Read Imbabura Highland Quichua Psalms 119 Bible Online

Psalms 119 - Imbabura Highland Quichua bible

Psalms 119

¹[1] Mandaj Dios mandashcata catishpa, ima pandatapash na rurashpa causajcunaca, ninandami cushijun.

²Imashna causanata yachachishcata pactachishpa, tucui shunguhuan paita mascajcunaca ninandami cushijun.

³Pai yachachishcashna causajcunaca, ima nalitapash na ruranllu.

⁴Can mandashcacunata aliguta pactachinajuchunga, canllatami mingarcangui.

⁵¡Pactachinajuchun can cushca shimicunata pactachishpa causangapaca, ñuca causaitara alichishca cashpami ali caiman!

⁶Shina rurajpica, can mandashcacunata tucuita pactachijushpaca, napacha pingai tucuimanllu.

⁷Imatapash cashcatapacha rurashpa, aliguta ricushpa can mandashcacunata yachajushpami, ñuca shungupica, alitalla yarishpa alicachisha.

⁸Pactachinajuchun can cushca shimicunataca pactachishami. Ñucataca, ama saquitapacha saquihuaichu.

⁹Chairalla viñai huambraguca, ¿imahuanshi paipaj causaipica, mapa illaj canga? Cambaj Shimita cazushpallami, mapa illaj canga.

¹⁰Ñuca tucui shunguhuanmi, candaca mascarcani. Can mandashcacunamanda anchurichunga, ama saquihuaichu.

¹¹Juchata rurashpa canda ama fiñachingapaca, can rimashcacunatami ñuca shungupi alichircani.

¹²Mandaj Dioslla, canga alicachi tucushcami cangui. Pactachinajuchun can cushca shimicunataca yachachihuayari.

¹³Aliguta ricushpa, cambaj shimihuan mandashcacunataca, ñuca shimihuanmi villarcani.

¹⁴Imashna causanata can yachachishcata catishpami, tucui imata charinacunahuan cushijunatapash yali cushijurcani.

¹⁵Can mandashcacunatami, aligutapacha yariajusha. Cambaj ñambimi purijusha.

¹⁶Pactachinajuchun can cushca shimicunahuanga cushijushami. Cambaj Shimicunataca na cungashachu.

¹⁷Canda servij causaita charichun, cambaj Shimita pactachijuchunga alita rurapairi.

¹⁸Can mandashca juyailla Shimita ricungapaca, ñuca ñavita pascapairi.

¹⁹Cai pachapica, caru llactamanda shamushca runashnami cani. Can mandashcacunataca, ñuca ñaupajmanda ama pacapaichu.

²⁰Ñuca almaca, aliguta ricushpa can mandashcacunata, punllandi yachangapaj munashpami ninanda llaquirijun.

²¹Can mandashcacunamanda anchurishpa jariyashpa, ninanda nalicachi tucushcacunataca jarcashpami rimarcangui.

²²Nalicachishpa rimai tucunatapash, yangapi churai tucunatapash, ñucamanda anchuchipairi. Ñucaca, imashna causachun can yachachishcacunatami cazurcani.

²³Mandajcunapashmi paicunapura tiarishpa, ñucataca nalicachishpa rimanajurca. Ashtahuangarin canda servij ñucaca, pactachinajuchun can cushca shimicunatami, aligutapacha yariajurcani.

²⁴Imashna causanata can yachachishcacunami, ninanda cushichihuan. Chaicunaca, ali yuyaitapashmi cuhuan.

²⁵Ñuca almaca, ñutu alpaman chayajta cumurishcami, llaquita apajun. Cambaj Shimipi nijunshnallata, causaita carahuayari.

²⁶Ñuca imashna causajushcataca, canmanmi villarcani. Canga tigrachihuarcanguimi. Pactachinajuchun can cushca shimicunataca yachachihuayari.

²⁷Juyaillacunata can rurashcata yaringapaca, can mandashcacunapi imashna causanata yachachihuayari.

