Read Imbabura Highland Quichua Psalms 105 Bible Online

Psalms 105 - Imbabura Highland Quichua bible

Psalms 105

¹Mandaj Diostaca alicachinguichi. Paipaj shutipi mañaichi. Pai imatalla rurashcataca, shuj gentecunaman villaichi.

²Paiman candaichi, Salmocunata paiman candaichi. Tucui juyaillacunata pai rurashcataca parlaichi.

³Jucha illaj paipaj shutipi cushijuichi. Mandaj Diosta mascajcunaca, tucui shunguhuan cushijuichi.

⁴Mandaj Diostapash, paipaj ushaitapash mascaichi. Paipaj ñavitaca, tucui causaipi mascaichi.

⁵Ima juyaillacunata, pai rurashcataca yarichi. Jatun manllarinacunata rurashcatapash, paipaj shimihuan rimashpa llaquichinatapash yarichi.

⁶Diosta servij Abrahambaj mirai cangunaca, yarichiyari. Pai agllashca Jacobopaj miraicunalla, yarichiyari.

⁷Paimi, ñucanchita Mandaj Taita Dios. Pai llaquichishcacunaca, tucui cai pachapimi ricurin.

⁸Pai ari nishcataca, causaita causaicaman yariajurcallami. Huaranga huaranga miraicaman, pai mandashca shimicunatapash yariajurcallami.

⁹Chaitaca, Abrahamhuanmi ari nirca, Isaacmambashmi juramenturca.

¹⁰Chaitaca, Jacobomanmi mandashpa curca. Israelcunamanmi, causaita causaicaman ari nirca.

¹¹Paica cashnami nirca: “Canaán llactatami, canman carasha. Cangunapaj japinataca, cangunapaj cachunmi carasha” nircami.

¹²Shuj llactamanda shamushpa chai llactapi huaquinlla purinajujpimi, chashna nirca.

¹³Paicunaca, llactan llactanmi purinajurca. Shuj llactamandaca, shuj gentecunapajman yalishpami causanajurca.

¹⁴Paicunata llaquichinajuchunga, na saquircachu. Ashtahuangarin paicunamandami, jatun mandajcunataca llaquichijurca.

¹⁵“Aceiteta talishpa javishca ñuca mandajcunataca, na tacarinachu canguichi. Ñuca ima nishcata villajcunataca, na llaquichinachu canguichi” ninmi carca.

¹⁶Paicunapaj llactapica, jatun yarjaitami cachamurca. Micushpa shinlli tucuna tucui granocunatapashmi chingachirca.

¹⁷Paicunata ñaupachishpaca, shuj runatami cacharca. Paica, Josemi carca. Paitaca, gañan cachunmi jatushca carca.

¹⁸Paipaj chaquipica, grillocunata churachishpami llaquichirca. Paica, prezuna huasipimi vichai tucushca carca.

¹⁹Pai villashca shimi pactangacamanmi, chaipi carca. Mandaj Dios rimashcami Josetaca, ali cajta nali cajta ricuchijurca.

²⁰Jatun mandaj cachajpimi cacharirca. Gentecunata mandaj cachajpimi, richun saquirca.

²¹Josetaca, jatun mandajpaj huasipi mandaj cachunmi churarca. Chai mandajpaj tucui ima tiashcacunata ricushpa mandachumbashmi churarca.

²²Pai churashca mandajcunatapash, pai munashcashna cazuchijuchun, mandaj rucucunatapash ali yachaita yachachijuchunmi churarca.

²³Chai jipami, Israel nishca taita Jacobopash, Cam shuti chai Egipto llactaman yaicushpa, chai llactapi causajurca.

²⁴Chai llactapimi, pai agllashcacunataca, ashtacatapacha mirachijurca. Paicunata llaquichijcunataca, ashtahuan yali ninan shinllicunatami rurarca.

²⁵Chaipi causanajuj runacunapaj shungutapash, pai agllashcacunata na ricunayachina yuyaimanmi tigrachirca. Paita servijcunata fiñashpa nalicachishpa ricuna yuyaimanmi tigrachirca.

²⁶Chai jipaca, paita servij Moisestami, pai agllashca Aarondi cacharca.

²⁷Paicunapica, imatalla rurashpa ricuchinatami churarca. Cam shuti llactapica, jatun manllarinacunatami rurachirca.

²⁸Yana yana tutata cachajpimi, chai llactapica tucuilla amsayarca. Paipaj Shimita na cazujcunaca, na carcachu.

²⁹Chai llactapi yacucunataca, yahuarman tigrachishpami, pijicunatapash huañuchirca.

³⁰Chai llactapica, sapocunatami jundachirca. Jatun mandajcunapaj huasi ucucamanmi jundagrirca.

³¹Dios mandajpimi chuspicunapash, usacunapash fuyushna shamushpa, tucuilla llactapi jundarca.

³²Yacuta tamiachinapaj randica, rundu tamiatami curca. Paicunapaj llactapica, rupajuj ninatami cacharca.

³³Uvas chagracunatapash, jigos yuracunatapashmi tucuchirca. Paicunapaj llactapica, quirucunatapashmi faquishpa tucuchirca.

³⁴Pai mandajpi, langostacuna fahuashpa purij jurucuna ninanda jundashpami,

³⁵chai llactapica tucuilla jihuacunata micurca. Chai llactapi fucushcacunatapashmi tucuchirca.

³⁶Chai llactapi huacharishca, tucuilla punda churicunatapashmi huañuchirca. Shinlli runacuna cashpa, paicuna charishca punda churicunatami huañuchirca.

³⁷Pai agllashcacunataca culquindi, orondimi llujchirca. Paicunapaj aillucunapica, shujllapash ung:uihuanga na tiarcachu.

³⁸Egiptopi causajcunaca, israelcuna llujshijpica, ninandami cushijurca. Paicunaca, ninan manllaihuanmi causanajushca carca.

³⁹Paicunata quilpachunga, jatun fuyutami churarca. Ninatapash, tutata punchayachijuchunmi churarca.

⁴⁰Paicuna mañajpica, codorniz nishcacunatami cachamurca. Shinallata jahua pachamanda tandatami, na ushangacaman cararca.

⁴¹Jatun rumita chaupijpimi, yacucunapash llujshirca. Chaquishca pambacunatami, jatun yacucunashnami calpanajurca.

⁴²Paita servij Abrahamman, paipaj jucha illaj Shimihuan nishcata yarishpami pactachijurca.

⁴³Paipaj gentecunataca, cushijuihuanmi llujchirca. Pai agllashcacunataca, ninan cushijuihuanmi llujchirca.

⁴⁴Shuj llactacunapi causajcunapaj alpacunatami, paicunaman cararca. Chaipi runacuna tarpushcacunatapashmi cararca.

⁴⁵Pactachinajuchun pai cushca shimicunatapash cazunajuchun, mandashca shimicunatapash pactachinajuchunmi, chashna curca. Mandaj Diostami alicachina canguichi.