Read Imbabura Highland Quichua Psalms 102 Bible Online

Psalms 102 - Imbabura Highland Quichua bible

Psalms 102

¹Llaquita apashpa causaj runa ninan llaquipi cashpa, Mandaj Diospaj ñaupajpi huacashpa mañashcami. Mandaj Dioslla, ñuca mañajujtaca uyahuayari. Ñuca caparishpa mañashcapash, cambajman chayapachun.

²Ñucata llaqui japijui punllapica, ama ñucamanda cambaj ñavita anchuchipaichu, ñucataca aliguta uyahuayari. Ñuca mañajui punllapica, ucha tigrachihuayari.

³Ñuca causana punllacunaca, cushnishnami tucurishca. Ñuca tullucunapash, yamda caspi nali rupashpa puchushcashnami tucushca.

⁴Ñuca shungupash chugrishcami, chaquishca jihuashnami. Chaimandami, ñuca micunatapash cungani.

⁵Aij nishpa huacajujpillatami, ñuca aichapash tullucunapi llutarishca.

⁶Jichushca pambapi tiaj pelícano nishca animalshnami cani. Chulunlla pushtucunapi tiaj chushijshnami cani.

⁷Na puñushpami pacarini. Huasi jahuapi pailla shayajuj alasyu animalshnami cani.

⁸Punllandimi ñucataca, rimashpa pingaichihuan. Ñucata ninandapacha fiñajcunaca, ñucata llaquichingapajmi, tandanajushpa yarinajun.

⁹Chaimandami uchufataca, tandatashna micuni. Ñuca ufiana yacutapash, ñuca viquihuanllatami chapuni.

¹⁰Can ninanda fiñarishpami ñucataca, jahuaman huandushpa shitahuarcangui.

¹¹Ñuca causana punllacunaca, llandu yalinshnami. Shinamandami jihuashna chaquishcani.

¹²Ashtahuangarin can Mandaj Diosca, causaita causaicamanmi causajupangui. Candaca, mirai miraicamanmi yarinajunga.

¹³Can jatarishpami, Sion pueblotaca llaquipangui. Sion pueblota llaquina punllacunami capan. Ayudashami nishca huatami chayamupashca.

¹⁴Canda servijcunaca, pueblo urmashca rumicunatami juyanajun. Chai pueblo ñutu alpagutapashmi llaquinajun.

¹⁵Mandaj Diospaj shutitaca, tucui llactacunapi causajcunami manllanajunga. Can punchapamba cajtaca, tucui cai pachapi tiaj jatun mandajcunapashmi manllanajunga.

¹⁶Mandaj Diosmi, Siondaca shayachishca canga. Paipaj punchapambapimi ricuringa. Shinamandami chashna manllanajunga.

¹⁷Imatapash na rurai ushajcuna mañanajujtaca uyangami. Paicuna ninanda mañanajujtaca, na yanga saquingachu.

¹⁸Chaitaca, jipa miraicunamambashmi escribinga. Ña huacharinalla gentecunapashmi, Mandaj Diostaca alicachinajunga.

¹⁹Mandaj Diosca, jahuapi tiajuj paipajlla huasimandami ricujurca. Jahua pachamandami, cai pachataca ricujurca.

²⁰Prezu tiajcuna aij nishpa huacanajujta uyangapaj, huañuchi tucunapacha nishcacunata cacharichingapajmi, chashna ricujurca.

²¹Paicunata ña cacharichijpica, Mandaj Diospaj shutita Sionbi villanajuchun, Jerusalenbi paita alicachinajuchunmi ricujurca.

²²Tucui gentecuna, llactacunata mandajcuna, Mandaj Diosta servingapaj shujllashnalla tandanajushcapi villanajuchun cachangapajmi ricujurca.

²³Paimi, ñucataca chaupi ñambilla ushai illajta saquihuarca. Ñuca causana punllacunatapashmi quichijiyachirca.

²⁴Chaimandami ñucaca, cashna nircani: “Ñuca Taita Dioslla, ñucataca ama chaupi causaipilla apahuaichu. Canga, causaita causaicaman causajmari capangui.

²⁵Cai pachataca, canmi callarimandapacha rurarcangui. Jahua pachapash, cambaj maquihuan rurashcami.

²⁶Paicunaca tucuringami, ashtahuangarin canga causajunguillami. Chaicunaca, tucuillami churajunashna maucayanga. Mushuj churajunatashnami churachingui. Shina churachijpimi mushujyanga.

²⁷Ashtahuangarin canga, canllatami capangui. Cambaj huatacunaca, napacha tucuringachu.

²⁸Canda servijcunapaj miraicunaca, cambaj maquipimi ima manllaipash illaj causanajunga. Chai miraicunapaj miraicunapash, cambaj ñaupajpimi shinllipacha canga” nircanimi.