Read Imbabura Highland Quichua Psalms 116 Bible Online

Psalms 116 - Imbabura Highland Quichua bible

Psalms 116

¹Mandaj Diostami juyajuni. Paimi, ninandapacha ñuca mañajujtaca uyahuashca.

²Paica, ñucataca aligutami uyahuarca. Chaimandami, tucui ñuca causajui punllacunapi mañajusha.

³Huañuica, huatashpami muyundi charijuhuarca. Seolmanda ninan llaquicunami ñucata tuparimurca. Ninan llaquita, nanaitallami tarircani.

⁴Chaimandami, Mandaj Diospaj shutipi mañashpa, cashna nircani: “Mandaj Dioslla, cunanga ñuca almata quishpichihuayari” nircanimi.

⁵Mandaj Diosca, ninanda juyaj, imatapash cashcatapacha rurajmi. Ari, ñucanchi Taita Diosca llaquijpachami.

⁶Mandaj Diosca, na jariyajcunatami huacaichijun. Ñucataca, huañunalla sirijujtami quishpichihuarca.

⁷Ñuca almalla, cambaj samanaman tigramupailla. Mandaj Diosca, alitami rurashca.

⁸Canmi, ñuca almataca huañuimanda cacharichircangui. Ñuca ñavimanda viquitapash, ñuca chaqui lluchanatapashmi charihuarcangui.

⁹Runacuna causanajuj cai pachapica, Mandaj Diospaj ñaupajpimi purijusha.

¹⁰Manllanayai llaquihuan cashpami, crishpa cashna rimarcani.

¹¹Llaquihuan musparijushpami: “Tucui runacunami llullacuna” nircani.

¹²Mandaj Dios ñucaman tucui alicunata rurashcamandaca, ¿imatata paiman cupashayari?

¹³Quishpichishcata ricuchijuj copata japishpami, Mandaj Diospaj shutipi mañajushalla.

¹⁴Cunanga, Mandaj Diosman carashapachami nishcataca, tucui pai agllashcacunapaj ñaupajpimi cusha.

¹⁵Mandaj Diospaj ricuipica, paipajllacuna huañushpaca, ninan valishcami.

¹⁶Mandaj Dioslla, ñucaca canda servijpachami capani. Canda servij huarmipaj churi, canda servijmi capani. Canmi, ñuca huatai tucushcataca fitishcangui.

¹⁷Candaca alicachishpami, animalta canman carashpa huañuchishpa, Mandaj Dios cambaj shutipi mañasha.

¹⁸Cunanga, Mandaj Diosman carashapachami nishcataca, tucui pai agllashcacunapaj ñaupajpimi cusha.

¹⁹Mandaj Diospaj huasi patiocunapimi cusha. Jerusalenlla, cambaj chaupipimi cusha. Mandaj Diosta alicachinguichi.