²⁸Ñuca almaca, llaquihuanmi tucurijun. Cambaj Shimipi nijunshnallata shinllichihuayari.

²⁹Llullashpa causanataca, ñucamanda anchuchihuayari. Can llaquij cashcamanda, can mandashcata cuhuayari.

³⁰Na llullashpa causanatami agllarcani. Aliguta ricushpa can mandashcacunatami, ñuca ñaupajpi charini.

³¹Imashna causanata can yachachishcacunapimi quimirircani. Mandaj Dioslla, ama pingaichihuaichu.

³²Ñuca shunguta can ninanda cushichijui punllapica, can mandashcacunata ricuchijuj ñambimi calpajusha.

³³Mandaj Dioslla, pactachinajuchun can cushca shimicunata cazushpa causanata yachachihuayari. Chaitaca, ñuca tucui causaipimi alichisha.

³⁴Ali yuyaita cuhuayari. Can mandashcataca cazushallami. Chaitaca, tucui shunguhuanmi pactachijusha.

³⁵Can mandashcacunapi nijunshnallata pushahuayari. Chaicunahuanmi cushijuni.

³⁶Ñuca shungutaca, imashna causanata can yachachishcata cazujta rurapairi. Charijyanatalla munashpa causachunga, ama saquihuaichu.

³⁷Ñuca ñavitapash, imapash yangacunatara ricunamandaca anchuchihuayari. Cambaj ñambi ali catingapaj shinllichihuayari.

³⁸Manllaihuan canda servijtaca, shinllitapacha cambaj Shimita pactachipairi.

³⁹Nalicachishpa rimai tucunata ñuca manllashcataca anchuchipairi. Aliguta ricushpa can mandashcacunaca, alipachami capan.

⁴⁰Ricui, ñucaca can mandashcacunatami yachangapaj munarcani. Canga, imatapash cashcatapacha ruraj canahuan causaita cuhuayari.

⁴¹Mandaj Dioslla, can llaquinatapash, can quishpichinatapash, can nijunshnallata cachamupairi.

⁴²Shina rurajpimi, ñucata pingaichijmanga, cambaj Shimita yariashpa causashcata villai ushasha.

⁴³Cambaj na llullaj Shimitaca, ima horapash ñuca shimimandaca, ama anchuchipaichu. Ñucaca, aliguta ricushpa can mandashcacunata catingapajmi shuyajuni.

⁴⁴Ñuca tucui causaipi, causaita causaicamanmi can mandashcataca pactachijusha.

⁴⁵Can mandashcacunata mascashcamandaca, pipash na llaquichijpimi purijusha.

⁴⁶Imashna causanata can yachachishcataca, jatun mandajcunapaj ñaupajpi parlajushpapash, na pingai tucushachu.

⁴⁷Can mandashcacunapimi cushijusha. Chai mandashcacunatami juyarcani.

⁴⁸Shinallata ñuca juyashca, can mandashcacunata pactachingapajmi, ñuca maquita alsashpa mañasha. Pactachinajuchun can cushca shimicunatami, aligutapacha yarijusha.

⁴⁹Canda servij ñucaman cushca cambaj Shimipi nijujtaca yaripairi. Chaita yariashpa causachun, ñucata can shuyachishcataca yaripairi.

⁵⁰Ñuca llaquihuan cajpica, chai Shimimi cushichihuan. Can rimashca Shimimi, ñucaman causaita cuhuan.

⁵¹Jariyashcacunaca, ñucata ninandami nalicachishpa asinajurca. Ashtahuangarin can mandashcamandaca, na anchurishcanichu.

⁵²Mandaj Dioslla, aliguta ricushpa ñaupa huatacunapi can mandashcacunata yarishpami cushijurcani.

⁵³Can mandashcamanda anchurishpa nalicuna tucujta ricushpami, ninan manllai japihuarca.

