Read Imbabura Highland Quichua Psalms 103 Bible Online

Psalms 103 - Imbabura Highland Quichua bible

Psalms 103

¹David rurashca Salmomi. Ñuca almalla, Mandaj Diosta alicachiyari. Paipaj jucha illaj shutitaca, ñuca tucui yuyaipash alicachiyari.

²Ñuca almalla, Mandaj Diosta alicachiyari. Ima alicunata pai rurashcataca, shujllatapash ama cungaichu.

³Tucui ima nalicunata can rurashcataca, paimi cungan. Paimi, cambaj tucui nanaicunatapash jambin.

⁴Paimi, can pambai tucuna utujuman rinamandapash quishpichin. Paimi ashtaca alicunatapash, juyanatapash, coronata churachinshna canman caran.

⁵Paimi, na munangacaman can micuchumbash alicunata caran. Jatun angashna mushujyachunmi, chashna caran.

⁶Mandaj Diosmi, imatapash cashcatapacha ruran. Ninandapacha llaquichi tucushpa tucui causajcunamambash, pai japina cashcatallata cun.

⁷Pai imata rurangapaj munashcataca, Moisesmanmi villajurca. Pai imatalla rurashcacunataca, israelcunamanmi villajurca.

⁸Mandaj Diosca ninanda llaquij, ali shungu, na ñapash fiñarij, ninanda juyajmi.

⁹Fiñarishpapash, na unaicaman fiñangachu. Fiñarishcataca, na causaita causaicaman charijungallachu.

¹⁰Ñucanchi nalita rurashcamandaca, na chashnallata llaquichishcachu. Ñucanchi juchacunata rurashcashnallatapash na cushcachu.

¹¹Imashnami, cai pachamanda jahua pachacaman jatun, chashnallatami paita manllajcunataca, jatunyachishpa ninanda llaquin.

¹²Indi llujshimuj ladoca, indi huashajuj ladomandaca carupimi. Chashnallatami ñucanchi na cazushcacunatapash, ñucanchimanda caruyachirca.

¹³Huahuacunata taita llaquinshnallatami, Mandaj Diosca paita manllajcunataca llaquin.

¹⁴Paica, ñucanchi imashna cajtami rijsin. Ñucanchitaca, ñutu alpa cajtami yarin.

¹⁵Runapaj causai punllacunaca, jihuashnami. Pambapi viñashca sisashnami sisan.

¹⁶Jihua jahuata huaira yalijpica, chaquishpa tucurinllami. Chai jihua maipi tiashca pushtutaca, pipash na yachangachu.

¹⁷Ashtahuangarin Diosta manllajcunapaca, Mandaj Dios llaquinaca, causaita causaicaman na tucurinami. Imatapash cashcatapacha pai ruranapash, mirai miraicamanmi.

¹⁸Chaitaca, paihuan ari ninajushcata pactachijcunaman pai mandashcacunata yariashpa pactachijcunamanmi rurajun.

¹⁹Mandaj Diosmi, jahua pachapica pai mandashpa tiarinata churarca. Paica, tucuicunatami mandajun.

²⁰Paipaj ángel cangunapash, Mandaj Diostaca, aligumari cangui nichiyari. Cangunaca, ninan jatun ushaita charijcunami canguichi. Pai ima nishcata rurajcunami canguichi. Imata rurachun nishca shimita cazujcunami canguichi.

²¹Tucui paipaj soldadocuna, Mandaj Diostaca alicachinguichiyari. Cangunaca, paipajta rurajcuna pai munashcata rurajcunami canguichi.

²²Mandaj Dios rurashcacuna, cangunapash tucuicuna paita alicachinguichiyari. Pai mandajuj tucui pushtucunapi, paita alicachinguichiyari. Ñuca almalla, Mandaj Diosta alicachiyari.