Read Imbabura Highland Quichua Psalms 118 Bible Online

Psalms 118 - Imbabura Highland Quichua bible

Psalms 118

¹Mandaj Diosta alicachinguichi, paica aligumi. Pai llaquinaca, causaita causaipajmi.

²Cunanga, israelcuna: “Dios llaquinaca, causaita causaipajmi” nichiyari.

³Cunanga, Aaronbaj miraicunapash: “Dios llaquinaca, causaita causaipajmi” nichiyari.

⁴Cunanga, Mandaj Diosta manllajcunapash: “Dios llaquinaca, causaita causaipajmi” nichiyari.

⁵Ninan llaquihuan cashpaca, Mandaj Diostami mañajurcani. Mandaj Diosca ñucata uyashpami, ali pushtupi churahuarca.

⁶Mandaj Diosca ñucahuan cajpimi, maijan runa ñucata llaquichinatapash na manllasha.

⁷Mandaj Diosca, ñucahuanmi. Ñucata ayudaj puracunapaj chaupipimi. Chashna cajpimi, ñucata na ricunayachij runacunataca, ñuca munashcashna llaquita apanajujta ricujusha.

⁸Runata yariashpa causangapaj randica, Mandaj Diosta yariashpa causanami ashtahuan ali.

⁹Mandajcunata yariashpa causangapaj randica, Mandaj Diosta yariashpa causanami ashtahuan ali.

¹⁰Tucui llactacunapi causajcunami, ñuca muyundipi shayarimurca. Ashtahuangarin ñucarami, Mandaj Diospaj shutipi tucuchisha.

¹¹Muyundi shayarishpami, ñucataca chapanajurca. Ashtahuangarin ñucarami, Mandaj Diospaj shutipi tucuchisha.

¹²Balun chuspicunashnami chaupipi churahuarca. Casha rupajunshnami, ninanda fiñanajuhuarca. Ashtahuangarin ñucarami, Mandaj Diospaj shutipi tucuchisha.

¹³Ñuca urmachunmi, shinllita t'angahuarcangui. Ashtahuangarin Mandaj Diosmi ayudahuarca.

¹⁴Ñucata shinllichij, ñuca candana Mandaj Diosmi. Paimi ñucata quishpichin.

¹⁵Imatapash cashcatapacha rurajcunapaj carpacunapica, ninanda cushijushpa caparinajujpash, quishpichishcamanda candanajujpashmi uyarin. Mandaj Diospaj ali lado maquica, jatun alicunatami ruran.

¹⁶Mandaj Diospaj ali lado maquica, jatun ushaitami charin. Mandaj Diospaj ali lado maquica, ninan shinllicunatami ruran.

¹⁷Na huañushachu, ashtahuangarin causashami. Mandaj Dios imatalla rurashcacunatapash parlashami.

¹⁸Mandaj Diosca, shinllitapachami llaquichihuarca. Shina cashpapash huañuchunga, na saquihuarcachu.

¹⁹Imatapash cashcatapacha rurangapaj yaicuna punguta pascapaichi. Chaita yaicushpami, Mandaj Diosta alicachijusha.

²⁰Cai punguca, Mandaj Diospajmi. Cai pungutami, imatapash cashcatapacha rurajcunaca yaicunajunga.

²¹Ñucata uyashcamandami, candapash alicachijusha. Canmi ñucataca quishpichihuarcangui.

²²Huasichijcuna nalicachishpa shitashca rumillatami, huasichi callaringapaj huasi pirca tigranapi churana jatun rumi tucushca.

²³Mandaj Diosmi cashnataca rurashca. Cashna rurashcata ricushpaca manllarinchimi.

²⁴Cunanga, Mandaj Dios alicunata rurashca punllami. Paihuanmi, ninanda cushijushunchi.

²⁵Mandaj Dioslla, cunanda quishpichihuayari nishpami ninanda mañapani. Mandaj Dioslla, cunanda ñucanchitaca tucuipi alipi llujchihuayari nishpami ninanda mañapani.

²⁶Mandaj Diospaj shutipi shamujca, bendiciai tucushca cachun. Mandaj Diospaj huasimandapachami, cangunataca bendicianchi.

²⁷Mandaj Diosmi, Taita Diospacha. Paimi, ñucanchiman michaguta curca. Paiman carashca huañuchina animalcunataca, altar cachucunapi cabiahuan huataichi.

²⁸Canga, ñuca Taita Diosmi cangui, candami alicachijusha. Ñuca Taita Dioslla, candallami jatunyachijusha.

²⁹Mandaj Diosta alicachinguichi, paica aligumi. Pai llaquinaca, causaita causaipajmi.