, llaquita apaj runaca, ninandami cushijun. Chaimandami, Tucui Ushaita Charij Dios llaquichijpica, na yangapi churana cangui.

¹⁸Paimi, caracha ung:uitaca churan. Chaitaca, paillatami jambishpa huatachinga. Pai chugrichishcataca, paipaj maquihuanllatami jambin.

¹⁹Sucta llaquicuna japijpipash, cacharichingallami. Ña canchis llaquica, candaca na japingachu.

²⁰Yarjaimanda huañunatapash quishpichingallami. Jatun macanajuipi, espadahuan huañuchi tucunamandapash quishpichingallami.

²¹Astinshna llaquichij jallumandapash pacajunguillami. Tucuchij llaquicuna shamujpipash, na manllanguichu.

²²Canga, tucuchij llaqui japijpipash, yarjai japijpipash asitami asingui. Sacha animalcunatapash, na manllanguichu.

²³Canga, alpapi sirij rumicunahuambashmi, ali cangapaj ari ningui. Sachapi causaj animalcunapash, canhuanga casilla aligutami causanga.

²⁴Cambaj carpapipash, casilla ali causai tiajtami yachangui. Can causana huasita ricungapaj yaicujpipash, imapash na illangachu.

²⁵Shinallata cambaj miraicunaca, ashtacapacha cajtami ricungui. Cambaj miraicunaca, pambapi jihuashnami canga.

²⁶Can rucuyashpaca, trigota tandachina punllacunapi trigota tandachishpa huatashcashnami, huañushcata pambana utujuman apai tucungui.

²⁷Ricui, cai tucuitami yachajushcanchi. Chaica chashnapachami. Canga, chaita uyashpa, cambaj alipajllata ali yachajuyari” nijurcami.