Read Imbabura Highland Quichua Psalms 104 Bible Online

Psalms 104 - Imbabura Highland Quichua bible

Psalms 104

¹Ñuca almalla, Mandaj Diosta alicachiyari. Ñucata Mandaj Taita Dioslla, canga ninanda jatunyachi tucushcamari capangui. Canga punchapamba, juyaillagutapacha churajushcami tiajungui.

²Paica michahuanmi, churajunahuanshna quilparishca. Jahua pachataca, telatashnami mandashca.

³Pai causana ucucunataca, yacu chaupipimi churashca. Paica fuyutami, paipaj carreta cachun ruran. Paica, huairapaj alaspimi purijun.

⁴Paica, huairatami paimanda villajuchun churan. Nina rupajujtami, paipajta rurachun churan.

⁵Paimi, cai pachataca callari rumicunapaj jahuapi churarca. Shinamandami, ima horapash na anchuringa.

⁶Cai pachataca, manllanayai ucu ucu yacuhuanmi, churajunahuanshna quilparcangui. Urcu jahuacunapimi, yacucunaca tiajurca.

⁷Can rimajpica anchurircallami. Can culun nijta uyashpaca, uchami anchurinajurca.

⁸Lomacunata yalishpami, pugru pambacunaman urai rijurca. Can churashca pushtumanllatami rijurca.

⁹Maicamanlla tiachun can churashcamandaca, na yalingachu. Na cutinga, alpatapash quilpangachu.

¹⁰Canmi, pugyucunamanda yacutapash, jatun larca yacucunaman cachajungui. Chai yacucunaca, urcu chaupicunatami rijun.

¹¹Chai yacucunatami, pambapi tiaj tucui animalcuna ufianajun. Sacha burrocuna yacunayachishpaca, chai yacuta ufiashpami yacunayaita yalichinajun.

¹²Chai yacu manñacunapica, jahuata rij alasyu animalcunami causanajun. Yura malqui ucucunapimi candanajun.

¹³Paimi, urcucunapica pai causaj ucucunamandapacha yacuta jichajun. Cai pachapi causajcunaca, can fucuchishcacunatami na munangacaman micunajun.

¹⁴Paimi, animalcunamambash jihuata viñachin. Gentecunapaj ali cachun jihuatapashmi, alpapica viñachin. Chaicunamandami, cai alpapi micunataca llujchin.

¹⁵Gentecunapaj shungupi cushichij vinotapash, ñavita punchayachij aceitetapash, runa micushpa causana micunatapashmi llujchin.

¹⁶Líbano shuti urcupi tarpushca, Mandaj Diospaj cedro quirucunaca, yacusapa verde verde quirucunami.

¹⁷Chai quirucunapimi, alasyu animalcunaca tazinda rurashpa causan. Haya nishca quirucunapica, cig:ueña nishca animalmi, tazinda rurashpa causan.

¹⁸Jatun urcucunaca, sacha chivocuna causanami. Rumi jaca utujucunaca, conejocuna causanami.

¹⁹Lunataca, quillacunata ricuchijuchun rurashcami. Inditaca, ima horas huashajunata rijsinatami rurashca.

²⁰Yana yana tutata can churajpimi, tutapash tucun. Tutayashcapimi, tucuilla sacha animalcunaca calparianajun.

²¹Maltun leongunaca, imatapash japishpa micungapajmi, huacashpa catinajun. Paicunaman Taita Dios micunata carachunmi mascagrin.

²²Indi llujshijpica, tandanajushpami paicuna causaj jatun utujucunapi siririgrin.

²³Shinallata runacunaca, imatallapash rurangapaj, chishangacaman alpapi trabajangapajmi llujshin.

²⁴¡Mandaj Dioslla, can rurashcacunaca, na cuentai ushanallamari! Tucui chaicunataca, cambaj ali yachaihuanmi rurashcangui. Cai pachaca, can carashca alicunahuan jundami.

²⁵Ricui, cai jatun mama cuchapipash, na cuentai ushanalla animalcunami causan. Uchilla animalcunapash, jatun animalcunapashmi chaipi causan.

²⁶Chai yacupimi, jatun barcocunapash purinajun. Chai yacupi pugllachun, can rurashca leviatán nishca animalpash, chaipimi causan.

²⁷Chai animalcunaca, micuna horaspi micunata can carachunmi, tucuilla shuyanajun.

²⁸Can paicunaman carajpimi tandachinajun. Can maquita pascashpa carajpimi, ima alicunatapash na ushangacaman micunajun.

²⁹Cambaj ñavita pacajpica, musparishpa pandarinllami. Can samaita anchuchijpica, huañushpa alpallata tigranllami.

³⁰Cambaj Espirituta cachamujpica, cutin miranllami. Shina rurashpami, alpapi tiajtaca mushujyachingui.

³¹Mandaj Diospaj punchapambaguca, causaita causaicaman cachun. Mandaj Diosca, pai rurashcacunahuanga cushijupachun.

³²Pai ricurijpica, alpaca chujchunmi. Urcucunapi tacarijpica, cushninllami.

³³Mandaj Diostami, ñuca causaipica candajusha. Ñuca Taita Diosmanmi, Salmocunata ñuca causajushcacaman candajusha.

³⁴Paita ñuca alipacha yarijunaca, aligupachami. Ñucaca, Mandaj Dioshuanmi ninandapacha cushijusha.

³⁵Juchata rurajcunaca, cai pachamanda chingachi tucushca cachun. Jatun nalita rurajcunaca, tucurishca cachun. Ñuca almalla, Mandaj Diosta alicachiyari. Mandaj Diostami alicachina canguichi.