Read Imbabura Highland Quichua Psalms 10 Bible Online

Psalms 10 - Imbabura Highland Quichua bible

Psalms 10

¹Mandaj Dioslla, ¿imashpata carupi cangui? Ñucata ninanda llaquichijui huatacunapica, ¿imashpata pacajupangui?

²Nalita ruraj runaca ninanda jariyashpami, imagutapash na charij runataca catiriashpa llaquichijun. Shinamandami llaquichingapaj pai yarijushcapillata, urmashpa japi tucunga.

³Nalita ruraj runaca, pai munashcata rurashpami cushijun. Ashtahuan ashtahuan charingapaj munaj runatarami alicachin. Mandaj Diostaca, yangapimi churan.

⁴Nalita ruraj runaca, yapa jariyashca purishpami, Taita Diostaca na mascan. Pai imatalla yarijushpapash, Taita Diostaca imatallapash na yarinllu.

⁵Paica, tucui causaipimi vishtu ñangunapi purinshna causan. Can llaquichinacunaca, paipaj ñaupajmanda carupipacha cashcatami yarijun. Tucui paita fiñajcunatapash, yangapimi churan.

⁶Paipaj shungupica: “Ñucataca, pipash na urmachingachu, ima llaquipash na japihuangachu” yajunmi.

⁷Paipaj shimipica, llaqui japishpachari ali canman ninapash, umachinacunapash, umashpalla quichunapash jundami tiajun. Paipaj jallupash, rimashpa llaquichinahuan, nalitalla rimanahuan jundami.

⁸Uchilla llactacuna tiaj ladocunapimi, pacalla chapashpa llaquichingapaj tianajun. Pacalla pushtucunapimi, ima nalitapash na ruraj runataca japishpa huañuchinajun. Imatapash na rurai ushajtaca, pacalla chapashpa llaquichingapajmi ricurianajun.

⁹Paipaj jatun utujumanda león chapajunshnami, na ricunalla pushtumanda pacalla chapanajun. Imagutapash na charij runata quichushpa llaquichingapajmi, pacalla chapanajun. Imagutapash na charij runataca, paipaj linlliman aisashpami, imatapash quichun.

¹⁰Na mitsari ushajcunaca, taucacunami cumurishpa curparishpa, paipaj shinlli sillucunapishna japi tucun.

¹¹Paipaj shungupica, cashnami yarijun: “Taita Diosca cungashcami. Paipaj ñavitaca quilparishcami, ima horapash na ricungachu” yajunmi.

¹²Mandaj Taita Dioslla, jatarishpa cambaj maquita alsapairi. Imagutapash na charijcunataca ama cungapaichu.

¹³¿Imashpata nalita ruraj runaca, Taita Diosta yangapi churan? Paipaj shungupica: “Canga, imata ricunatapash na charinguichu” yajurcami.

¹⁴Canllata ricurcanguimi. Canga, imatalla rurajtapash rimashpa llaquichijtapash, cambaj maquihuan chashnallata tigrachingapajmi ricuriajungui. Imatapash na rurai ushajcunaca, cambajmanmi chayan. Canmi, taita mama illaj huahuacunataca, ayudaj cangui.

¹⁵Nali shungu runataca, rigrata faquipairi. Nali runa imatalla rurashpa llaquichijushcataca, imapash ña na ricuringacaman catiriashpa tucuchipairi.

¹⁶Mandaj Diosca, na tucurij causaita causaicaman Jatun Mandajmi. Paipaj alpamandaca, llactacunapi causajcunaca tucuchi tucushcami.

¹⁷Mandaj Dioslla, na jariyashpa causajcuna imatalla mañajtaca uyaparcanguimi. Canmi paicunapaj shunguta alichishpa, paicuna mañajtapash aligutapacha uyapangui.

¹⁸Taita mama illaj huahuacunatapash, llaquichi tucushcacunatapash mitsashpa uyariajupangui. Alpata rurashca runa ama ashtahuan llaquichishpa catijuchunmi, chashna rurapangui.