⁵⁴Caru llacta huasipi ñuca mingarishca tiajujpipash, pactachinajuchun can cushca shimicunaca ñucapaca candanami carca.

⁵⁵Mandaj Dioslla, cambaj shutitaca, tutacunapash yariashpami, can mandashcataca pactachijurcani.

⁵⁶Can mandashcacunata pactachishcamandami, cashna bendiciai tucurcani.

⁵⁷Mandaj Diosmi, tucui imatapash ñucaman carahuan. Cambaj Shimipi nijujtaca pactachishami niparcanimi.

⁵⁸Can ñucaman ricurichunga, tucui shunguhuanmi mañajurcani. Cambaj Shimipi nijunshnallata llaquihuayari.

⁵⁹Ñuca imashna causajushcataca, aligutapacha yarishpami, imashna causanata can yachachishcata catingapaj tigrarircani.

⁶⁰Can mandashcacunataca, na unayashpami ucha pactachijurcani.

⁶¹Canda na manllajcunami tandanajushpa, ñuca muyundipi carca. Ashtahuangarin can mandashcataca, na cungarcanichu.

⁶²Imatapash cashcatapacha rurashpa, aliguta ricushpa can mandashca shimicunamandami, chaupi tuta jatarishpa canda alicachijuni.

⁶³Ñucaca, canda tucui manllajcunapaj, can mandashcacunata pactachijcunapaj cumbami cani.

⁶⁴Mandaj Dioslla, cai pachaca cambaj juyaihuan jundami. Pactachinajuchun can cushca shimicunataca yachachihuailla.

⁶⁵Mandaj Dioslla, canda servij ñucahuanga, cambaj Shimipi nijunshnallatami aliguta rurashcangui.

⁶⁶Ali yuyaita, ali yachaita carahuayari. Can mandashcacunataca, crishpami causajurcani.

⁶⁷Ñuca nara pingai tucushpa, urai cumurishpaca, chingashcami purijurcani. Ashtahuangarin cunanga, cambaj Shimita pactachishpami causajuni.

⁶⁸Canga alimi cangui, imatapash alita rurajmi cangui. Pactachinajuchun can cushca shimicunataca yachachihuailla.

⁶⁹Jariyashca runacunami ñucata fiñashpa, llullashpa juchachinatalla yarinajurca. Ashtahuangarin ñucaca, tucui shunguhuanmi can mandashcacunataca pactachijusha.

⁷⁰Paicunapaj shunguca, virayashpa racuyanshnami shinlliyashca. Ashtahuangarin ñucaca, can mandashcahuanmi cushijushcani.

⁷¹Alipajmi pingaichishpa, urai cumuchihuashcangui. Pactachinajuchun can cushca shimicunata yachajuchunmi, chashna rurahuashcangui.

⁷²Ñucapaca, cambaj shimihuan mandashcacunaca, mashna huaranga huaranga orota, culquitapash yali aligumari.

⁷³Cambaj maquihuan rurashpami churahuarcangui. Can mandashcacunata yachachihuayari, yachajushallami.

⁷⁴Canda manllajcuna ñucata ricushpaca, cushijunajungami. Cambaj Shimipi nijujtami shuyajurcani.

⁷⁵Mandaj Dioslla, imatapash cashcatapacha rurashpa, aliguta ricushpa can mandashcacunataca rijsipanimi. Imashna can imatapash pactachijunshnallatami llaquichihuarcangui.

⁷⁶Cunanga, canda servij ñucaman imashna nijunshnallata, llaquishpa cushichihuayari.

⁷⁷Ñuca causai ushangapaca, can llaquishpa ayudahuayari. Ñucataca, can mandashcami ninanda cushichihuan.

⁷⁸Jariyashcacunaca pingai tucuchunlla. Paicunaca, yangamandami ñucataca nalicachinajurca. Ashtahuangarin ñucaca, can mandashcacunata aligutapacha yarishpami causasha.

⁷⁹Canda manllajcunapash, imashna causanata can yachachishcata rijsijcunapash, ñucahuan tandanajuchun.

