Read Imbabura Highland Quichua Psalms 107 Bible Online

Psalms 107 - Imbabura Highland Quichua bible

Psalms 107

¹Mandaj Diosta alicachinguichi, paica aligumari. Pai llaquinaca, causaita causaicamanmi.

²Mandaj Dios quishpichishcacunaca, fiñaj runapaj maquimanda cacharichi tucushcacunami canguichi. Shinamandami, paita alicachina canguichi.

³Tucui cai pachamandami tandachimurca. Indi llujshimuj ladomanda, indi huashajuj ladomanda, jahua ladomanda, urai ladomandami tandachimurca.

⁴Ñambash illaj, jichushca pambapi, chulunlla pushtupimi, chingashca purinajurca. Maipi causana pueblopash na taririjpimi purinajurca.

⁵Yarjaimanda, yacunayaimanda ña huañunallacunami purinajurca.

⁶Chashna ninan llaquipi cashpami, Mandaj Diostaca caparishpa mañanajurca. Paimi, chai llaquicunamandaca llujchirca.

⁷Ali ñandami, paicunataca pushamurca. Causanalla pueblopi causaj shamuchunmi pushamurca.

⁸Mandaj Dios ninanda llaquishcamandaca alicachinguichi. Huañuna aichayu runacunaman, jatun manllarinacunata rurashcamandapash alicachinguichi.

⁹Imagupash illajmambash, na munangacamanmi caran. Yarjachijmambash, ashtaca alicunatami caran.

¹⁰Huaquingunaca, yana yana tutapi, huañui japinalla llandupimi causanajurca. Llaquichi tucushpa, cadenacunahuan huatai tucushpami tianajurca.

¹¹Mandaj Dios rimashca shimicunata, paicunallata na cazushcamandami, chashna tianajurca. Jahua pachapi causajuj Dios ali yuyaiguta cushcatapash, na uyanayachircachu.

¹²Chaimandami shinlli ruranacunapi churajpi, paicunaca shungu faquirinshna llaquita apanajurca. Paicuna urmajpi jatarichingapaca, pipash na tiarcachu.

¹³Shina ninan llaquipi cashpami, Mandaj Diostaca caparishpa mañanajurca. Paimi, chai llaquicunamandaca llujchirca.

¹⁴Yana yana tutamandapash, huañui japinalla llandumandapashmi llujchirca. Imahuan huatashcatapash fitircami.

¹⁵Mandaj Dios ninanda llaquishcamandaca alicachinguichi. Huañuna aichayu runacunaman, jatun manllarinacunata rurashcamandapash alicachinguichi.

¹⁶Paica, bronce pungucunataca faquircallami, jirru aldabacunatapash ñuturcallami.

¹⁷Juizu illajcunaca, paicunallata na cazushpa causashcamandami, llaquichi tucunajurca.

¹⁸Paicunapaj shungupica, tucui micunatami millanayachirca. Shina cashpami, huañuna punguman ña chayanajurca.

¹⁹Shina llaquipi cashpami, Mandaj Diosta caparishpa mañanajurca. Paimi, chai llaquicunamandaca llujchirca.

²⁰Paipaj shimihuan rimashpa alichishpami, jatun llaquimandaca llujchirca.

²¹Mandaj Dios ninanda llaquishcamandaca alicachinguichi. Huañuna aichayu runacunaman, jatun manllarinacunata rurashcamandapash alicachinguichi.

²²Paiman animalcunata cushpa huañuchishpa alicachinguichi. Pai ima alicunata rurashcataca, cushijushpa villaichi.

²³Mama cuchata jatun barcocunapi urai shamushpa, randishpa jatujcunaca,

²⁴paicunami Mandaj Dios imatalla rurashcacunataca ricunajurca. Shinallata yacu ucucunapi jatun manllarinacunata rurashcatapashmi ricunajurca.

²⁵Pai rimashpami, ninan huairata jatarichirca. Chai huairami, caiman chaiman cuyurijuj yacutapash ashtahuan jatarichirca.

²⁶Jahua pachacaman vichai rinshnapash, manllanayai ucu ucu yacucunaman huashajunshnapashmi tucunajun. Paicunapaj shunguca, jatun llaquipimi yacuyanshna tucun.

²⁷Manllaimanda chujchushpami, machashcashna cuandranajun. Paicuna tucuita ali yachajushcapash yangallatami.

²⁸Chashna llaquipi cashpami, Mandaj Diosta caparishpa mañanajun. Paimi, chai llaquicunamandaca llujchin.

²⁹Paimi, ninanda huairajujtaca saquichishpa, caiman chaiman cuyurijuj yacutapash, casilla cachun ruran.

³⁰Yacu casilla tucujpimi cushijunajun. Chashnami Diosca, barcocuna shayarina paicuna munashca pushtuman chayachin.

³¹Mandaj Dios ninanda llaquishcamandaca alicachinguichi. Huañuna aichayu runacunaman, jatun manllarinacunata rurashcamandapash alicachinguichi.

³²Tucui gentecuna tandanajushcapi jatunyachinguichi. Mandaj rucucuna tandanajushcapipash alicachinguichi.

³³Diosca, jatun yacutapash, jichushca pambata ruranllami. Yacucuna llujshijujtapash chaquichinllami.

³⁴Grano fucuj ali alpacunatapash, na fucuj alpaman tigrachinllami. Chai alpapi causajcuna jatun nalita rurashcamandami, chashna ruran.

³⁵Jichushca pambapipash, yacu cuchata ruranllami. Chaquishca pambapipash, yacu llujshijujta ruranllami.

³⁶Chaipimi, yarjachijcunata causachun churan. Paicunami, causana pueblota rurashpa callarichin.

³⁷Pambacunapi tarpushpami, uvascunata tarpunajun. Chaicunaca, ashtaca granocunatami fucunajun.

³⁸Chaicunaca, Dios bendiciajpimi, ashtacapacha miranajun. Paicunapaj animalcunapash, na tucurinllu.

³⁹Chai jipaca, yangapi churai tucushpa, pingaichi tucushpami causanajun. Jatun millai nali runacuna jatun llaquicunahuan ninanda llaquichijpimi, chashna causanajun.

⁴⁰Yangapi churai tucunataca, Diosllatami tsirapachinshna, mandajcunapaj jahuapi cachamun. Shinami paicunataca chingashca, ñambash illaj, yanga purinajuchun saquin.

⁴¹Paillatami imagutapash na charij runataca, llaqui causaimanda jatarichin. Familiacunatapash, corralpi llamatashnami mirachin.

⁴²Ima nalitapash na rurajcunaca, chaita ricushpa cushijuichi. Nalita tucui rurajcunaca, shimita vichaichi.

⁴³Caicunata pactachingapaca, ¿pipash ali yachajushca tianllu? Shina tiashpaca, Mandaj Dios ninanda llaquij cajta yachangami.