Read Imbabura Highland Quichua JOB 8 Bible Online

JOB 8 - Imbabura Highland Quichua bible

JOB 8

¹Suhita nishca Bildad shuti runami, cashna nishpa tigrachirca:

²“¿Ima horascamanda chashna rimajugringuilla? ¿Can rimashca shimicunaca, acapana huairashnami canga?

³Taita Diosca, ¿japinatallata japinataca na cushpa saquingachu? Tucui Ushaita Charij Diosca, ¿imatapash cashcatapacha ruranataca, nalita rurashpa saquingachu?

⁴Cambaj huahuacuna paita na cazushpa, juchata rurashcamandami, paicunataca chai juchapillata saquishcanga.

⁵Canga, tutamandata Taita Diosta mascashpa, Tucui Ushaita Charij Diosta mañangui.

⁶Aligutalla rurashpa mapa illaj causangui. Shina causajpica, paica canda yaringapachami. Imatapash cashcatapacha rurashpa causana cambaj huasipipash, imagutapash ashtahuanmi mirachinga.

⁷Canga, ashatalla punda charishca cashpapash, jipa punllacunapica ashtaca alicunatami charingui.

⁸Cunanga, punda causashca taitacunata tapushpa, chai taitacunapaj taitacuna imatalla yachashcata yachajuyari.

⁹Ñucanchica, cainallacuna cashpami, imatapash na yachanchi. Ñucanchi causaica, cai pachapica llandushnallami.

¹⁰Paicunami, ¿nachu candaca yachachishpa rimanajunga? ¿Nachu paicunapaj shungumanda llujchishpami parlanajunga?

¹¹¿Sucusca, turu na tiaj pushtupi viñanllachu? ¿Michina pambapi jihuaca, yacu illaj pushtupi viñanllachu?

¹²Verdella cashpapash, na fitishca cashpapash, chaicunarami tucui jihuacunamanda punda chaquin.

¹³Taita Diosta tucui cungajcunapaj causaicunaca, chashnallatami. Diosta na manllaj runa shuyajushcapash, chashnallatami chinganga.

¹⁴Pai shuyajushcapash, fitirinshna tucuringami. Pai yariajlla causashcapash, araña telashnami canga.

¹⁵Paipaj huasipi pai taunarijpica, chai huasica urmangallami. Ama urmachun charingapaj munashpapash, na ushashpami saquinga.

¹⁶Indipi na chaquij, verdella quirushnami canga. Paipaj retoñocunaca, huertata yali jatunmi viñanga.

¹⁷Paipaj sapicunapash, yacu manñapimi caita chaita huatarishpa rijun. Rumilla alpaman chayangacamanmi, huatarishpa viñajun.

¹⁸Pai maipi tiajushcamanda fitishpa shitajpica, chai alpaca: ‘Candaca, ima horallapash na ricushcanichu’ ningami.

¹⁹Pai cushijushpa causanaca, chashnapachami tucuringa. Ñutu alpamandallatami, shuj jihuacuna viñanga.

²⁰Ricui, Taita Diosca ima pandatapash na ruraj runataca na millanayachinllu. Nalicuna imata rurachumbash, na ayudanllu.

²¹Chaimanda canga, ninanda asinguirami. Cambaj shimihuambash, cushijushpa caparinguirami.

²²Canda millanayachij runacunaca, musparinahuanmi churajushcashna canga. Diosta na manllaj runacunapaj huasicunapash chingangami” nijurcami.