Read Imbabura Highland Quichua Psalms 132 Bible Online

Psalms 132 - Imbabura Highland Quichua bible

Psalms 132

¹Vichai rinajushpa candanami. Mandaj Dioslla, Davidtapash, pai llaquichi tucushcatapash yaripairi.

²Can Mandaj Diosman, pai juramentushcatapash yaripairi. Jacoboman shinlli canata cuj Diosmanmi, cashna nishpa ari nijurca:

³“Ñuca causajuj huasi ucumambash, na yaicushachu. Ñuca camapi siririshpa samangapajpash, na vitsiashachu.

⁴Ñuca ñavitapash, napacha puñuchun saquishachu. Ñavitallapash na vichashachu.

⁵Mandaj Diospaj causana pushtuta taringacaman, Jacoboman ushaita cuj Dios causana huasita taringacaman, napacha samashachu” nijurcami.

⁶Uyaichi, Efrata shuti pueblopi cashpami, cashnata uyarcanchi. Bosque pambacunapimi tarircanchi.

⁷Pai tiajuj jatun carpaman yaicushpami, paipaj chaqui saruna ñaupajpi cungurishunchi.

⁸Mandaj Dioslla, jatarishpa can samana pushtuman ripashunyari. Cambash, cambaj ninan ushaita charij arcapash ripashunyari.

⁹Cambaj curacunaca, imatapash cashcatapacha ruranahuan churajushcashna cachun. Cambajlla causajcunaca, ninanda cushijuchun.

¹⁰Canda servij Davidta juyaimandaca, aceiteta talishpa javishca cambaj jatun mandajmandapash, cambaj ñavitaca ama shujman churapaichu.

¹¹Mandaj Diosca, na llullashpa pactachingapajmi, juramentushpa Davidman cashna nijurca: “Can mandashpa tiajushcapica, cambaj miraicunatami churasha.

¹²Cambaj churicuna ñucahuan ari ninajushcatapash, imashna causanata ñuca yachachishcatapash pactachishpaca, paicunapaj churicunapashmi, can mandashpa tiarinapica, tucui causaipi tiarinajunga” nijurcami.

¹³Mandaj Diosmi, Sion shuti pueblota agllarca. Pai chaipi causangapaj munashpami, cashna nijurca:

¹⁴“Caimi, causaita causaicaman ñuca samana pushtu. Caipi causangapaj munashcamandami, caipi causagrini.

¹⁵Ashtaca alicuna tiachunmi, ninanda bendiciasha. Imagutapash na charijcunamambash, na ushangacamanmi micunata carasha.

¹⁶Shinallata paicunapaj curacunamambash, churajunata churachinshnami quishpirinata churachisha. Diospajlla causajcunaca, ninan cushijuihuanmi caparinajunga.

¹⁷Chaipimi, David mandajushcataca, retoñachinshna cutin churasha. Aceiteta talishpa javishca ñuca jatun mandajmanmi, lamparagutashna alichishca charijuni.

¹⁸Paita fiñajcunataca, pandarinatami churajunatashna churachisha. Ashtahuangarin paipaj umapica, juyailla coronami sisashna ricuringa” nijurcami.