⁸⁰Ñuca ama pingai tucungapaca, pactachinajuchun can cushca shimicunapi nijunshnallata, ñuca shungupica ima pandapash illaj cashpami ali caiman.

⁸¹Can quishpichinata shuyashpami, ñuca almaca ña huañunashna tucushca. Shina cashpapash, cambaj Shimipi nijujta yariashpami shuyajuni.

⁸²Cambaj Shimipi nijujtaca, ñavipash amsayangacaman chapajushpami: “¿Ima horata ñucataca cushichigrihuanguiyari?” nijurcani.

⁸³Cushnipi huarcushca cara muchilashnami cani. Shina cashpapash pactachinajuchun can cushca shimicunataca, na cungashcanichu.

⁸⁴Canda servij ñucataca, ¿mashna punllacunatata shuyachigringui? Ñucata catiriashpa llaquichijcunataca, ¿ima horashi llaquichingui?

⁸⁵Jariyashcacunaca, utujucunatami ñucaman allashca. Ashtahuangarin can mandashcapi imashna nijujtaca na ruranajunllu.

⁸⁶Can tucui mandashcacunaca, na llullaj shimicunami. Ñucataca, yangamandami catiriashpa llaquichinajun, ayudahuayari.

⁸⁷Ñucataca, ashamandami na alpapi shitahuarca. Shina cajpipash, can mandashcacunataca na saquishcanichu.

⁸⁸Canga, imashna llaquinshnallata, causaita cuhuayari. Imashna causanata cambaj shimihuan yachachishcataca pactachishami.

⁸⁹Mandaj Dioslla, cambaj Shimica causaita causaicamanmi jahua pachapi tiajun.

⁹⁰Mirai miraicunacamanmi, canga tucuita pactachijungui. Cai pachatapash, shinllitapacha can churajpimi tiajun.

⁹¹Can mandashcamandami, tucui imapash cunangaman tiajun. Tucui chaicunaca, candami servinajun.

⁹²Can mandashca Shimipash ñucata na cushichishca cajpica, ñucaca llaquipimi huañuiman carcani.

⁹³Can mandashcacunataca, ima horapash na cungashachu. Chaicunahuanmi, ñucaman causaita cuhuarcangui.

⁹⁴Ñucaca cambajmari cani, quishpichihuayari. Can mandashcacunatami mascajurcani.

⁹⁵Canda na manllajcunaca, ñucata tucuchingapajmi chaparianajun. Ashtahuangarin ñucaca, imashna causanata can yachachishcatami yarijusha.

⁹⁶Imalla alipacha tiashcacunapash, tucurijlla cajtami ricuni. Can mandashca Shimica, ima horapash na tucurij Shimimi.

⁹⁷¡Can mandashcataca, ninandami juyani! Tucui punllami, chaitaca aligutapacha yariajuni.

⁹⁸Can mandashcacunahuanmi, ñucata fiñajcunata yali yachajta rurahuashcangui. Chai mandashcacunaca, tucui causaipimi ñucahuan.

⁹⁹Imashna causachun can yachachishcacunaca, ñuca aligutapacha yarishpa causangapajmi. Chaimandami, ñucata tucui yachachijcunatapash yali yuyaita japircani.

¹⁰⁰Can mandashcacunata cazushpa causashpami, rucucunatapash yali yuyaita japircani.

¹⁰¹Cambaj Shimipi nijujta pactachingapajmi, tucui naliman ñuca chaqui rinatapash jarcarircani.

¹⁰²Ñucataca can yachachijpimi, aliguta ricushpa can mandashcacunamandaca na anchurircani. Chaicunataca canmi yachachihuarcangui.

¹⁰³¡Cambaj Shimicunaca, ñuca shimipica, mishqui mishquimari! Ñuca shimipica, balun mishquitapash yali mishquimi.

