Read Imbabura Highland Quichua JOB 7 Bible Online

JOB 7 - Imbabura Highland Quichua bible

JOB 7

¹Cai pachapi causajcunaca, ¿nachu shaijungacaman imatapash rurashpa causan? Paicunapaj punllacunaca, caipi chaipi trabajaj runapaj punllacuna tucurinshnami tucurin.

²Servij runaca, llanduringapaj munashpami aij nijun. Caipi chaipi trabashpa purij runaca, samangapajmi munan.

³Cashna jatun llaquitami, cai quillacunapica apajuni. Ñuca japina cashcamanda japinataca, llaquinayaita sirina tutacunatami cuhuashca.

⁴Siririjushpaca: ‘¿Ima horashi jatarisha?’ yajurcanimi. Ashtahuangarin uchaca na pacarinllu. Shinamandami, pacaringacaman ashtaca yuyaicunahuan sirijuni.

⁵Ñuca aichaca jurucunahuan, asha alpahuan quilpashcashnami. Ñuca aicha carapash, millanayaitami ashnajun.

⁶Ñuca causaica, ahuaj runapaj lanzaderatapash ashtahuan yalimi calparca. Shinamandami, imata yarishpa shuyanapash tucurirca.

⁷Ñuca causaica, huairashna cajta yaripairi. Ñuca ñavica, ali causaitaca na ashtahuan ricungachu.

⁸Ñucata ricujcunapash ñucataca, na ashtahuan ricunajungachu. Cambaj ñavihuan ñucata ricujpica, ñucaca tucurishallami.

⁹Fuyuca, asha asha chinganllami. Chashnallatami, Seolman maijan uriajushpapash, cutinga na llujshinga.

¹⁰Paipaj huasimambash, cutinga na tigrangachu. Pai maipi causashcatapash, cutinga na ricungachu.

¹¹Shinamandami ñuca shimihuan rimanataca, na jarcarisha. Yuyaipi llaquihuan huañujushpapash, rimajushallami. Tucui almahuan llaquirishpami, aij nijushalla.

¹²Ñucata cuidashpa shayajuchun churangapaca, ¿mama cuchachu cani? ¿Na cashpaca, mama cuchapi tiaj manllanayai jatun animalchu cani?

¹³Ñucaca: ‘Camapi ashatallapash samashpa, cushijushpa cai llaquicunata cungasha’ yashpami siririjuni.

¹⁴Shina sirijujpimi, muscuicunahuan manllachihuangui. Muscuipishna ricuchishpami chujchuchihuangui.

¹⁵Shinamandami ñuca shungupica, cungapi sipirishpachari ali caiman yajurcani. Ñuca tullucunapaj randica, huañungapajmi munarcani.

¹⁶Ñuca causaitaca millanayanmi, napacha unaicaman causangapaj munanichu. Ñuca causana punllacunaca yangallami, ña huañuchun saquihuailla.

¹⁷¿Paita jatunyachingapaca, runaca imatayari? Cambaj shunguta paipi churangapaca, ¿imatayari?

¹⁸¿Imamandata canga tucui tutamanda ricuj shamungui? ¿Ima cajpita imatalla rurajtapash ricuriajungui?

¹⁹¿Ima punllacamanda ñucata ricunataca saquigrihuangui? ¿Nachu t'ucata langachunllapash saquigrihuangui?

²⁰Runacunata ricuriajuj Dioslla, juchata rurashca cashpapash, candaca, ¿imatata rurai ushashayari? ¿Imashpata ñucallata llashachijuchun, cambaj flechacunahuan shitana señaltashna ñucatalla ricuriangui?

²¹¿Imashpata ñuca na cazushcatapash na anchuchishpa, ñuca juchatapash na cungangui? Cunanga, ñutu alpapimi puñugrini. Ñucaca, tutamanda can mascajpipash, na causajushachu” nijurcami.