Read Imbabura Highland Quichua JOB 9 Bible Online

JOB 9 - Imbabura Highland Quichua bible

JOB 9

¹Job runaguca, cashna nishpami tigrachirca:

²“Chashna canataca, ñucaca yachanipachami. ¿Imashnata runaca, Taita Diospaj ñaupajpica, imatapash cashcatapacha rurashca ricuringayari?

³Paihuan chimbapura rimangapaj munashpapash, huaranga shimicunamandaca shujllatapash na tigrachi ushangachu.

⁴Paipaj shungupica, alipacha yachajushcami. Paica, ninan ushaitami charin. Maijambash paita na cazushpa shayarij runaca, ¿tucuipi ali causashcachu?

⁵Paica ninandapacha fiñarishpami, urcucunatapash tugyachin. Shina llaquichijtaca, pipash na yachanllu.

⁶Paimi alpatapash, maipi tiajushcamandaca cuyuchin. Alpata vichai charijuj pilarcunatapashmi chujchuchin.

⁷Indi ama llujshichun pai mandajpica, na llujshinllu. Luzerocunatapash sellashcashnami saquin.

⁸Paillami, jahua pachataca, telata chutanshna churarca. Paica, caiman chaiman cuyujuj, mama cucha jahuatami purin.

⁹Osa, Orión, Pléyades shuti luzerocunatapash, paimi rurarca. Shinallata urai ladomambash, pipash na yachai ushanalla pushtucunatami rurarca.

¹⁰Paica, pipash na yachai ushanalla manllarinacunatami ruran. Maitapash na cuentai ushanalla juyaillacunatami ruran.

¹¹Ricui, ñuca ñaupajta pai yalijujpipash, paitaca napacha ricushachu. Pai yalijujtapash, napacha yachai ushashachu.

¹²Pai imata quichujpipash, ¿pita cutin tigrachi ni ushangayari? ¿Pita: ‘Imata rurajungui’ ningayari?

¹³Taita Diosca, ninanda pai fiñarishcataca na saquingachu. Jariyashpa jatun tucuj runacunata ayudajcunaca, paipaj chaqui ucupimi, ñavita urai cumuchi tucunajun.

¹⁴¿Ñucacarin, imatata tigrachishpa rimashayari? ¿Paihuanga, agllashca shimicunatachu rimasha?

¹⁵Ñucaca, imatapash cashcatapacha ruraj cashpapash, na imata tigrachi ushaimanllu. Ashtahuangarin ñuca Jueztaca, llaquihuayari nijuimanllami.

¹⁶Ñuca mañajujta uyashpa pai tigrachijpipash, ñuca mañajujta uyashcataca, nara crimanllu.

¹⁷Paica, ninan huairahuan tamiashnami llaquichihuarca. Yangamandami ñuca chugricunataca, ashtahuan mirachirca.

¹⁸Paica, ñucataca samaita aisachumbash, na saquihuarcachu. Ashtahuangarin jatun llaquicunatallami jundachihuarca.

¹⁹Paipaj ninan ushaita charijta parlajpica, tucuita rurai ushambachami. Imata rurashcata ricujpica, ¿pita ñucapaj randica, shayari ushangayari?

²⁰Ñucaca, imatapash cashcatapacha rurajmi cani nijujpica, ñuca shimillatami llaquipi churaiman. Ñucaca, ima pandatapash na ruranichu nijushpaca, nalita ruraj runami caiman.

²¹Ñucaca, ima nalitapash na ruraj cashpaca, ñucallatami na cazuriman. Ñuca causaitapashmi, yangapi churaiman.

²²Ñucaca, caitallami ningapaj munani: ‘Paica, ima pandata na ruraj runatapash, paita na manllaj runatapash tucuchinllami’ ningapajmi munani.

²³Astishpaca, ñapash huañuchinllami. Ima nalitapash na ruraj runa llaquihuan cajpipash, asinllami.

²⁴Cai pachaca, Diosta na manllajcunapaj maquipimi churai tucushca. Paica, paipaj juezcunapaj ñavitapash quilpanllami. Na pai cajpica, ¿pita canga? ¿Maipita canga?

²⁵Ñuca causana punllacunaca, cartacunata apaj runatapash yali uchamari calpashca. Ima alitapash nara ricushpallatami rishca.

²⁶Ñapash rij barcocunashnami rishca. Aichata micungapaj ñapash uriajuj jatun angashnami calpashca.

²⁷Ñucaca: ‘Aij nijushcata cungashpa, llaquilla ñavi canata saquishpa, shinlli tucushallami’ nimanmi.

²⁸Ashtahuangarin cai tucui nanaicunaca, muspachijuhuanmari. Ima alitapash rurajtashna, na ricunataca yachanimi.

²⁹Ñucaca, Diosta na manllajmi cani. ¿Imapajta yangaca, imatapash rurashayari?

³⁰Rasu yacucunahuan armashca cajpipash, maquita yurayajta maillarishca cajpipash,

³¹ñucataca utujupimi shitahuanguiman. Chaipica, ñuca churajunallatami, ñucataca millanayachinga.

³²Paica, napacha ñucashna runallachu. Shinamandami, imata tigrachitapash na ushani. Imata rurashcata paihuan randimanda ricuitapash, na ushanichu.

³³Ñucanchi ishcandipaj jahuapi maquita churashpa alichij juezca, pipash na tianllu.

³⁴Paipaj varata ñuca jahuamanda anchuchishpami ali canman. Pai cachamushca manllaipash ñucataca, ama manllachihuachun.

³⁵Shina cajpica, na manllashpa rimashallami. Cunanga, cashna llaquipi cashpaca, na ñucapichu cani.