Read Imbabura Highland Quichua Psalms 106 Bible Online

Psalms 106 - Imbabura Highland Quichua bible

Psalms 106

¹Mandaj Diostami alicachina canguichi. Mandaj Diosta alicachinguichi, paica aligumari. Pai llaquinaca, causaita causaicamanmi.

²Ninan ushaihuan Mandaj Dios rurashcacunataca, ¿pita villanga? Paita alicachinataca, ¿pita parlanga?

³Imatapash aliguta rurashpa pactachishpa, paicunapaj tucui causaipi imatapash cashcatapacha rurajcunaca, ninandami cushijun.

⁴Mandaj Dioslla, can agllashcacunaman alita ruranshnallata, ñucatapash yarihuayari. Ñucata quishpichingapaj ricuj shamuhuayari.

⁵Can quishpichijpimi, can agllashcacunaman alita rurashcata ricusha. Cambaj gentecuna cushijujpimi cushijusha. Can carashcahuanmi cushijusha.

⁶Ñucanchica, ñucanchi ñaupa taitacunashnallatami, juchata rurashcanchi. Canda na manllashpami, jatun nalita rurashcanchi.

⁷Egiptopi jatun manllarinacunata can rurajpipash, ñucanchi ñaupa taitacunaca na yuyaita japircachu. Can ninanda llaquishcataca, na yarinajurcachu. Ashtahuangarin Puca Cucha manñapica, canda na cazushpami jariyanajurca.

⁸Shina cajpipash Diosca, paipaj shutita juyaimandami quishpichirca. Pai ninan ushaita charishcata ricuchingapajmi, chashna rurarca.

⁹Puca Cuchataca, rimashpallami chaquichirca. Chai chaquishca ucu ucutami, jichushca pambatashna chimbachirca.

¹⁰Paicunata fiñajcunapaj maquimandami quishpichirca. Huañuchingapaj munajcunapaj maquimandapashmi quishpichirca.

¹¹Paicunata fiñajcunataca, yacucuna quilpajpimi, paicuna puramandaca shujllapash na puchurca.

¹²Shina rurajpimi, pai rimashca shimicunatapash crishpa, paita alicachishpa candanajurca.

¹³Ashtahuangarin pai rurashcacunataca, ñapashmi cunganajurca. Ali yuyaita pai cuchunga, na shuyanajurcachu.

¹⁴Paicunaca, jichushca pambapimi, paicuna munashcata maitapash ruranajurca. Chulunlla pushtucunapipash, paicuna munashcata carachun mañashpami, Taita Diosta fiñachinajurca.

¹⁵Diosca, paicuna imata mañashcatami cararca. Ashtahuangarin huañuchij ung:uitapashmi, paicunapaj jahuapi cachamurca.

¹⁶Carpacunapi causanajushpaca, Moisesta fiñashpami nalita yarinajurca. Shinallata Mandaj Diospajlla causaj Aarondapashmi fiñashpa rimanajurca.

¹⁷Chaimandami Datán shuti runataca, alpa pascarishpa langarca. Abiram shuti runahuan tandanajushca gentecunatapashmi quilparca.

¹⁸Paicuna tandanajushcapica, nina japirishpami, Diosta na manllajcunataca tucuillata rupachirca.

¹⁹Horeb shuti urcupica, yacuyachishpa rurashca shicuman rijchajpaj ñaupajpimi cungurinajurca.

²⁰Chashnami, paicunapaj punchapamba Diosta yaringapaj randica, jihuata micuj huagraman rijchajta yarinajurca.

²¹Egiptopi jatun manllarinacunata ruraj, paicunata quishpichij Taita Diostaca cungarcami.

²²Cam nishca llactapi manllarinacunata rurashcatapash, Puca Cuchapi pipash na ricushcata rurashcatapashmi cunganajurca.

²³Chaimandami Diosca, tucuchingapaj munarca. Pai agllashca Moisés, paipaj ñaupajpi paita mañashpa na jarcajpica, tucuchinmanmi carca. Fiñarishcata yalichishpa, ama tucuchijuchunmi mañashpa jarcarca.

