Read Imbabura Highland Quichua JOB 6 Bible Online

JOB 6 - Imbabura Highland Quichua bible

JOB 6

¹Shina nijpimi Jobca, cashna nishpa tigrachirca:

²“¡Ñuca llaquicunandi, ñuca nanaicunandi tandachishpa pezashpachari ali canman! Balanzapi churashpa tandachishpa pezashpachari ali canman.

³Shina pezajpica, mama cuchapi tiaj t'iyu alpatapash yalimi pezanman. Shinamandami ñucaca, na aliguta yarishpa ñapash rimashcanilla.

⁴Tucui Ushaita Charij Diospaj flechacunami, ñucapi tianajun. Chai venenotami, ñuca espirituca ufiajun. Taita Dios cachamushca ninan manllaimi, ñucahuanga macanajujun.

⁵¿Urcu burroca, jihuapi cashpaca huacanllu? ¿Huagrapash, jihuata micujushpaca huacanllu?

⁶¿Cachi illaj aminda micunataca, micurinllachu? ¿Lulunda micujushpa yurajtalla micujpica, mishquillaguchu canga?

⁷Ñuca alma na munashcacunatami, cunanga micujuni.

⁸¡Ñuca mañashcata pipash carangapaj shamushpami ali canman! ¡Taita Diosca, ñuca munashcata carashpami ali canman!

⁹Taita Diosca, ñucata ñutushpaca cushijushpami ali canman. ¡Paipaj maquita chutashpa, ñucata tucuchishpami ali canman!

¹⁰Na llaquishpa, jatun nanaihuan ñucata huañuchijpipash cushijuimanmi. Jucha illaj Dios rimashcataca, na pacarcanichu.

¹¹¿Ima ushaihuanda, ñucaca shuyanara cani? ¿Imapaj cashna tucushcata yachashpata shuyajusha?

¹²¿Ñuca ushaica rumishnachu? Na cashpaca, ¿ñuca cuerpoca bronceshnachu?

¹³¿Nachu ñucallatapash na ushajuni? Tucui imapilla ñucata ayudajpash, na tianllu.

¹⁴Llaquita apaj runaca, paipaj cumbahuanmi cushichi tucun. Tucuita Rurai Ushaj Diosta manllanata saquij runapashmi, cushichi tucun.

¹⁵Ashtahuangarin ñucataca, ñuca huauquicunallatami yacu ñapash jundashpa yalinshna umachihuarca. Manllanayai jatun yacu yalinshnami llaquichihuarca.

¹⁶Paicunaca, tutamanda casa quilpashcashnami tianajun. Rasu quilpashcashnami tianajun.

¹⁷Tutamanda casaca, rupai shamujpica yacuyanllami. Punlla cunujyajpica, maipi cashcamandaca chinganllami.

¹⁸Paicunaca, tandanajushca rinajushpapash, caita chaita rinllami. Shina rinajushpallatami, asha asha chaquishpa chingan.

¹⁹Chai yacucunataca, Temán shuti llactamanda purij runacunapash ricunajurcami. Sabá shuti llactamanda purij runacunapash, chai yacucunataca shuyanajurcami.

²⁰Ashtahuangarin paicuna shuyanajushca na ricurijpimi, pingai tucunajurca. Chai yacucuna tiaj pushtucaman chayashpapash, yacutaca na tarishpami musparinajurca.

²¹Cunanga cangunapash, chashnapachami canguichi. Jatun llaquita ricushpaca, manllaritarami manllarircanguichi.

²²¿Ñucaca, cangunataca cashnachu nircani?: ‘Cangunapaj jazindamanda imatallapash apamushpa, ñucaman carahuaichiyari.

²³Ñucata ninanda llaquichishpa charij runapaj maquimanda cacharichihuaichi. Na llaquishpa huañuchij runacunapaj maquimanda quishpichihuaichi’ ¿nircanichu?

²⁴Ñuca upalla tiajungapaca, yachachihuaichiyari. Imapi ñuca pandashcatapash yarichihuaichiyari.

²⁵¡Ali rimashca shimicunaca, cushichimbachami! Ashtahuangarin canguna rimashcacunaca, imatapash na jarcanllu.

²⁶¿Imata ruraitapash na ushashpa rimashca, huairashna chingaj shimicunatachu jarcashpa rimangapaj yarinajunguichi?

²⁷Cangunaca, taita mama illaj huahuatapash tandanajushpa japinguichillami. Cangunapaj cumballata huashajuchumbash, utujuta allanguichillami.

²⁸Cunanga, ñuca ñavita ricungapaj munashpaca, ricuhuaichilla. Cangunapaj ñaupajpi, ima llullata rimashca cajpipash ricuhuaichilla.

²⁹Cunanga, ali yuyaita cutin japishpa, ima nalitapash na rimanachu canguichi. Ñucataca, imatapash cashcatapacha ruraj cashcata cutin yarihuaichiyari.

³⁰¿Ñuca jalluhuanga, nali shimicunatachu rimajuni? Nali shimicuna cajtaca, ¿nachu ñuca shimillata yachai ushan?