¹⁰⁴Can mandashcacunamandami, ali yuyaitaca japircani. Chaimandami llulla causaitaca, tucuita millanayachircani.

¹⁰⁵Cambaj Shimica, ñuca chaqui sarunata punchayachijuj lamparagushnami, ñuca ñanda punchayachijuj michagushnami.

¹⁰⁶Imatapash cashcatapacha rurashpa, aliguta ricushpa can mandashcacunataca pactachishapacha nishpami juramenturcani.

¹⁰⁷Mandaj Dioslla, ninan llaquihuanmi cani. Cambaj Shimipi nijunshnallata, causaita cuhuayari.

¹⁰⁸Mandaj Dioslla, ñuca munai ñuca shimihuan carashami nishpa, animalcunata cushpa huañuchishcataca alicachishpa chasquipairi nipanimi. Aliguta ricushpa can mandashcacunatapash yachachihuayari.

¹⁰⁹Ñuca causaitaca, ima horapash llaqui japinallami. Ashtahuangarin can mandashcataca, na cungarcanichu.

¹¹⁰Canda na manllajcuna ñucata lazungapaj munajpipash, ñucaca can mandashcacunamandaca na anchurircanichu.

¹¹¹Imashna causanata can yachachishcataca, tucui causaipi ñucapaj cachunmi japircani. Chai shimicunami, ñuca shungutaca cushichin.

¹¹²Ñuca shungupica, pactachinajuchun can cushca shimicunata pactachishpa tucuchingacamanmi, tucui causaipi ashtahuan ashtahuan yarijurcanilla.

¹¹³Mishqui shimi, jayaj shungucunataca na ricunayanllu. Ashtahuangarin can mandashcatami juyani.

¹¹⁴Ñucata pacaj, ñuca jarcarina escudoshnami cangui. Cambaj Shimipi nijujtami, yariashpa shuyajurcani.

¹¹⁵Nalita ruraj runacuna, ñucamanda anchurichi. Ñuca Taita Dios mandashcacunatami pactachisha.

¹¹⁶Ñuca shuyajushcamanda ama pingai tucungapaca, cambaj Shimipi nijunshnallata charihuayari. Shina ayudajpica causashami.

¹¹⁷Can charijpimi, ñucaca quishpirisha. Pactachinajuchun can cushca shimicunahuanmi, tucui ñuca causaipi cushijusha.

¹¹⁸Pactachinajuchun can cushca shimicunamanda anchurijcunataca, tucuicunatami sarurcangui. Paicuna umachinata alipacha yachashcapash yanga cajpimi, chashna sarurcangui.

¹¹⁹Canda na manllajcunataca, mapatashnami tucui llactamanda tucuchircangui. Chaimandami, imashna causachun can yachachishcataca juyarcani.

¹²⁰Canda manllashpami, ñucaca chujchurcani. Aliguta ricushpa can mandashcacunataca manllanimi.

¹²¹Aliguta rurashpami, imatapash cashcatapacha rurashpa causarcani. Ñucata llaquichijcunapaj maquipica, ama cushpa saquihuaichu.

¹²²Canda servij ñucataca, canllata aliguta ricushpa pushahuayari. Jariyashcacuna ñucata llaquichishpa charichunga, ama saquihuaichu.

¹²³Can quishpichinata chapajushpallatami, ñuca ñavipash amsayarca. Cambaj Shimipi nijunshnallata, imatapash cashcatapacha ruranatapashmi shuyajurcani.

¹²⁴Canda servijhuanga, imashna can llaquinshnallata alita rurapairi. Pactachinajuchun can cushca shimicunataca yachachihuayari.

¹²⁵Ñucaca, canda servijmi cani. Imashna causanata can yachachishcacunata ali rijsingapaj, ali yuyaita cuhuayari.

¹²⁶Can mandashcata yangapi churashcamandaca, Mandaj Dioslla, ñami imatallapash rurana capangui.

¹²⁷Shinamandami can mandashcacunataca, orotapash yali, ashtahuan ali orotapash yali juyajurcani.

