Read Imbabura Highland Quichua Psalms 101 Bible Online

Psalms 101 - Imbabura Highland Quichua bible

Psalms 101

¹David rurashca Salmomi. Llaquij cashcamanda, aliguta ricushpa mandaj cashcamandami candajusha. Mandaj Dioslla, canmanmi candasha.

²Can ñucapajman shamujpimi, ima pandatapash na rurashpa causanataca yachasha. Ñuca huasipi cashpapash, ñuca shungupica imapash alitalla ruranata yariashpami purijusha.

³Imatapash nalita ruranataca, tigrashpapash na ricushachu. Diosmanda anchurishpa nalita rurajcunataca millanayachinimi. Paicuna puramandaca, pipash ñucapajman na quimirimungachu.

⁴Jatun nali shungu runaca, ñucamanda anchuringami. Nalita ruraj runataca, rijsitapash na rijsishachu.

⁵Paipaj cumbata, maijambash huashalla nalicachishpa parlajtaca, ñucami tucuchisha. Jariyashpa ricuj, nali shungu runataca, na ricujushallachu.

⁶Ñuca ladopi causachunga, cai pachapi ali cazushpa causajcunatami ricusha. Ima pandatapash na rurashpa causajmi, ñucataca servinga.

⁷Umachishpa quichuj runaca, ñuca huasi ucupica napacha causangachu. Llullashpa parlaj runaca, ñuca ñaupajpi causaitaca napacha ushangachu.

⁸Diosta na manllaj, cai llactapi causajcunataca, tutamandatami tucuchisha. Nalita tucui rurajcunata, Mandaj Diospaj pueblomanda tucuchingapajmi, chashna rurasha.