Read Imbabura Highland Quichua Psalms 109 Bible Online

Psalms 109 - Imbabura Highland Quichua bible

Psalms 109

¹Candajcunata mandaj candachijuchun, David rurashca Salmomi. Ñuca alicachina Taita Dioslla, ama upalla capaichu.

²Canda na manllaj runapash, umachij runapashmi ñucata fiñashpa rimanajurca. Ñucamandaca, llulla jalluhuanmi parlanajurca.

³Ñucata na ricunayachishpami, nali shimicunahuan muyundi rimanajurca. Shinallata yangamandami, ñucahuan macanajunajurca.

⁴Paicunata ñuca juyashcamandaca, ñucata fiñajcunami tucunajurca. Ashtahuangarin ñucaca, candami mañajurcani.

⁵Paicunaman alita rurashcamandaca, nalitami tigrachihuan. Paicunata juyashcamandaca, ninandami na ricunayachihuan.

⁶Paita llaquichijuchunga, canda na manllaj runata churapai. Paipaj ali ladopica, Satanás shayajuchun.

⁷Juezpaj ñaupajpi tapuchijpica, llaquitaca apanallata llujshichun. Pai canda mañashcapash, juchallata ricurishca cachun.

⁸Pai causana punllacunapash, ashalla cachun. Pai ruranataca, shuj runa japichun.

⁹Paipaj huahuacunaca, taita mama illaj tucuchun. Paipaj huarmipash, sapalla tucuchun.

¹⁰Paipaj huahuacunaca, maipipash purishpa mañanajuchun. Llaquinayaita tucuchi tucushca paicunapaj huasicunamandaca, caruman llujshishpa micunata mascanajuchun.

¹¹Tucui imata charishcataca, culquita paiman mañachij runa apachun. Pai imatalla rurashpa imata charishcacunatapash, na rijsishcacuna apanajuchun.

¹²Paita llaquichunga, pitapash ama charichun. Taita mama illaj tucushca paipaj huahuacunata llaquijpash, ama tiachun.

¹³Paipaj jipa miraicunaca, tucurishca cachun. Cati miraipica, paipaj shutipash anchuchi tucushca cachun.

¹⁴Paipaj taitacuna jatun nalita rurashcataca, Mandaj Diospash yariajuchunlla. Paipaj mamapaj juchatapash, ama anchuchishca cachun.

¹⁵Chai juchacunaca, tucui causaipi Mandaj Diospaj ñaupajpi tiachun. Cai pachapi paita ama ashtahuan yarinajuchunga, Diosllata anchuchijuchun.

¹⁶Llaquinataca, yaritapash na yarishcamandami chashna tucunga. Ashtahuangarin llaquilla causaj, imagupash illaj runagutami catiriashpa llaquichijurca. Llaquilla shunguhuan causaj runataca, huañuchingapajmi catiriajurca.

¹⁷Pitapash llaqui japichun munashpallami purirca. Chai llaquica, paipaj jahuapillatami shamurca. Bendiciachunga na munarcachu. Chaimandami bendiciai tucunaca, paimandapash anchurirca.

¹⁸Ninanda nalicachi tucushca canataca, churajunata churajunshnami churajurca. Paipaj vijsa ucumambash, yacushnami yaicurca. Tullucunapipash, aceiteshnami yaicurca.

¹⁹Shinallata pai churajushpa quilparinashna cachun. Chumbipaj randica, tucui causaipi chaihuan chumbilirinshna causachun.

²⁰Ñucata fiñashpa rimajcunataca, Mandaj Diosca chashna llaquichijuchun. Ñucata nalicachishpa rimajcunatapash, chashnallata llaquichijuchun.

²¹Ñucata Mandaj Jatun Dioslla. Canga, cambaj shutita juyaimanda ñucata ayudahuayari. Cambaj llaquinaca aligumari, cacharichihuayari.

²²Ñucaca, llaquilla causaj imagupash illajmari cani. Ñuca shungupash, chugrishcamari cani.

²³Llandu yalijunshnami, ñucaca tucurijuni. Langosta jurushnami, caiman chaiman apai tucujuni.

²⁴Na micushcamanda, ñuca cunguricunapash chujchujunmari. Ñuca aichapash, vira illajpimi jamziyashpa tucurijun.

²⁵Ñucaca, paicunapaca nalicachishpa rimai tucunapajllami carcani. Ñucata ricushpaca, umata cuyuchishpami asishpa ricunajurca.

²⁶Ñucata Mandaj Taita Dioslla, ayudahuayari. Can llaquij cashcashnallata quishpichihuayari.

²⁷Chashna rurajpimi, cambaj maquihuan rurashcata yachanajunga. Can Mandaj Diosllata, chashna rurashcatami yachanajunga.

²⁸Paicunaca, llaqui japishpami ali canman nijpipash, canga bendiciapanguilla. Llaquichingapaj jatarijcunaca, pingai tucushca cachun. Ashtahuangarin canda servijca, cushijushca cachun.

²⁹Ñucata yangata juchachijcunaca, ninanda pingai tucunahuan churajushcashna cachun. Pandachi tucunahuanga, jahualla churajunahuan quilpachi tucushcashna cachun.

³⁰Ñucapash, ñuca shimihuanga, Mandaj Diostami ninandapacha alicachisha. Ashtaca gentecunapaj chaupipimi alicachisha.

³¹Paica, imagutapash na charij runapaj ali ladomanmi shayaringa. Juchachishpa llaquichij runacunamanda, paipaj almata quishpichingapajmi shayaringa.