¹²⁸Shinamandami, tucui imacunamandapash yalica, can mandashcacunata tucuillata ashtahuan alicachircani. Llulla causaitaca, tucuitami na ricunayachircani.

¹²⁹Imashna causanata can yachachishcacunaca, juyaillagumi. Chaimandami, ñuca tucui almahuan chaicunataca pactachijurcani.

¹³⁰Cambaj Shimicunata yachachishcami punchayachijun. Imatapash na yachajcunamambash, ali yuyaitami cun.

¹³¹Can mandashcacunata ninanda munaimandami, shimita pascashpa, aij nishpa llaquirircani.

¹³²Cambaj shutita juyajcunata llaquinshnallata, ñucatapash ricushpa llaquihuayari.

¹³³Ñuca purinapica, cambaj Shimihuan mandashpa pushahuayari. Ñucataca, ima nalipash ama mandashpa charihuachun.

¹³⁴Ninandapacha llaquichij runacunamandaca cacharichihuayari. Shina rurajpica, can mandashcacunata pactachishami.

¹³⁵Canda servij ñucataca, cambaj ñavihuan punchayachihuayari. Pactachinajuchun can cushca shimicunataca yachachihuayari.

¹³⁶Can mandashcacunata na cazujcunamandami, ñuca ñavimandaca jatun yacushna viquica jicharirca.

¹³⁷Mandaj Dioslla, canga imatapash cashcatapacha rurajmi cangui. Aliguta ricushpa can mandashcacunapash aligupachami.

¹³⁸Imashna causanata can yachachishcacunaca, aligutalla yachachij, pactachij shimicunami.

¹³⁹Ñucata fiñajcuna cambaj Shimicunata cungajpimi, paicunata ninanda fiñashpa huañujuni.

¹⁴⁰Cambaj Shimica, mapa illajpacha cajpimi, canda servij ñucaca juyani.

¹⁴¹Ñucaca, yangalla runa jichui tucushcami cani. Ashtahuangarin can mandashcacunataca, na cungarcanichu.

¹⁴²Imatapash cashcatapacha can ruranaca, na tucurij causaita causaicaman imatapash cashcatapacha ruranami. Can mandashcacunapash, na llullajmi.

¹⁴³Ñucataca ninan llaquipash, manllaipashmi japihuarca. Ashtahuangarin can mandashcacunami, ninanda cushichihuarca.

¹⁴⁴Imashna causanata can yachachishcacunaca, na tucurij causaita causaicaman imatapash cashcatapacha yachachijmi. Shina causachun ali yuyaita carahuayari, causajushallami.

¹⁴⁵Mandaj Dioslla, tucui ñuca shunguhuanmi caparishpa mañajurcani. Ñucata uyahuayari. Pactachinajuchun can cushca shimicunataca pactachishami.

¹⁴⁶Candami caparishpa mañarcani, quishpichihuayari. Imashna causanata can yachachishcacunataca pactachishami.

¹⁴⁷Nara pacarijpillata jatarishpami, caparishpa mañajurcani. Cambaj Shimipi nijujtami shuyajurcani.

¹⁴⁸Can mandashcacunata yaringapaca, tuta cuidangapaj yaicuna horaspillatami, ñuca ñavica pascarirca.

¹⁴⁹Ñuca mañajujtaca, imashna can llaquijunshnallata uyahuayari. Mandaj Dioslla, aliguta ricushpa can mandajunshnallata, causaita cuhuayari.

¹⁵⁰Ñucata catiriashpa llaquichijcunaca, jatun nalicunata ashtahuan ruranajushpami, can mandashcacunamanda anchurinajurca.

¹⁵¹Mandaj Dioslla, canga ladollapimi cangui. Can tucui mandashcacunapash, na llullachu.

¹⁵²Imashna causanata can yachachishcacunataca, ña unaitami yacharcani. Chaitaca, causaita causaicamanmi churashcangui.

