Read Imbabura Highland Quichua Psalms 115 Bible Online

Psalms 115 - Imbabura Highland Quichua bible

Psalms 115

¹Mandaj Dioslla, na ñucanchitaca alicachinachu cangui, ama ñucanchita alicachinguichu. Ashtahuangarin cambaj punchapamba shutita alicachipai. Can llaquij, na llullaj cashcamanda chashna rurapai.

²¿Imashpata gentecunaca: “¿Cunanga, paipaj Taita Diosca maipitayari?” ninajunga?

³Ñucanchi Taita Diosca, jahua pachapimi. Paica, tucui ima munashcatami rurashca.

⁴Paicunapaj yanga dioscunaca orota, culquita, runacunapaj maquihuan rurashcacunami.

⁵Shimita charishpapash, na parlanajunllu. Ñavita charishpapash, na ricunajunllu.

⁶Rinrita charishpapash, na uyanajunllu. Singata charishpapash, na ashnachinajunllu.

⁷Maquita charishpapash, na tacanajunllu. Chaquita charishpapash, na purinajunllu. Cungata charishpapash, na rimanajunllu.

⁸Chai dioscunata rurajcunaca, paicunaman rijchajcunami. Pipash chai dioscunata yariashpa causajpash, chaicunashnallatami.

⁹Israelcunalla, Mandaj Diosta yariashpa causaichi. Paimi, cangunata ayudaj, canguna jarcarina escudo.

¹⁰Aaronbaj miraicuna, Mandaj Diosta yariashpa causaichi. Paimi, cangunata ayudaj, canguna jarcarina escudo.

¹¹Mandaj Diosta manllajcunaca, Mandaj Diosta yariashpa causaichi. Paimi, cangunata ayudaj, canguna jarcarina escudo.

¹²Mandaj Diosca, ñucanchita yarircami, ñucanchitaca bendiciangami. Taita Israelpaj miraicunataca bendiciangami. Aaronbaj miraicunatapash bendiciangami.

¹³Mandaj Diosca, paita manllajcunataca, uchillacunatapash, jatungunatapash bendiciangami.

¹⁴Mandaj Diosca cangunataca, ashtahuan ashtahuanmi bendicianga. Cangunatapash, cangunapaj miraicunatapashmi bendicianga.

¹⁵Cangunaca jahua pachata, cai pachata ruraj Mandaj Dios bendiciashcami canguichi.

¹⁶Jahua pachaca, Mandaj Diospaj jahua pachami. Cai pachataca, huañuna aichayu runacunamanmi cushca.

¹⁷Huañushcacunaca, Mandaj Diostaca na alicachingachu. Chulunllaman urai rijcunaca, na alicachingachu.

¹⁸Ashtahuangarin ñucanchica, Mandaj Diostami cunanmanda causaita causaicaman alicachishun. Mandaj Diosta alicachinguichi.