²⁴Ashtahuangarin paicunaca, Dios carashapacha nishcata na crishpami, munanayai llactataca na munarca.

²⁵Ashtahuangarin paicunapaj carpacunapipash, fiñashpa nalicachishpami, Mandaj Dios rimashca Shimicunatapash na uyanajurca.

²⁶Chaimandami jichushca pambapi, paicunata llaquichingapaj maquita alsarca.

²⁷Pai agllashcacunataca, shuj llactacunaman caita chaita cachashpa pingaichingapajmi, chashna rurarca.

²⁸Paicunaca, paicunapaj munaillatami Baal-peor shuti diosta yaringapaj tandanajurca. Huañushcacunaman animalcunata carashpa huañuchishpami, chai aichata micunajurca.

²⁹Paicuna chashna nalita rurashpami, Taita Diostaca fiñachinajurca. Chaimandami paicuna purapica, huañuica ashtahuan mirarca.

³⁰Chaimandami Finees runa jatarishpaca, nalita rurajtaca huañuchirca. Chashna huañuchijpimi, chai huañuchijuj llaquica jarcarirca.

³¹Shinamandami, imatapash cashcatapacha pai rurashcamandaca, mirai miraicunacaman tucui causaipi alicachi tucunajurca.

³²Meriba yacu manñacunapipashmi, Diosta fiñachinajurca. Paicunamandami, Moisespash llaquichi tucurca.

³³Paipaj yuyaita ninanda fiñachijpimi, Moisesca imapash cachun rimajurca.

³⁴Tucuchinajuchun nishpa, Mandaj Dios mandashca gentecunataca na tucuchircachu.

³⁵Ashtahuangarin shuj llactapi causajcunahuan tandanajushpami, paicuna imatalla rurashcata yachajushpa yachajushpa ruranajurca.

³⁶Chai runacunapaj yanga dioscunatami servinajurca. Chai dioscunami, llaquipi churarca.

³⁷Paicunapaj churicunata, ushicunataca, ayacunaman carashpami huañuchinajurca.

³⁸Imatapash nara yachaj paicunapaj churicunapaj, ushicunapaj yahuartami jichanajurca. Paicunatami, Canaán llactapi tiaj yanga dioscunaman carashpa huañuchinajurca. Chai yahuarhuanmi, llactaca mapayarca.

³⁹Chashnami, paicuna nalicunata rurashcacunahuan mapayarca. Paicuna rurashcacunahuanmi huainayanajurca.

⁴⁰Chaimandami Mandaj Diosca, pai agllashcacunahuanga nina japirinshna ninandapacha fiñarirca. Paipajlla cashcataca millanayachircami.

⁴¹Shuj llactapi causajcuna mandachunmi curca. Paicunata millanayachij runacunami, paicunataca mandanajurca.

⁴²Paicunata fiñajcunami llaquichinajurca. Paicunapaj maquipimi, ninanda llaquichi tucunajurca.

⁴³Cutin cutinmi, paicunataca cacharichirca. Ashtahuangarin paicunaca, ali yuyaita cujpipash na cazunajurcachu. Paicuna nalita rurashcamandallatami, pingai tucunajurca.

⁴⁴Shina cajpipash paicuna ninan llaquipi causanajujtaca, Diosca ricujurcami. Paicuna caparishpa mañanajujtapash uyarcami.

⁴⁵Paicunahuan ari ninajushcatapash yarircami. Paica, ninanda llaquij cashcashnallatami, ninanda llaquirirca.

⁴⁶Shinallata paicunata prezushpa tucui charijujcunamambash, chai prezu tiajcunata llaquina yuyaitami curca.

⁴⁷Ñucanchita Mandaj Taita Dioslla, ñucanchitaca quishpichiyari. Llacta chaupicunamanda tandachiyari. Cambaj jucha illaj shutita alicachingapaj, canda alicachishpa cushijungapaj chashna rurapairi.

⁴⁸Israelcunata Mandaj Taita Diosca, na tucurina causaita causaicaman alicachi tucuchun. Chaitaca tucuicuna: “Shina cachun” ninajuchun. Mandaj Diostami alicachina canguichi.