Read Imbabura Highland Quichua Psalms 11 Bible Online

Psalms 11 - Imbabura Highland Quichua bible

Psalms 11

¹Candajcunata mandaj candachijuchun, David rurashca Salmomi. Mandaj Diosta yariashpami causajuni. ¿Imashpata ñuca almataca, cashna ninajunguichi?: “Alasyu animalshna urcupi pacajugri.

²Ricui, nalicunaca arcota ña chutashcallami shuyanajun. Arcopi flechata ña churashcallami charinajun. Alitapacha shungupi yarijcunata flechahuan pacalla huañuchingapajmi, chashna charinajun.

³Ucu callari rumicunata anchuchishpa tucuchijpica, imatapash cashcatapacha ruraj runaca, ¿imatashi rurai ushanman?” ninajunguichimi.

⁴Mandaj Diosca, paipajlla huasipimi tiajun. Mandaj Diosca jahua pachapimi, pai mandashpa tiarinataca charin. Chaipi tiajushpami, huañuna aichayu runacuna imashna cajtaca, paipaj ñavihuan ricujun.

⁵Mandaj Diosca, imatapash cashcatapacha ruraj runataca, imashna cajta ricuriajunmi. Ashtahuangarin nalita ruraj runata ninandapacha llaquichingapajlla munaj runataca, tucui shunguhuanmi millanaynachin.

⁶Mandaj Diosca, nalicunapaj jahuapica, llaquicunatami tamiachinga. Paicuna japina copaca, nina, azufre, ima tiashcata tucuchij huairami canga.

⁷Mandaj Diosca, imatapash cashcatapacha rurajmi. Imatapash cashcatapacha ruranata juyajmi. Paipaj ñavitaca, aligutalla ruraj runami ricunga.