¹⁵³Ñuca llaquita ricushpa cacharichihuayari. Can mandashcacunataca, na cungapashcanichu.

¹⁵⁴Ñucamanda shayarishpa mitsashpa quishpichihuayari. Cambaj Shimi rimashcahuan causaita cuhuayari.

¹⁵⁵Pactachinajuchun can cushca shimicunata na mascashcamandaca, canda na manllajcunapaca, quishpirinapash carupimi.

¹⁵⁶Mandaj Dioslla, can llaquinaca jatumbachami. Aliguta ricushpa can mandajunshnallata, causaita cuhuayari.

¹⁵⁷Ñucata catiriashpa llaquichijcunapash, ñucata fiñajcunapash ashtacapachami. Ashtahuangarin imashna causanata can yachachishcacunamandaca, na anchurishcanichu.

¹⁵⁸Yachashpata na cazujcunataca, cambaj Shimicunata na cazunajujta ricushpami manllarircani.

¹⁵⁹Mandaj Dioslla, can mandashcacunata ñuca juyajujtaca ricuhuayari. Can imashna llaquinshnallata, causaita cuhuayari.

¹⁶⁰Tucui cambaj Shimicunaca, napacha llullachu. Imatapash cashcatapacha rurashpa, aliguta ricushpa mandashcacunaca, na tucurij causaita causaicamanmi.

¹⁶¹Ñucataca, mandajcunami yangamanda catiriashpa llaquichinajurca. Ashtahuangarin ñuca shungupica, cambaj Shimicunata manllashpami causajurcani.

¹⁶²Ñucaca, macanajushpa ashtacata quichumushcashnami, cambaj Shimihuanga cushijuni.

¹⁶³Llullanataca fiñanimi, ninandami millanayachini. Can mandashcatami juyani.

¹⁶⁴Imatapash cashcatapacha rurashpa, aliguta ricushpa can mandashca shimicunamandami, punllapi canchiscaman candaca alicachijuni.

¹⁶⁵Can mandashcata juyajcunaca, casilla ali causaitami charin. Paicunapaca, imapi nitijanapash na tianllu.

¹⁶⁶Mandaj Dioslla, can quishpichinatami shuyajurcani. Can mandashcacunata rurashpami causajurcani.

¹⁶⁷Ñuca tucui almahuanmi, imashna causanata can yachachishcacunataca pactachijurcani. Chaicunataca ninandapachami juyarcani.

¹⁶⁸Can mandashcacunatapash, imashna causanata can yachachishcacunatapash cazujurcanimi. Ñuca tucui causaica cambaj ñaupajpi cashcamandami, chashna cazujurcani.

¹⁶⁹Mandaj Dioslla, ñuca caparishpa mañashcapash, cambaj ñaupajman chayapachun. Cambaj Shimipi nijunshnallata ali yuyaita cuhuayari.

¹⁷⁰Ñuca mañashcapash, cambaj ñaupajman chayapachun. Can nijunshnallata cacharichihuayari.

¹⁷¹Pactachinajuchun can cushca shimicunata, canllata ñucaman yachachijpimi, ñuca shimihuanga ninanda alicachijusha.

¹⁷²Tucui can mandashcacunaca, imatapash cashcatapacha rurana cashcamandami, ñuca jalluca can rimashca shimicunata rimajunga.

¹⁷³Cambaj maquica, ayudangapaj ucha shuyajupachunlla. Can mandashcacunatami agllarcani.

¹⁷⁴Mandaj Dioslla, can quishpichinatami ninanda munarcani. Can mandashcacunami, ñucataca ninanda cushichin.

¹⁷⁵Ñuca almaca, canda alicachingapaj causajuchun. Aliguta ricushpa can mandashcacunaca ayudahuachunlla.

¹⁷⁶Ñucaca, chingashca llamagushnami maitapash purijurcani. Can mandashcacunata na cungashcamandaca, canda servij ñucata mascahuayari.